Malapa ao a se Nago Bo-tate—Go Fediša Tshekamelo

GE E ba tshekamelo yeo e lego gona gona bjale e tšwela pele, gona go se go ye kae malapa ao a se nago tate e tla ba selo se tlwaelegilego. Pego ya Lefapha la tša Maphelo le Ditirelo tša Batho la United States e bolela gore: “Bana bao ba godišitšwego ke motswadi yo a se nago molekane gantši ba hwetša meputso ya tlase, ba ba le mathata a mantši a boitshwaro le go ba le ditekanyo tše di phagamego tša bokoka le ditšharakano tša monagano. . . . Go godišetšwa lapeng leo le nago le mma yo a se nago molekane go tswalana le dikotsi tšeo di phagamego tša gore bafsa bao ba lego mahlalagading ba belege bana, go tlogela sekolo mo go phagamego [le] go golegwa sekolong sa tayo.”

Ka gona, ga go makatše gore bo-rathutamahlale ba tša leago, baeletši ba malapa, balaodi ba tša thuto gaešita le bo-radipolitiki ba nyaka e le ka kgonthe ditsela tša go kgaotša tshekamelo ye e senyago. Diboka tše dikgolo tša banna di ile tša swarwa bakeng sa go hlohleletša boikgodišo bja go ba tate le go tiišetša boitlamo bja banna go malapa a bona. Dipuku mabapi le go ba tate di ile tša rekišwa ka bontši. Maiteko a ile a ba a dirwa bakeng sa go gapeletša bo-tate gore ba hlokomele boikarabelo bja bona. United States, “bo-tate bao ba palelwago ke go fepa bana ba bona” ba ile ba kgalemelwa ke baahlodi, ba hlaselwa mananeong a poledišano a TV gaešita le go gobošwa phatlalatša. Lega go le bjalo, maiteko a bjalo a ile a tšweletša ditla-morago tšeo di fokolago.

Ditharollo tša Kapejana

Ditharollo tša kapejana ka mo go swanago di ka tšweletša ditla-morago tšeo di belaetšago. Ka mohlala, mosadi yo a hladilwego a ka nyalwa gape ka pela, a holofela go nea bana ba gagwe tate yo mofsa. Eupša le ge lenyalo la bobedi le ka ba le mehola ya lona e itšego, le ka ba le mathata. Bana ka dinako tše dingwe ba lwantšhana le go amogela motho yo mongwe bjalo ka tate wa bona yo mofsa. Ka dinako tše dingwe ga ba dire bjalo. Nyakišišo e nngwe e utollotše gore “mo e nyakilego go ba pedi-tharong ya basadi bao ba phetšego le motswadi wa mogodiši ba ile ba tloga gae pele ga nywaga ya bo-19 . . . , ge go bapišwa le basadi ba 50% bao ba tšwago malapeng ao a šireletšegilego.” Gaešita le malapeng a motswadi wa bobedi, ka dinako tše dingwe go tšea nywaga e sego kae pele ga ge tate wa lenyalo la bobedi a ka amogelwa ke bana. *

Ka mo go swanago, ga go na ditharollo tša kapejana bothateng bja go ima ga bafsa bao ba lego mahlalagading. Ka mohlala, go ntšha mpa go lwantšhana le molao wa Modimo gomme go nyaka gore mosadi wa mofsa a khupetše maikwelo a kwelobohloko ya gagwe e bonolo bophelong bjo bonyenyane bjo bo golago ka go yena. (Ekisodo 20:13; 21:22, 23; Psalme 139:14-16; bapiša le 1 Johane 3:17.) Na seo se ka dula bjang se sa tlogele mabadi a maikwelo? Batho ba bantši ba lebelela go gafa ngwana gore a thwalwe bjalo ka tharollo ya kgaugelo, eupša  le gona go tlogela mabadi a maikwelo—go bobedi mma le ngwana.

Aowa, ditharollo tša kapejana di ka se fediše tshekamelo ya malapa ao a se nago tate. Ditshekamelo tša gona bjale tša malapa di tla kgaotšwa feela ge e ba batho ba ikemišeditše go dira diphetogo tše dikgolo tseleng yeo ba naganago ka yona, boemo bja bona bja kgopolo le boitshwaro bja bona. Go nyakega selo se sengwe se segolo go feta polelo ya go kweša ditsebe bose le thuto ya tša monagano e tumilego ge e ba batho ba tla kgothaletšwa go dira diphetogo tše bjalo tše di nabilego. “Selo [seo] se sengwe se segolo” se hwetšwa ka Lentšung la Modimo, Beibele. Go ba gona, ke Modimo ka noši yo a ilego a hloma thulaganyo ya lapa. (Ba-Efeso 3:14, 15) O tseba gakaone go feta motho le ge e le ofe seo bana ba se nyakago.

