Pono ya Beibele

Tumelo ya Kgonthe ke Eng?

“XO KXAHLA MODIMO XA XO KGÔNEGE XE XO SE TUMÊLÔ. E A BATAMÊLAXO MODIMO Ó SWANETŠE XO DUMÊLA XORE MODIMO Ó XÔNA, LE XORE BA BA MO NYAKAXO Ó A BA PUTSA.”—BA-HEBERE 11:6.

TUMELO ke eng? Ba bangwe ba hlalosa tumelo e le go dumela go Modimo mo e lego ga bodumedi ka ntle le bohlatse bjo bo tiilego bja gore o gona. Mongwadi wa dipego tša ditaba wa mo-Amerika H. L. Mencken o ile a hlalosa tumelo e le “go dumela mo e sego ga tlhaologanyo mo go diregago dilo tšeo di bonalago di ka se direge.” Na ye ke tumelo ya kgonthe bjalo ka ge e hlaloswa ka Beibeleng? Ke gabohlokwa go kwešiša gabotse seo tumelo e lego sona ka gobane bjalo ka ge go tsopotšwe ka mo godimo, ‘go kgahla Modimo ga go kgonege ge go se na tumelo.’

Beibele e re: “Tumelo ke go kgonthišega ka dilo tšeo re di holofetšego.” (Ba-Hebere 11:1, The New Testament in the Language of Today) Ka gona tumelo e theilwe tsebong e nepagetšego, ditherešong tšeo diphetho tše di nepagetšego di ka thewago go tšona. E nyaka e sego go dumela feela eupša lebaka la go dumela.

Go nea mohlala: Mohlomongwe o na le mogwera yo o ka rego ka yena: “Ke holofela monna yola. Nka ithekga ka yena gore o tla boloka lentšu la gagwe. Ke a tseba gore ge ke na le bothata, o tla nthuša.” Ga go bonale o ka bolela seo ka motho yo o mo tsebilego mo e ka bago letšatši le tee goba a mabedi, na ga go bjalo? E swanetše go ba motho yo a ipontšhitšego e le yo o ka ithekgago ka yena leboelela. Go swanetše go ba bjalo le ka tumelo ya bodumedi, yeo e swanetšego go tšweletša kholofelo le kgonthišego yeo e theilwego go bohlatse bjo bo tiilego bjo go ka ithekgwago ka bjona.

Na ke Tumelo Goba go Dumela Tšohle?

Lehono gantši seo se bitšwago tumelo ke seo ge e le gabotse e lego go  dumela tšohle—go ikemišetša go dumela ka ntle le bohlatse goba lebaka le le kwagalago. Go dumela tšohle gantši go theilwe maikwelong le ditumela-khweleng tše feto-fetogago. Ye ga se tumelo yeo e theilwego motheong o mobotse ka ge e se na motheo o ka botwago bakeng sa go dumela.

Go dumela tšohle go ka bakela motho gore a kitimele go dira diphetho tšeo di sa dumelelanego le therešo ya Beibele. Ka baka leo, Beibele e lemoša malebana le tumelo yeo e se nago motheo ka gore: “Lešilo le dumêla ’taba tšohle; mohlale ó hlatha dikxatô.” (Diema 14:15) Moapostola Paulo o ngwadile gore: “Lekang tšohle, Le šalê Lè swere tše boló.” (1 Ba-Thesalonika 5:21) Beibele ga e kgothaletše go dumela tšohle. E kgothaletša tumelo yeo e theilwego bohlatseng.

Go kgona go lemoga tumelo ya kgonthe go e-na le go dumela tšohle ke taba ya bohlokwa kudu. Motho a ka ba wa bodumedi eupša a se be le tumelo ya kgonthe. Paulo o ngwadile gore: “Tumêlô xa se ya bohle.” (2 Ba-Thesalonika 3:2) Eupša tumelo yeo e theilwego Beibeleng ke selo seo batho ba itšego ba nago le sona, le gona e kgoma maphelo a bona.

Tumelo ya Kgonthe e Tlemaganya Motho le Modimo

Tumelo e ka swantšhwa le ketwane yeo e nago le mahuto a kholofelo le go bota ao a tlemaganyago motho le Modimo. Eupša mohuta wo wa tumelo ke wo o hlagolelwago; ga se selo seo re belegwago le sona. O ka ba bjang le tumelo ya kgonthe? Beibele e hlalosa gore: “Etse tumêlô e tšwa xo kweng; ’me xo kwa xo tla ka Lentšu la Modimo.”—Ba-Roma 10:17.

Ka gona, o swanetše go ipha nako ya go tseba Modimo le dithuto tša Morwa wa gagwe, Jesu Kriste. Tsebo ye ga e hwetšwe ka ntle le boiteko. (Diema 2:1-9) O swanetše go katana bakeng sa go hwetša seo se bolelwago ke Beibele e le gore o tle o kgodišege ka go ba ga yona yeo e ka botwago.

Lega go le bjalo, tumelo ya kgonthe e akaretša mo gontši go feta go fo ba le tsebo goba go dumela gore selo se itšego ke sa therešo. E akaretša gape le pelo—mothopo wa tlhohleletšo. Baroma 10:10 e re: “Motho ó dumêla ka pelo.” (Mongwalo o sekamego ke wa rena.) Se se bolela’ng? Ge o dutše o naganišiša ka dilo tša go bontšha go boifa Modimo le go godiša tebogo ka tšona, o dumelela molaetša wa Beibele gore o nwelele ka mo go tseneletšego ka pelong ya gago. Tumelo e a gola le go matlafala ge o dutše o tutueletšega go dira go ya ka dikholofetšo tša Modimo le ge o bona bohlatse bja tšhegofatšo ya gagwe.—2 Ba-Thesalonika 1:3.

Tumelo ya kgonthe ke selo sa bohlokwa gakaakang! Re holega ka go kgona go lebeletšana le maemo a thata ka go ba le kholofelo go Modimo, re bota bokgoni bja gagwe bja go hlahla dikgato tša rena le go rata ga gagwe go hlokomela dinyakwa tša rena. Go oketša moo, Morwa wa Modimo, Jesu Kriste, o ile a bontšha mohola wa lebaka le letelele wa tumelo ka gore: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16, mongwalo o sekamego ke wa rena.) Bophelo bjo bo sa felego—a mpho e kgahlišago gakaakang go bao ba nago le tumelo!

Tumelo kholofetšong ya Modimo ya go putsa bahlanka ba gagwe e nea motho pono e mpsha ka bophelo. Ba-Hebere 11:6 (NW), e bolela gore tumelo ya kgonthe e akaretša go dumela go bokgoni bja Modimo bja go putsa “bao ba mo tsomago ka potego.” Ka gona, go molaleng gore tumelo ya kgonthe ga se go dumela tšohle, le gona ga se go fo dumela gore Modimo o gona. E akaretša go amogela bokgoni bja Modimo bja go dira e le moputsi wa bao ba mo tsomago ka potego. Na o nyaka e le ka kgonthe le ka potego go tseba Modimo? Ge e ba go le bjalo, gona hwetša tsebo e nepagetšego Lentšung la gagwe, Beibele, gomme tumelo ya gago e tla putswa.—Ba-Kolose 1:9, 10.

[Mothopo wa Seswantšho go letlakala 20]

Drawings of Albrecht Dürer/Dover Publications, Inc.