Go Thopa—Na go na le Tharollo?

TONA-KGOLO ya Chechnya ge a be a holofetša go fediša tlaišo ye repabliking ya gagwe ya Russia yeo e tlaišwago ke go thopa, o ile a tsebatša gore: “Ditiro tša go thopa di fihlile ntlheng yeo di sa kgotlelegego setšhabeng ka moka, gomme setšhaba ka moka se swanetše go lwantšhana le bobe bjo.”

Go fediša go thopa? Pakane ke e retegago, eupša potšišo ke gore, Bjang?

Maiteko ao a Dirwago

Babuši ba Colombia ba ile ba kgetha baemedi ba ka sephiring ba 2 000, batšhotšhisi ba setšhaba ba 24, gaešita le molaodi yo a kgethegilego yo a lwantšhanago le go thopša e le feela bakeng sa go lwantšha go thopa. Kua Rio de Janeiro, Brazil, mogwanto wa setšhaba wo o bego o ganetšana le go thopa go gontši ga toropong go ile gwa goka bagwanti ba ka bago 100 000. Brazil le Colombia,  dihlopha tša nakwana tša tša bohlabani di ile tša itefeletša ka go thopa ba meloko ya bathopi. Gape badudi ba bangwe ba Philippines ba ile ba tšhabela go dihlopha tša toka tša go otla disenyi—ba ile ba fega bathopi!

Babuši ba Guatemala ba ile ba tšweletša kotlo ya lehu bakeng sa bathopi gomme mopresidente o ile a rulaganya madira gore a thibele leuba la go thopa. Italy mmušo o ile wa amogela ditekanyetšo tše tiilego bakeng sa go thibela go thopa, ka go dira gore ditefo tša topollo e be tšeo e sego tša molao le go swara tšhelete le thoto bakeng sa go thibela ba leloko go lefa. Bahlankedi ba Italy ba ikgantšha ka gore ditekanyetšo tše di tsentšhitše letsogo go fokotšeng go thopa. Lega go le bjalo, basekaseki ba šišinya gore ka baka la se, malapa a leka go rarolla melato ka sephiring le gore se se theoša palo yeo e begwago ya mmušo ya go thopa. Baeletši ba ka thoko ba tša tšhireletšego ba lekanyetša gore palo ya go thopa kua Italy e tloga e oketšegile gabedi ga e sa le go tloga ka bo-1980.

Ditšhišinyo tše Dintši—Ditharollo tše Sego Kae

Go malapa a mantši a bahlaselwa ba go thopša, go na le tharollo e tee feela yeo e bonalago e šoma—go ntšha baratiwa ba bona ka pela ka mo go kgonegago ka peile. Eupša ditsebi di lemoša gore ge e ba tefo ya topollo e le e ntši kudu gomme e lefša ka pela-pela, bathopi ba ka lebelela lapa e le mohlaselwa yo bonolo gomme ba ka boa gape la bobedi. Goba ba ka nyaka tefo ya topollo ya bobedi pele ga ge ba ka lokolla mohlaselwa.

Malapa a mangwe a ile a lefa tefo e phagamego ya topollo gomme ka morago ba hwetša gore mohlaselwa o be a šetše a hwile. Ka gona ditsebi di bolela gore motho ga se a swanela go lefa tefo ya topollo goba a tsena ditherišanong pele ga ge go hwetšwa bohlatse bja gore mohlaselwa o sa phela. Bohlatse bjo bjalo bo ka ba ka tsela ya potšišo yeo karabo ya yona e ka kgonago go arabja ke mohlaselwa feela. Malapa a mangwe a kgopela seswantšho sa mohlaselwa a swere kuranta ya morago-rago.

Go thwe’ng ka megato ya tlhakodišo? Gantši e tswalane le go bea bophelo kotsing kudu. Brian Jenkins, setsebi go tša go thopa o re: “Ba 79 lekgolong ba bahlaselwa ka moka ba bolawa nakong ya maiteko a go hlakodiša kua Latin America.” Lega go le bjalo, ka dinako tše dingwe maiteko a tša tlhakodišo a atlega.