Melao ya Motheo ya Beibele e Thuša Malapa go Atlega

Eupša na Beibele ruri e ka thuša bana bao ba nago le motswadi yo a sego gona? Na ga se ba senyega ka tsela yeo ba ka se sa lokišegago? Aowa, ga ba bjalo! Mathomong a sehlogo se, re ile ra tsopola pego ya mmušo ya United States yeo e lokeleditšego dikotsi tše dintši tšeo bana ba ba lebeletšanago le tšona. Go sa šetšwe mantšu a lemošago, pego e ile ya feleletša ka gore: “Go sa šetšwe bohlatse bjo bo tšwelago pele bja dikotsi tše dikgolo, nyakišišo gape e bontšha gore bontši bja bana bao ba tšwago malapeng a motswadi yo a se nago molekane ba gola gabotse.” Ee, ditla-morago tša go se be le tate di ka fedišwa goba bonyenyane tša fokotšwa. Se se bjalo kudu-kudu ge e ba go dirišwa melao ya motheo ya Beibele bakeng sa go godiša bana.

Se se nyaka go šoma ka thata go motswadi yo a se nago molekane—tebelelo yeo e ka bonalago e le thata mathomong. Eupša ge e ba o le boemong bjo, o ka ithuta go ithekga ka mo go feletšego ka Jehofa Modimo. (Diema 3:1, 2) Basadi ba bangwe ba Bakriste mehleng ya Beibele ba ile ba lebeletšana le maemo a bohloko, bjalo ka bohlologadi. Ge e bolela mabapi le ba bjalo Beibele e re: “Mohlôlôxadi e a šiilwexo à nnoši, ó holofêla Modimo, ó tiiša dithapêlô le kxopêlô bošexo le mosexare.” (1 Timotheo 5:5) Gopola gore Jehofa o ipitša “tata-xo-dišuana.” (Psalme 68:5) O ka kgonthišega gore o tla thekga mosadi yo a boifago Modimo maitekong a gagwe a go godiša bana ba gagwe.

Go swara thuto ya ka mehla ya legae ya Beibele le bana ba gago ke tsela ya bohlokwa ya go ba thuša gore ba gole e le batho ba bagolo ba leka-lekanego, e bile e le bao ba budulego. (Doiteronomio 6:6-9) Gare ga Dihlatse tša Jehofa batswadi ba bantši bao ba se nago balekane ba šomiša dikgatišo tšeo di theilwego Beibeleng tšeo di tšweleditšwego ka go lebanya bakeng sa bafsa, bjalo ka Dipotšišo tša Bafsa le Dikarabo tše Šomago. * Tsebišo yeo e lego moo e thuša bafsa go hlagolela ditekanyetšo tša boitshwaro tšeo di ka ba thušago go phema go dira diphošo tšeo di dirilwego ke batswadi ba bona. Ge bana ba dutše ba thoma go tseba Jehofa Modimo, ba ka thoma go kwešiša gore ba na le Tate wa legodimong yo a ba hlokomelago ka mo go tseneletšego. (Psalme 27:10) Se se ka ba thuša go lebeletšana ka katlego le maikwelo a go lahlwa. Mosetsana wa mo-Brithania yo a bilego le phihlelo ya karogano ya batswadi ba gagwe o gopola ka gore: “Go seo ka moka, mma o ile a nweletša go nna go nyakega ga thapelo le go ithekga ka mo go feletšego ka Jehofa. Seo se ile sa re dira gore re kgone go lebeletšana le gona ka katlego.”

 Go Boloka Tlemo ya Motswadi le Ngwana

Beibele e hlalosa ka mo go kwalago gore ngwana o swanetše go hlompha bobedi mmagwe le tatagwe. (Ekisodo 20:12) Le gona tlhalo ga e fediše tlemo ya tate le ngwana. Gaešita le ge monna wa nako e fetilego a ka ba a se sa hlwa a dula ka gae, bana ba sa dutše ba ka holega ka go ba le tswalano e borutho le yena. * Bothata ke gore mma a ka ikwa a mmefeletše e bile a kgopišwa ke tswalano ya gagwe le bana. Na mma a ka lebeletšana bjang le maikwelo a?

