Na tše ka Moka di Bolela’ng?

GE E ba o be o ka lekodišiša ditekanyetšo tša boitshwaro nywageng ya morago bjale, o tla bona tshekamelo e lego molaleng. Ka ntle le pelaelo, ditekanyetšo tša boitshwaro di tšeelwa fase kudu magareng ga palo e golago ya batho. Tlhaloso ya kgonthe ya se ke eng?

Na se se bolela gore tlhabologo ya rena ka moka le batho ka moka di ahlotšwe e sa le pele, di batametše tshenyego, bjalo ka ge ba bangwe ba bolela? Goba na diphetogo tše bjalo e fo ba karolo ya poela-morago le diphetogo tšeo di tšwelago pele tša histori?

Seo se boletšwego morago ke seo batho ba bantši ba se naganago. Ba lebelela go theoga ga mekgwa ya boitshwaro bja mehleng ya rena bo le bjalo ka tshekamelo feela, e nngwe ya tše dintši tšeo di ilego tša tla tša ba tša feta historing ka moka. Ba letela ka mo go feletšego gore tshekamelo ye e tlwaelegilego e tla fetoga mafelelong le gore ditekanyetšo tše di phagamego tša boitshwaro di tla boa. Na ba nepile?

‘Mehla ya Bofelo’

Anke re hlahlobišišeng mabaka go ya ka pono ya puku yeo nywaga-kgolong e mentši e ilego ya ba taolo yeo e amogelwago gohle mabapi le ditaba tša mekgwa ya boitshwaro—Lentšu la Modimo, Beibele. Ke mo go holago go bapiša lefase la lehono le tlhaloso ya boporofeta yeo Beibele e e neago ya mehla ya makgaola-kgang historing ya batho. Ye ke nako yeo e e bitšago ‘mehla ya bofelo’ goba “bofelo bja tshepedišo ya dilo.” (2 Timotheo 3:1; Mateo 24:3, bapiša le NW.) Bjalo ka ge dipolelwana tše di bontšha, mehla ye ke ya go swaya go fela ga kgonthe ga mehla le go thoma ga e mefsa.

Lentšu la Modimo le boletše e sa le pele gore mehla ya bofelo e be e tla swawa ka “dinako tše hlobaetšago tšeo go lego thata go lebeletšana le tšona.” (NW) Go thuša banyakišiši bao ba phakgamego go lemoga mehla ya bofelo, Beibele e nea ditlhaloso tše dintši tšeo ge di kopane di neago tlhaloso e kwagalago goba pontšho e kopanego ya mehla ye ya moswana-noši.

Mekgwa e Mebe Bathong

Ela hloko e nngwe ya dika tša pontšho yeo e tumilego lehono: ‘Batho e tlo ba ba nago le sebopego sa borapedi eupša ba latola matla a bjona.’ (2 Timotheo 3:2, 5, bapiša le PK.) Ga se gwa ka gwa ba le nako yeo historing e ilego ya hlaolwa ka go fetolwa selefase mo go nago le matla gakaakaa le ka mo go tseneletšego. Modimo o dutše a ganwa bjalo ka molaodi a nnoši, gomme batho ba bantši ga ba amogele Beibele bjalo ka mothopo o nnoši wa therešo. Ke therešo gore madumedi a sa dutše a le gona, eupša a mantši a na le tutuetšo e nyenyane. Ke ponagalo feela yeo e forago.

Beibele e bolela ka seka se sengwe sa pontšho: “Batho e tlo ba . . . ba sa tsebego go itshwara le ba sehlogo,” gomme “ka xo ata xa makxôpô xo tlo nôtlêxa leratô la ba bantši.” (2 Timotheo 3:2, 3, bapiša le PK; Mateo 24:12.) Lentšu la Segerika leo le fetoletšwego e le “sehlogo,” gare ga dilo tše dingwe le bolela “go hloka kwelo-bohloko le maikwelo a botho.” Lehono gaešita le bana ba banyenyane kudu ba ipontšha ba le “sehlogo” e bile ba dira bosenyi bjo šoro bjo bo oketšegago.