Ga go makatše ge ditharollo ka moka di lebiša tlhokomelo go thibelo ya go thopša. Ga se babuši ba mmušo feela bao ba akaretšwago maitekong a go thibela go thopša. Dikuranta di ruta kamoo batho ba ka phemago ka gona go thopša, kamoo ba ka itahlelago fase ka gona go tšwa koloing yeo e sepelago le kamoo ba ka hlalefetšago ka gona bathopi menaganong. Mafelo a go ithuta bokgoni bja ntwa a nea dithuto mabapi le go iphemela malebana le go thopa. Dikhamphani di rekiša difetiši tša ultra micro tšeo di bitšago R91 000, tšeo di ka tsenywago menong a bana bakeng sa go thuša maphodisa go tsoma bana go fihlela ba ba hwetša ge e ba ba thopilwe. Batšweletši ba dikoloi ba tšweletša dikoloi tša “thibelo ya go thopša” bakeng sa bao ba ka di fihlelelago tšeo di nago le didirišwa tša kgase ya go ntšhiša megokgo, mašobana ao go tšwelelago melongwana ya dithunya feela, mafasetere ao a thibelago dikolo, maotwana ao a thibetšwego go ka segwa, didirišwa tše nago le oli ya go thedimoša.

Ba bangwe ba bao ba humilego ba bona go ba le bahlapetši e le tharollo. Lega go le bjalo, setsebi sa tša tšhireletšego Francisco Gomez Lerma se bolela mabapi le maemo a bjalo a Mexico gore: ‘Bahlapetši ga ba thuše ka selo ka gobane ba tanya kgahlego gomme ba ka ba ba dirišana le bathopi.’

Bothata bja go thopa bo raragane kudu e bile medu ya bjona e iša tlase-tlase moo e lego gore ga go seo batho ba ka se dirago seo se bonalago se swanetše bakeng sa go bo fediša. Ka gona, na ga go na tharollo ya kgonthe?

Tharollo Yeo e Lego Gona

Makasine wo o šupile go tharollo e nnoši ya kgonthe bakeng sa mathata a bjalo ao batho ba lebeletšanego le wona. Tharollo yeo ke yeo Morwa wa Modimo Jesu Kriste, a boletšego ka yona ge a be a ruta balatedi ba gagwe go rapela gore: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.”—Mateo 6:10.

Go molaleng gore re nyaka mmušo wa go loka wa lefase bakeng sa go laola ditaba tša batho ba lefase ka go fapa-fapana ga bona—ee, Mmušo wa Modimo wo Jesu a boletšego ka wona. Ka ge batho ba se ba ka ba kgona go hloma mmušo o  bjalo, ke gabohlale gore re lebelele go Mmopi wa rena Jehofa Modimo. Lentšu la gagwe, Beibele le bolela gore o rulagantše go dira sona seo.—Psalme 83:18.

Moporofeta Daniele o ile a bega morero wa Jehofa ka go ngwala gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, . . . O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.” (Daniele 2:44) Beibele e hlalosa kamoo mmušo wo wa Modimo o tlago go gata megato e tšwelago pele bakeng sa go fediša ditiro ka moka tša bosenyi, go akaretša le go thopa.

Thuto e Swanetšego e Bohlokwa

Ga go na pelaelo gore o tla dumela gore go tsenya ditekanyetšo tše di kwagalago bathong go bohlokwa bakeng sa go rarolla bothata bja go thopa. Ka mohlala, ela hloko mafelelo ao lekoko la batho nkabego le ile la ba le ona ge nkabe ka moka ba ile ba ela hloko keletšo yeo e lego Beibeleng e latelago: “Menaxanô a e se bê ya mexabaru. Le bê ba ba kxodilwexo ke tše di lexo xôna.” (Ba-Hebere 13:5) “Le se kê la šala le molato wo Le swanetšexo xo o lefa, xe e se thswanêlô ya xo ratana.”—Ba-Roma 13:8.

