Pono ya Beibele

Na ke mo go Swanetšego go Rapela Jesu?

NYWAGA-KGOLONG ka moka, ba bantši Bojakaneng ba rapetše Jesu Kriste bjalo ka ge eka ke Modimo Ra-matla-ohle. Lega go le bjalo, Jesu ka noši o ile a lebiša tlhokomelo le borapedi feela go Jehofa Modimo. Ka mohlala, nakong ya ge a hlohleletšwa gore a dire tiro ya borapedi go Diabolo, Jesu o itše: “Ke Jehofa Modimo wa gago yo o swanetšego go mo rapela, gomme ke yena a nnoši yo o swanetšego go mo nea tirelo e kgethwa.” (Mateo 4:10, NW) Ka morago Jesu o ile a laela barutiwa ba gagwe gore: “Le se kê la bitša wa mo lefaseng la re: Tata-wešo! Xobane Tata-weno ké o tee wa maxodimong.”—Mateo 23:9.

Jesu o ile a hlalosa go mosadi wa mo-Samaria mohuta wa borapedi bjo batho ba swanetšego go bo nea Modimo. Borapedi bja bona bo swanetše go thewa go moya le therešo. Ruri, “Tate ó nyaka ba ba Mo rapêlaxo ka mokxwa woo.” (Johane 4:23, 24) Ee, borapedi bja tlhompho bo swanetše go išwa feela go Modimo. Go iša borapedi go motho le ge e le ofe goba selo le ge e le sefe se sengwe e tla be e le mohuta o mongwe wa borapedi bja medimo ya diswantšho, bjo bo iletšwago go bobedi Mangwalo a Sehebere le a Segerika.—Ekisodo 20:4, 5; Ba-Galatia 5:19, 20.

Ba bangwe ba ka bea mabaka ka gore: ‘Eupša na Beibele ga e bontšhe gore re swanetše go rapela Jesu? Na Paulo ga se a bolela go Ba-Hebere 1:6 gore: “Anke barongwa ka moka ba Modimo ba mo [Jesu] rapele”?’ (King James Version) Na re ka kwešiša bjang lengwalo le go ya ka seo Beibele e se bolelago ka borapedi bja medimo ya diswantšho?

Borapedi ka Beibeleng

Sa pele, re swanetše go kwešiša seo Paulo a bego a se bolela mo ka borapedi. O dirišitše lentšu la Segerika pro·sky·neʹo. Unger’s Bible Dictionary e bolela gore lentšu le ge e le gabotse le bolela go ‘atla seatla sa yo mongwe ka tsela ya tlhompho goba go dira tiro e itšego ya tlhompho.’ An Expository Dictionary of New Testament Words, ka W. E. Vine e bolela gore lentšu le “le šupa go tiro ya tlhompho, go sa šetšwe ge e ba e išwa go motho . . . goba go Modimo.” Mehleng ya Beibele pro·sky·neʹo gantši e be e akaretša go khunama ga kgonthe ka pele ga motho yo mongwe wa maemo a phagamego.

Ela hloko seswantšho seo Jesu a se neilego sa mohlanka yo a bego a sa kgone go lefa tekanyo e feletšego ya tšhelete go mong wa gagwe. Sebopego sa lentšu le la Segerika se tšwelela seswantšhong se, e bile King James Version ge e le fetolela e re, “ke moka mohlanka a wela fase, a mo [kgoši] rapela [sebopego sa pro·sky·neʹo ] a re, Morena se mphelele pelo, gomme ke tla go lefela tšohle.” (Mateo 18:26; mongwalo o sekamego ke wa rena.) Na monna yo o be a dira tiro ya borapedi bja medimo ya diswantšho? Le gatee! O be a bontšha feela mohuta o itšego wa tlhompho yeo e bego e swanetše kgoši, mong wa gagwe le yo a phagamego.