Go feta moo, diphetogo tše akgofago tša thekinolotši le tša boiphedišo le megabaru yeo tše di tlilego le yona di bakile gore batho ba bantši kudu ba hlokomologe ditekanyetšo tša kgale tša boitshwaro. Ka ntle le go šetša ba bangwe, ba diriša mekgwa le ge e le efe yeo e lego gona, gaešita le yeo e sa botegego bakeng sa go hwetša tše dintši kamoo ba ka kgonago gore ba kgotsofatše dikganyogo tša bona tša boithati. Koketšego e kgolo tabeng ya go petšha ke  bohlatse bjo bongwe bja boithati, gomme dipalo-palo tša bosenyi tša nywaga-some e sego kae e fetilego di nea bohlatse bjo bo tiilego bja se.

Seka seo se atilego kudu mehleng ya rena ke se: “Batho e tlo ba . . . barati ba maipshino go e na le go ba barati ba Modimo.” (2 Timotheo 3:2, 4, bapiša le NW.) Mohlala o mongwe wa se ke gore batho ba rata maipshino a nama, eupša ga ba nyake boikarabelo bja go phela le molekane o tee wa lenyalo bophelo ka moka. Mafelelo e bile ditiragalo tše tšhošago tša go senyega ga ditswalano tša malapa, bana bao ba sa thabago le ba se nago tswalano ya kgaufsi le malapa a gabo bona, batswadi bao ba se nago balekane le malwetši a go fetetšwa ka dikopano tša botona le botshadi.

Sebopego se sengwe sa pontšho ke gore “batho e tlo ba ba xo ithata, ba mexabaru.” (2 Timotheo 3:2) Go ya ka makasine wa Jeremane wa Die Zeit, “tlhohleletšo ya [mehleng yeno ya tša boiphedišo] ke boithati.” Go feta le ge e le neng pele, go phegelela tšhelete ke selo sa bohlokwa-hlokwa maphelong a batho ba bantši. Phegelelong ye ya boithati, ditekanyetšo tše dingwe tša boitshwaro di a hlokomologwa.

Ditiragalo tša Lefase

Ka ntle le go hlalosa go senyega ga ditekanyetšo tša batho tša boitshwaro, Beibele gape e boletše e sa le pele gore mehla ya bofelo e be e tla swawa ke meferefere e makatšago yeo e bego e tla kgoma lapa la batho. Ka mohlala e bolela gore, “sethšaba se tlo tsoxêla sethšaba; mmušô o tlo tsoxêla mmušô. Xo tlo ba le dithšišinyêxo tše kxolo kua le kua, le ditlala le dinkhu.”—Luka 21:10, 11.

Ka ntle le lekgolo la bo-20 la nywaga, ga se gwa ka gwa ba le nako e nngwe historing moo batho ba bantši kudu ba ilego ba kgomega dikotsing tše dintši gakaakaa tšeo di šišinyago lefase nakong e bjalo e lekanyeditšwego. Ka mohlala, batho ba fetago dimilione tše 100 ba ile ba bolawa ntweng nakong yona yeo, palo e kgolo kudu go feta palo ya bahlaselwa ba ntwa  nywaga-kgolong e sego kae e fetilego e hlakantšhitšwe. Lekgolo la bo-20 la nywaga le re bontšhitše dintwa tše pedi tšeo di fapanego kudu le ge e le dife tše dingwe moo di ilego tša ba tša bitšwa dintwa tša lefase. Dikgohlano tša lefase ka bophara tše swanago le tše ga se tša ka tša direga pele.

Matla a Mabe a Tutuetšago

Beibele gape e utolla go ba gona ga sephedi se kgopo sa moya seo se nago le matla seo “ba rexo ké Diabolo le Sathane,” seo morero wa sona e lego go aroša batho ditekanyetšong tša kgonthe tša boitshwaro gomme sa ba gogela kgobogong ya boitshwaro. E bolela gore mehleng ya bofelo, o theogetše lefaseng “à tuka boxale ka kudu; ó tseba xe a sa šaletšwe ke lebakanyana fêla.”—Kutollo 12:9, 12.

Diabolo ka Beibeleng o hlaloswa e le “mmuši wa mmušô wa sebakeng, ke môya wo mehleng yeno o diraxo ka matla mo baneng ba xo se kwe.” (Ba-Efeso 2:2) Se se bolela gore Diabolo o diriša tutuetšo e matla bathong ba bantši, gantši ntle le gore ba lemoge, bjalo ka ge ka dinako tše dingwe re ka se lemoge tšhilafatšo ya moya yeo e sa bonagalego.