Beibele e nea keletšo e botse ge e lemoša gore: “Hlokomela gore bogale bo se ke bja go gokeletša go [ditiro tša] lehloyo . . . Itiše gore o se ke wa retologela go se se gobatšago.” (Jobo 36:18-21, bapiša le NW.) Ke therešo gore ga go bonolo go bolela ka boleta le motho yo a go kwešitšego bohloko goba yo a go lahlilego. Eupša ipotšiše: ‘Na mosetsana a ka ithuta go bota monna ge e ba a tšwela pele a botšwa ka mo tatagwe a lego yo mobe ka gona? Na mošemane a ka hlagolela semelo se sa fetogego sa bonna ge e ba a kgalemelwa o šoro ka go botšwa gore, “O fo swana le tatago”? Na bana ba ka ba le pono e botse ya taolo ge e ba ba rutwa go nyatša tatago bona goba ba sa kgothaletšwe go se sa mmona le gatee?’ Ka ntle le pelaelo, go nyatša tswalano ya bana le tatago bona go baka tshenyo.

O ka makala go tseba gore Beibele ga e ganetše kgalefo e lokilego. Beibele e re: “Xe Le xalefa Le se kê la senya.” (Ba-Efeso 4:26) Go befelwa ga se sebe, eupša sebe ke go laolwa ke “boxale, le pefêlô, le bobe, le maroxa.” (Ba-Kolose 3:8) Ka gona phema ‘go hlasela tatago bana’ pele ga bana. Ge e ba o bona go nyakega gore o bolele manyami a gago, latela tšhišinyo ya Beibele ya go abelana “ma-ja-pelo,” a gago eupša o dira seo le motho yo mongwe ka ntle le bana ba gago—mohlomongwe mogwera yo o mmotago. (Diema 12:25) Leka go kgomarela boemo bja kgopolo bjo bo lokilego le go phema go dula diphošong tša nako e fetilego. (Mmoledi 7:10) Go dira bjalo go ka go thuša kudu bakeng sa go fokotša pefelo ya gago.

Sa mafelelo, gopola gore Beibele e laela gore ngwana a hlomphe tatagwe—gaešita le ge boitshwaro bja tatagwe bo sa hlomphege le ganyenyane. (Ba-Efeso 6:2, 3) Ka gona leka go thuša bana ba gago gore ba lebelele diphošo tša tatago bona ka tsela e botse. Mosadi yo mongwe yo mofsa yo a ilego a gola lapeng leo le kgaoganego o re: “Ka go ba le pono e lokilego ka tate—bjalo ka motho yo a dirago diphošo, yo a sa phethagalago—mafelelong ke ile ka ba le tirišano le yena.” Ka go kgothaletša bana ba gago go hlompha tatago bona, o ba thuša go ba le pono e botse ya taolo ya gago ya botswadi!

Go bohlokwa gape gore o se ke wa dira gore mellwane magareng ga gago le bana ba gago e se bonale. Ba sa dutše ba le ka tlase ga ‘thuto ya mmago bona.’ (Diema 1:8) Barwa ba ka ikwa ba imetšwa ge e ba ba letetšwe gore ba be ‘banna ba ntlo.’ Barwedi ka mo go swanago ba ka nyamišwa ke go ba bjalo ka motho yo mmago bona a utollelago diphiri tša gagwe go yena. Bana ba nyaka go kgonthišetšwa gore wena bjalo ka motswadi o tla ba hlokomela—e sego bona ba hlokomele wena. (Bapiša le 2 Ba-Korinthe 12:14.) Kgonthišetšo e bjalo e ka ba dira gore ba ikwe ba šireletšegile, gaešita le ge boemo bja bona bja lapa e se bjo bobotse.

Bo-tate ba Baemedi

Go thwe’ng ge e ba tate e se karolo ya lapa le gatee? Ditsebi di bolela gore bana ba ka holega ka go ba le bogwera le motho wa monna. Le ge kgahlego e botho yeo malome goba moagišani a e bontšhago  go ngwana e ka ba e holago ka tsela e itšego, o tla holega kudu go bogwera bjo bo agago bja banna bjo bo lego ka phuthegong ya Bokriste. Jesu o holofeditše gore phuthego e be e tla ba bjalo ka lapa leo le thekganago.—Mareka 10:29, 30.

