Na Lefase le tla Kopana?

NYWAGENG ya morago bjale batho ba dimilione ba Yuropa Bohlabela le kae le kae ba ile ba tlaišega ka baka la ditla-morago tša ntwa e bakago karogano. Lega go le bjalo, gaešita le ge dikgohlano tše bjalo tše šoro di be di tšwela pele, batho ba dikete dinageng tše tšeo di hlagaditšwego ke ntwa ba be ba kgona go hlagolela le go kgomarela botee bja kgonthe magareng ga bona. Ela hloko mehlala e sego kae.

Ka 1991 lešaba la ditšhaba-tšhaba leo le nyakilego go ba 15 000 le ile la kopana Zagreb, Croatia. Lephodisa leo le bego le le tiragalong yeo le ile la tutueletšega go hlalosa gore: “E be e tla ba mo gobotse go bontšha mekerong ya ditaba seo se diregago lepatlelong le, gona mo moo re bonago ma-Serbia, ma-Croatia, ma-Slovenia, ma-Montenegro le ba bangwe ba dutše kgaufsi le yo mongwe le yo mongwe wa bona ka khutšo.” Ke eng seo se bakelago botee bjo bo bjalo bjo bo sa tlwaelegago?

Ka 1993 kopano e kgolo ka go fetišiša ya ditšhaba-tšhaba, yeo e bego e na le sehlogo seo se rego “Thuto ya Modimo,” e be e swaretšwe Kiev, motse-mošate wa Ukraine. Go be go na le tlhora ya bao ba nyakilego go ba 65 000. Letlakala la mathomo la Evening Kiev le begile gore: “Dihlatse tša Jehofa . . . di kopane e sego feela ka dipetšhe tše  ditala-lerata tšeo di ngwadilwego ‘Thuto ya Modimo’ go tšona eupša di kopane ka tumelo ya kgonthe.”

Thuto ya Modimo—Tutuetšo ya Botee

Na o ipotšiša lebaka leo ka lona Dihlatse tša Jehofa di thabelago botee mola di dikologilwe ke go hloka botee gakaakaa? Moprofesara wa Mopoliši Wojciech Modzelewski o hlalosa lebaka ka go bolela ka Dihlatse gore: “Lebaka la motheo la boemo bja tšona bja kgopolo bja khutšo ke maikemišetšo a tšona a go latela seo gona bjale e lego melao ya motheo yeo e utollwago ka Beibeleng.” Ruri, Dihlatse di kopane lefaseng ka bophara ka thuto ya Mmopi, Jehofa Modimo. Thuto yeo ke efe?

Jesu Kriste o bontšhitše molao wa motheo wa botee ge a be a bolela mabapi le balatedi ba gagwe gore: “Bôná xa se ba lefase, byalo ka Nna kè se wa lefase.” Ee, boemo bja boema-gare bjo bo tšerwego ke Dihlatse tša Jehofa kae le kae bo a di kopanya. Se se dumelelana le mantšu a Jesu ge a be a rapela a re: “Ke kxopêlêla . . . xore bohle e bê batee, byalo ka xe Wene Tate Ò le xo Nna, le Nna kè le xo Wene. E bê batee ka rena.”—Johane 17:16-21.

Boemo bjo bja boema-gare ke tutuetšo ya botee ka gore bo tutueletša Dihlatse dikarolong ka moka tša lefase go phela ka go dumelelana le seo moporofeta Jesaya a ilego a se bolela mabapi le bohle bao Modimo a ‘tlago go ba ruta . . . ditsela tša gagwe.’ Jesaya o boletše gore ba bjalo ba be ba tla “tšea dithšoša ba rula mexomá ka tšôna, ba tšea marumô ba rula maxwêtla ka ôna.” Moporofeta o tšwetše pele ka gore: “Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.”—Jesaya 2:2-4.