Ka mohlala, tutuetšo ya Sathane e bonwa mekgweng e mentši ya mehleng yeno ya tša poledišano: dibidio, difilimi, thelebišene, Internet, papatšo, dipuku, dimakasine le dikuranta. Bontši bja tsebišo, kudu-kudu yeo e lebišitšego tlhokomelo go bafsa bao ba sa lemogego, bo tletše ka ditshekamelo tše feteletšego le tše gobogilego, bjalo ka kgethollo ya merafo, bonoge, boitshwaro bjo bo gobogilego le bošoro bjo sehlogo.

Batho ba bantši bao ba botegago ba ile ba makatšwa ke go swana magareng ga tlhaloso yeo Beibele e e neago ya mehla ya bofelo le maemo a kgonthe lefaseng la mehleng ya rena. Ke therešo gore go bile le ditiragalo tše dingwe historing pele ga lekgolo la bo-20 la nywaga tšeo ka ditsela tše itšego tše nyenyane di ilego tša bonagala di swanela tlhaloso ya Beibele. Eupša ke feela lekgolong la bo-20 la nywaga le gona bjale lekgolong la bo-21 la nywaga, mo e lego gore dikarolo ka moka tša pontšho di ka bonwa.

Mehla e Mefsa e Tlago

Ga go na yo a nepilego go bao ba dumelago gore batho ba tla fedišwa goba bao ba bolelago gore dilo di tla tšwela pele ka tsela yeo di bego di le ka yona. Go e na le moo, Beibele e bontšha gabotse gore lekoko la gona bjale la lefase leo le laolago lefase le tla tšeelwa sebaka ke selo se sengwe se sefsa ka mo go feletšego.

Ka morago ga ge Jesu a lokeleditše dika tše dintšinyana tša pontšho ya mehla ya bofelo o itše: “Dirang byalo le tabeng yé; xe Le bôna dilô tšeo dì dirêxa, Le tsebê xore mmušô wa Modimo o batametšê.” (Luka 21:31) Mmušo wa Modimo wa legodimong e be e le sehlogo se segolo sa boboledi bja Jesu. (Mateo 6:9, 10) E bile Modimo o mmeile go ba Kgoši ya Mmušo wo, e lego mmušo woo kgaufsinyane o tla bušago lefase ka moka.—Luka 8:1; Kutollo 11:15; 20:1-6.

Mafelelong a mehla ya bofelo, Mmušo wa Modimo wa legodimong wo o tla bego o le diatleng tša Kriste o tla fediša bohle bao e lego manaba a wona—Diabolo le bao ba mo thekgago—gomme legatong la lekoko la mehleng yeno leo le gobogilego boitshwarong go tla bewa lefase le lefsa la go loka. (Daniele 2:44) Lefaseng le le lefsa, batho ba dipelo tše lokilego ba tla thabela bophelo bjo bo sa felego lefaseng leo le fetotšwego paradeise.—Luka 23:43; 2 Petro 3:13; Kutollo 21:3, 4.

Bao ba hlaswago go senyega ga mekgwa ya boitshwaro bja mehleng yeno le go lemoga gore pontšho e kopanego ya mehla ya bofelo e a phethagala ka ditiragalo tša gona bjale ba ka lebelela pele bokamosong bjo bo kgahlišago. Bakeng sa se re leboga Modimo Ra-matla-ohle, yo a nago le taba le rena batho le yo a nago le morero o kgahlišago bakeng sa tlholo ya gagwe, lefase.—Psalme 37:10, 11, 29; 1 Petro 5:6, 7.

Dihlatse tša Jehofa di go laletša go ithuta ka mo go oketšegilego ka Mmopi wa rena yo lerato le tebelelo ya bophelo lefaseng leo le hlwekilego boitshwarong, leo a le swaretšego batho ka moka bao ba le tsomago. Bjalo ka ge Beibele e bolela, “bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.”—Johane 17:3.

[Seswantšho go letlakala 10]

Batho ba dipelo tše lokilego ba tla thabela bophelo bjo bo sa felego lefaseng la paradeise