O ka latswa e sa le pele kamoo bophelo bo tlago go ba ka gona ka go ela hloko lenaneo la thuto leo le swarwago ke Dihlatse tša Jehofa dinageng tše fetago 230 lefaseng ka moka. Lenaneo le le bile le mafelelo a mabotse bathong ba bantši bao ba bego ba na le megabaru goba e le disenyi tše kotsi. Yo e kilego ya ba mothopi o itše: “Ge nako e dutše e e-ya, ke ile ka lemoga gore e le gore ke kgahliše Modimo go be go nyakega gore ke apole semelo sa-ka sa kgale gomme ke apare se se sefsa—seo se ikokobeditšego le sa go swana le sa Kriste Jesu.”

Lega go le bjalo, gaešita le lenaneo le le lebotse la thuto le ka se fetoše disenyi ka moka, mohlomongwe e sego palo e ntši. Go tla direga’ng ka bao ba ganago go fetoga?

Go Tlošwa ga Badiradibe

Badiradibe ba ka boomo ba ka se dumelelwe go ba balata ba Mmušo wa Modimo. Beibele e re: “A xa le tsebe xobane ba ba sa lokaxo ba ka se bê le kabêlô mmušong wa Modimo? Lesang xo iphora: Ba diotswa, . . . le ba mexabaru, . . . le bahlakodi, ba ba byalo xa ba na kabêlô mmušong wa Modimo.” (1 Ba-Korinthe 6:9, 10) “Ba ba tl’o xo dula mo naxeng, ké baloki . . . Ba babe ba tlo fedišwa naxeng.”—Diema 2:21, 22.

Go ya ka Molao wa Modimo mehleng ya bogologolo, mothopi yo a sa itsholego o be a swanetše go bolawa. (Doiteronomio 24:7) Batho ba megabaru go swana le bathopi, ba ka se be le sebaka Mmušong wa Modimo. Disenyi tša lehono di ka široga toka ya batho, eupša di ka se kgone go široga toka ya Modimo. Bafoši le ge e le bafe ba tla swanelwa ke go fetoša ditsela tša bona ge e ba ba nyaka go phela ka tlase ga pušo ya go loka ya Mmušo wa Jehofa.

Go molaleng gore ge e ba maemo ao a godišago ditiro tša bosenyi a dula a le gona, go tla ba bjalo le ka bosenyi. Lega go le bjalo, Mmušo wa Modimo o ka se dumelele seo, ka gobane Beibele e holofetša gore: “Mmušô wo . . . o tlo phšatla mebušô e mengwê ka moka wa e fediša,” go akaretša le batho ka moka bao ba sa lokago. Boporofeta bjo bja Beibele bo tšwela pele ka gore Mmušo wa Modimo o tla ema go ya go ile. (Daniele 2:44) Akanya feela ka diphetogo tšeo di tlago go diragala!

Lefase le Lefsa la go Loka

Ela hloko boporofeta bjo bongwe bja Beibele. Ke bjo bo hlalosago bokamoso ka tsela e botse ka mantšu a: “Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.”—Jesaya 65:21, 22.

Mmušo wa Modimo o tlo fetola polanete ka moka. Bohle bao ba phelago ba tla kgona go thabela bophelo ka mo go tletšego, gomme ba godiša bokgoni bja bona bja tlhago ka go swarega modirong o kgotsofatšago le boithabišong bjo bo agago. Maemo lefaseng ka moka e tla ba ao e lego gore ga go na motho yo a kago nagana ka go thopa moagišani wa gagwe. Maikwelo mabapi le tšhireletšego e tla ba a ka mo go feletšego. (Mika 4:4) Ka gona, Mmušo wa Modimo o tla be o tlošitše go thopa kgaolong ya histori ya tšhošetšo ya lefase ka moka ya mehleng yeno mo motho a ka se sa hlwago a e gopola.—Jesaya 65:17.

[Seswantšho go letlakala 26]

“Xò se e a ba thšošaxo.”—Mika 4:4