Malapa ao a se Nago Bo-tate—Pontšho ya Mehla

O BE o ka re bothata bjo bogolo bja tša leago bja mehleng yeno ke bofe? Mo e nyakilego go ba 80 lekgolong ya bao go boledišanwego le bona nyakišišong ya Gullup ya United States ba dumetše gore ke “go hlokega ga kgonthe ga tate ka gae.” Go ya ka Gallup, bana ba fetago dimilione tše 27 kua United States ba phela ka ntle le bo-tate ba bona ba madi, e bile palo yeo e oketšega ka lebelo. Pego ya Sekhwama sa Bana sa Ditšhaba tše Kopanego e bolela gore mo e ka bago 50 lekgolong ya bana ba bašweu bao ba belegwego United States ga e sa le go tloga ka 1980 “ba tla fetša karolo e itšego ya bjana bja bona lapeng la motswadi o tee. Bakeng sa bana ba baso ba Amerika tekanyetšo ke mo e ka bago 80%.” Ka gona USA Today e ile ya bitša United States gore ke “ketapele ya lefase malapeng ao a se nago bo-tate.”

Lega go le bjalo, sehlogo seo se lego go The Atlantic Monthly se bontšha gore: “Go gola ga go thubega ga malapa ga se gona go nnoši setšhabeng sa ma-Amerika. Go bonagala le mo e nyakilego go ba ditšhabeng tšeo di tšwetšego pele, go akaretša le Japane.” Le ge dipalo-palo go le thata go di hwetša, dinaga tše dintši tšeo di hlabologago di bonala di lebeletšana le bothata bjo swanago. Go ya ka makasine wa World Watch, “banna [dinageng tšeo di diilago] gantši ba lahla basadi ba bona le bana ka baka la dikgateletšo tšeo di golago tša tša boiphedišo.” Ruri, nyakišišo nageng ya Caribbean e utolotše gore ke feela 22 lekgolong ya bo-tate bao ba nago le bana ba nywaga e seswai bao ge e le gabotse ba ilego ba dula le bana ba bona.

Bana bao ba se nago tate ba be ba tlwaelegile gaešita le mehleng ya Beibele. (Doiteronomio 27:19; Psalme 94:6) Lega go le bjalo, dinakong tšeo tša morago lebaka le legolo la gore bana e be ba se nago tate e be e le ka baka la lehu la tate. Mongwadi David Blankenhorn o re: “Lehono sebaki sa motheo sa go hloka tate ke kgetho yeo e dirwago ke tate.” Ka kgonthe, bjalo ka ge re tla bona, palo e golago ya bana bao ba se nago tate e nea bohlatse bja gore batho ba bantši lehono ke “ba-hlala-leratô.” Go ya ka Beibele, bjo ke bohlatse bjo bongwe bja gore re phela “mehleng ya bofêlô.”—2 Timotheo 3:1-3.

Lega go le bjalo, bakeng sa bana ba banyenyane go timelela ga tatago bona maphelong a bona ke masetla-pelo a motho ka noši. Go thoma tshekamelo e bohloko le tlalelo yeo e ka bago le ditla-morago tšeo di tšeago nako e telele. Ka gona, lelokelelong le re tla ahla-ahla tshekamelo ye, e sego bakeng sa go nyamiša babadi eupša bakeng sa go nea tsebišo yeo e ka thušago malapa go fediša tshekamelo ye e senyago.