Mehleng ya Beibele Timotheo yo monyenyane o ile a gola a ba monna yo a kgahlišago wa Modimo, ka ntle le thekgo ya tate yo a dumelago. Beibele e iša tumišo ya se go mmagwe le makgolo’agwe ba lerato. (Ditiro 16:1; 2 Timotheo 1:1-5) Lega go le bjalo, o ile a holega gape ka bogwera le monna wa Mokriste—moapostola Paulo. Paulo o ile a bitša Timotheo gore ke “ngwana wa-ka moratiwa, mmotexi Moreneng.” (1 Ba-Korinthe 4:17) Ka mo go swanago lehono, Dihlatse tša Jehofa di kgothaletšwa go kwa keletšo ya Beibele ya “xo hlôla [“hlokomela,” NW] dišuana le bahlôlôxadi.” (Jakobo 1:27) Ba tutueletšwa ‘go phološa bašemane bao ba se nago bo-tate’ ka go ba le kgahlego ya kgonthe le e leka-lekanego go batho ba bjalo. (Jobo 29:12) Mosadi yo mofsa yo a bitšwago Annette o gopola kgahlego e botse yeo mogolo wa Mokriste a e bontšhitšego go yena ge a be a sa le yo monyenyane ka gore: “E be e tloga e le yena feela motho yo a emelago tate yo ke bego ke e-na le yena.”

Go Fediša Tshekamelo

Melao ye ya motheo e ka thuša bana bao ba se nago tate go atlega. Go sa šetšwe mehla ya bona ya bjana e nago le mathata, ba ka ba batho ba bagolo bao ba leka-lekanego ba tšwetšego pele gotee le go ba batswadi ba lerato, ba botegago le bao ba itlamilego. Lega go le bjalo, thibela bolwetši e phala kalafo le ge e le efe. Ge e le gabotse, tshekamelo ye ya malapa ao a se nago tate e ka fedišwa feela ge e ba banna le basadi ba dira boitlamo bja go diriša Beibele maphelong a bona—ka mohlala, ka go kgomarela thibelo ya Beibele ya dikopano tša botona le botshadi pele ga lenyalo le ka go latela ditekanyetšo tša Beibele tšeo di beetšwego banna le basadi.—1 Ba-Korinthe 6:9; Ba-Efeso 5:21-33.

Mehleng ya lehono, bana ba bantši ba na le bo-tate ka dintlong eupša ba sa dutše ba ka bitšwa gore ke bana bao ba se nago bo-tate. Setsebi se sengwe sa tša malapa se bolela gore: “Bothata bjo bogolo bjo bana . . . ba lebeletšanego le bjona lehono ke go hloka nako ya go ba le batswadi le tlhokomelo ya bona.” Lentšu la Modimo le bea taba ye ka tsela e lebanyago. E laela bo-tate mabapi le bana ba bona ka gore: “Ba neeng tayo le phošollo tšeo e lego tša kgodišo ya Bokriste.” (Ba-Efeso 6:4, New English Bible; Diema 24:27) Ge e ba bo-tate ba latela keletšo ya Beibele, bana ga ba na poifo ya go tlogelwa.

Lega go le bjalo, na e tloga e le ga kgonthe go dumela gore batho ba tla retologela Beibeleng ka bontši? Le gatee. (Mateo 7:14) Eupša Dihlatse tša Jehofa di thušitše ba dimilione go hwetša lethabo bophelong bja bona bja lapa ka thušo ya lenaneo la thuto ya legae ya Beibele. * Ke therešo gore Beibele e lemoša gore banyalani ka moka ba tla tlaišega ka “bothata nameng” ka baka la go se phethagale. (1 Ba-Korinthe 7:28) Eupša bao ba hlomphago Lentšu la Modimo e le ka kgonthe ba nyaka go rarolla mathata a bona, e sego go hlala ge go tšwelela leswao la pele la mathata. Ke therešo gore go na le dinako tšeo ka tšona Mokriste a ka naganišišago ka mo go swanetšego ka karogano goba gaešita le tlhalo. (Mateo 5:32) Lega go le bjalo, go tseba ditla-morago tšeo se se ka di tlišago go bana ba gagwe go tla hlohleletša Mokriste go nyaka ditsela tša go phološa lenyalo ge e ba go tloga go kgonega.

Go latela Beibele go ka dira se se fetago go boloka lapa la gago gona bjale. Go ka dira gore go kgonege gore ka moka ga lena le phele ka mo go sa felego! Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Go bala le go diriša tayo yeo e hwetšwago Lentšung la Modimo ke tsela e kaone-kaone ya go di phala ka moka bakeng sa go kgonthišetša gore lapa la gago le tla dula le šireletšegile ka mo go sa felego.

[Mengwalo ya ka tlase]

[Seswantšho go letlakala 8, 9]

Ka go latela melao ya motheo ya Beibele, motswadi yo a se nago molekane a ka ba le katlego go godišeng bana ba gagwe

[Seswantšho go letlakala 10]

Banna ba Bakriste gantši ba ka ‘phološa mošemane yo a se nago tate’ ka go ba le kgahlego e botse ya kgonthe