Go Thopa—Kgwebo ya Lefase ka Bophara

LEBAKENG la nywaga-some e fetilego, go ile gwa ba le kgolo e makatšago ya ditiragalo tša go thopa lefaseng ka moka. Pego e nngwe e bolela gore magareng ga 1968 le 1982, mathopša ao e nyakilego go ba a sekete a ile a thopša dinageng tše 73. Eupša morago bjale ka bo-1990, batho ba lekanyetšwago go 20 000 go ya go 30 000 ba ile ba thopša ngwaga o mongwe le o mongwe.

Go thopa ke bosenyi bjo bo bonalago bo tumile gare ga basenyi bao ba dulago Russia go fihla Philippines, moo go nago le bathopi bao ba ikemišeditšego go thopa selo se sengwe le se sengwe seo se phelago. Tiragalong e nngwe, lesea leo le bego le sešo la ba le letšatši le tee le belegwe le ile la thopša. Kua Guatemala mokgekolo wa nywaga e 84 yo a bego a dutše setulong sa digole o ile a thopša gomme a golegwa lebaka la dikgwedi tše pedi. Kua Rio de Janeiro, bahlasedi ba setarateng ba thopa batho mo setarateng, ka dinako tše dingwe ba nyake tefo ya topollo ya bonyenyane bja R600.

Gaešita le diphoofolo ga go bonale di bolokegile. Nywageng e fetilego disenyi tšeo di nago le mereba tša Thailand di ile tša thopa tlou yeo e imelago ditone tše tshelelago gomme tša nyaka tefo ya topollo ya R9 000. Dihlopha tša disenyi kua Mexico go thwe di kgothaletša ditho tša tšona tše dinyenyane gore di itlwaetše ka diruiwa le diphoofolo tša ka gae e le gore di hwetše phihlelo pele ga ge di ka thoma modirong wa kgonthe.

Nakong e fetilego, bathopi ba be ba hlasela kudu bao ba humilego, eupša mehla e fetogile. Pego yeo e tšwago go Reuters e re: “Go thopa go fetogile tiragalo ya letšatši le letšatši Guatemala moo batho ka lethabo ba gopolago dinako tše fetilego tše monate nakong ya ge marabele a kganetšo a bego a hlasela palo e nyenyane ya bo-rakgwebo bao ba humilego. Gona bjale mohumi le modiidi, yo mogolo le yo monyenyane, dihlopha tša bathopi di ba bona e le dibapadišwa tše swanetšego.”

Melato yeo e lego ya maemo a godimo ka mo go tlwaelegilego e newa šedi e kgolo ke mekero ya ditaba, eupša palo e kgolo ya ditiragalo tša go thopa e rarollwa ka ntle le go phatlalatšwa. Ge e le gabotse, ka mabaka a itšego, dinaga “di na le tlhohleletšo e nyenyane ya go kwalakwatša bothata bja go thopa.” Sehlogo se se latelago se tla ahla-ahla a mangwe a mabaka a bjalo.

[Mmapa go letlakala 19]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

MEXICO

Ka ge go e-na le batho ba 2 000 bao ba thopšago ngwaga o mongwe le o mongwe, go thopa go bile go bitšwa gore ke “intaseteri e nyenyane yeo e hlamilwego.”

GREAT BRITAIN

Phemelo ya tša go thopša ya Lloyd’s of London e oketšegile ka 50 lekgolong ngwaga le ngwaga ga e sa le go tloga ka 1990.

RUSSIA

Tikologong ya Caucasus ya borwa bja Russia e nnoši, palo ya bao ba thopilwego e ile ya oketšega go tloga go 272 ka 1996 go ya go 1 500 ka 1998.

PHILIPPINES

Go ya ka “Asiaweek,” “Philippines mo gongwe ke lefelo la tša go thopa la Asia.” Go na le disenyi tša go thopa tše di rulagantšwego tše fetago 40.

BRAZIL

Gona moo go begilwe gore ka ngwaga o tee bathopi ba ile ba kgoboketša tšhelete ya tefo ya topollo yeo e ka bago diranta tše dikete tše dimilione tše 7,3.

COLOMBIA

Nywageng ya morago bjale dikete-kete tša batho di be di dutše di thopša ngwaga le ngwaga. Ka May 1999, marabele a ile a thopa ditho tša kereke nakong ya Mmisa.

[Mothopo]

Mountain High Maps® Copyright © 1997 Digital Wisdom, Inc.