Ditiro tše bjalo tša go khunama goba dipontšho tša tlhompho, di be di tlwaelegile kudu ka Bohlabela bja mehleng ya Beibele. Jakobo o ile a khunama ga šupa nakong ya ge a gahlana le ngwanabo, Esau. (Genesi 33:3) Banababo Josefa ba ile ba inama goba ba khunama  pele ga gagwe e le go hlompha boemo bja gagwe kgorong ya Egipita. (Genesi 42:6) Ka baka la seo re ka kwešiša gakaone seo se diregilego ge balepi ba dinaledi ba be ba hwetša ngwana yo monyenyane Jesu, yo ba ilego ba mo tseba e le “Kxoši ya Ba-Juda e sa tš’o xo bêlêxwa.” Go etša ge e fetolelwa ka go King James Version, pego e re botša gore ba ile ba “wela fase ba mo rapela [pro·sky·neʹo].”—Mateo 2:2, 11.

Ka gona go molaleng gore lentšu pro·sky·neʹo leo go ya ka diphetolelo tše dingwe tša Beibele le fetolelwago e le “borapedi,” ga se le bolokelwe ka mo go feletšego bakeng sa mohuta wa tlhompho yeo e swanetšego Jehofa Modimo. Le ka šupa gape go tlhompho le kgodišo tšeo di bontšhwago go motho yo mongwe. Ka boiteko bja go phema go se kwešiše le ge e le gofe, diphetolelo tše dingwe tša Beibele di fetolela lentšu pro·sky·neʹo go Ba-Hebere 1:6 e le “go mo nea tlhompho” (New Jerusalem Bible), “go mo godiša” (The Complete Bible in Modern English), “go inama pele ga gagwe” (Twentieth Century New Testament), goba “go mo khunamela” (New World Translation).

Jesu o Swanetšwe ke go Khunamelwa

Na Jesu o swanetšwe ke go khunamelwa mo go bjalo? Ka mo go kgonthišeditšwego, go bjalo! Moapostola Paulo lengwalong la gagwe leo le yago go ba-Hebere o hlalosa gore bjalo ka “mo-ja-bohwa wa tšohle,” Jesu o “[dutše] ka letsoxong le letona la boxoši bya maxodimong.” (Ba-Hebere 1:2-4) Ka gona, “leineng la Jesu xo khunamê matôlô ohle a ba lexo kwa lexodimong le mo lefaseng le ka tlase xa lefase; Maleme ohle a dumêlê a re: Jesu Kriste ké Yêna Morêna, ’me ya tlo ba xo rêta Modimo Tat’axwe.”—Ba-Filipi 2:10, 11.

Ka mo go lemogegago, Kriste kgaufsinyane o tla diriša boemo bjo bjo bo phagamego le matla a taolo a oketšegilego ao a sepedišanago le bjona bakeng sa go fetoša lefase le go ba paradeise ya lefase ka bophara. Ka tlase ga taolo ya Modimo le ka baka la sehlabelo sa Jesu sa topollo, o tla tloša lefaseng manyami ka moka, bohloko le dillo bakeng sa go hola bao ba ikokobeletšago pušo ya gagwe ya go loka. Ka gona na ga a swanelwe ke gore re mo godiše, re mo hlomphe le go mo kwa?—Psalme 2:12; Jesaya 9:5; Luka 23:43; Kutollo 21:3, 4.

“Modimo yo a Nyakago Boineelo bjo bo Feletšego”

Lega go le bjalo, Beibele e bontšha gabotse gore borapedi bja rena—ka tsela ya tlhompho ya bodumedi le boineelo—bo swanetše go lebišwa feela go Modimo. Moše o ile a mo hlalosa e le “Modimo yo a nyakago boineelo bjo bo feletšego.” (NW) E bile Beibele e re kgothaletša gore re “khunamêlê Yêna E a dirilexo lexodimo le lefase le lewatlê le didiba tša meetse.”—Doiteronomio 4:24; Kutollo 14:7.

Jesu ge e le gabotse o kgatha karolo ya bohlokwa borapeding bja therešo, yena yo a swanetšwego ke kgodišo le tlhompho. (2 Ba-Korinthe 1:20, 21; 1 Timotheo 2:5) Ke yena tsela e nnoši yeo ka yona re ka kgonago go batamela Jehofa Modimo. (Johane 14:6) Ka go dumelelana le seo, Bakriste ba therešo ba dira gabotse gore ba lebiše borapedi bja bona feela go Jehofa Modimo, Ra-matla-ohle.