Botee le khutšo tšeo di bonwego dikopanong tša Dihlatse tša Jehofa Yuropa Bohlabela nywaga-someng e fetilego di bontšha gore boporofeta bja Jesaya bo šetše bo phethagatšwa ka tekanyo e nyenyane. Yuropa le kae le kae, Dihlatse di fetotše ditšhoša megoma le marumo go ba magwetla ka tsela ya seswantšhetšo. Ka baka la seo, di thabela khutšo  le botee lehono mo lefaseng le leo le sa kopanago. Ga go makatše ge morulaganyi wa kuranta a kile a bolela gore: “Ge e ba lefase ka moka le ka be le phela ka ditumelo tša [Beibele] tša Dihlatse [tša Jehofa], go tšhollwa ga madi le lehloyo di be di tla fela, gomme lerato le be le tla buša bjalo ka kgoši”! Na seo se tla ka sa ba bjalo?

Kamoo Botee bja Lefase ka Bophara bo tla Diregago ka Gona

E le gore botee bo direge lefaseng ka bophara, go nyakega mo gontši go feta sehlotswana se senyenyane sa batho bao ba nago le maikemišetšo a mabotse. Gape go swanetše gore go be le mmušo wo o nago le matla a go fediša tutuetšo ya bao ba dirago ka go lwantšhana le botee le khutšo. Ge e le gabotse, Jesu o rutile balatedi ba gagwe go rapelela feela mmušo o bjalo: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Ee, Jesu o bontšhitše gore ke feela mmušo wa Modimo, “mmušô wa maxodimo,” o ka neago tharollo ya mathata a lefase—go akaretša bothata bja go hloka botee.—Mateo 4:17.

Jesu Kriste ke Kgoši ya Mmušo wo wa magodimo. Ka tlase ga pušo ya gagwe batho mo lefaseng ba tla ba le nako e sa bapišwego ya khutšo le botee. Botee bjo bja lefase ka bophara bo ka se tlišwe ke kaonefatšo ya tša boiphedišo yeo e dirilwego ke batho. Ke feela mmušo wa lefase wo o lego diatleng tša “Kxoši ya kaxišô [“Khutšo,” NW]” wo o ka dirago seo.—Jesaya 9:5, 6.

Go hloka toka mo go lego gona ga bjale, moo gantši go bakwago ke bodiidi le go dirišwa gampe ga matla, go ka se kgotlelelwe ke Kgošana ya Khutšo. Beibele e holofetša gore: “Dikxoši tšohle di tlo lothša yêna; dithšaba tšohle di tlo mo hlankêla. Xobane ó tlo hlakodiša modiitšana xe a lla, le mohlaki xe a hlôka monamodi. Meôya ya bôná ó tlo e lokolla mohlakong, bošorong . . . Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”—Psalme 72:11, 12, 14, 16.

Go hloka mošomo le gona e tla ba selo sa nako e fetilego ka tlase ga pušo ya Kriste. Moporofeta Jesaya o bolela gore: “Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.” (Jesaya 65:22) Akanya, mang le mang mo lefaseng o tla kgona go dira mošomo o holago le wo o kgotsofatšago!

Botee bja Kgonthe—Neng?

Eupša pušo ya Kriste godimo ga lefase e tla thoma neng? Jesu Kriste ge a araba potšišo yeo o bontšhitše nako yeo e swawago ke dintwa, dipego tša dintwa, malwetši, ditšhišinyego tša lefase le ditiragalo tše dingwe. Lega go le bjalo, o ile a lebiša gape go selo se sengwe seo se kgahlišago—go bolelwa ga ditaba tše dibotse tša Mmušo wa Modimo lefaseng ka moka. (Mateo 24:3-14; Luka 21:11) Jesu o itše, ditiragalo tše di tla fela ‘masetla-pelong a magolo’ ao a tlago go tliša phetogo e feletšego ya pušo bakeng sa lefase. (Mateo 24:21) Bala polelo ya gagwe yeo e begilwego go Mateo kgaolo 24 le Luka kgaolo 21. Bapiša maemo ao a a bolelago e sa le pele le seo o se bonago lefaseng. O kgona go bona ka mo go lego molaleng gore gona bjale re phela kgaufsi-ufsi le gore Modimo a tsene pušo ya batho gare. Mmušo wa gagwe ka Jesu Kriste e le Kgoši, o tla buša. Lefase leo le kopanego le ka pele!

Potšišo e rotogago ke gore, Ke eng seo o swanetšego go se dira gore o bone kholofetšo ye e phethagala? Ka ge Beibele e kgatha tema ya bohlokwa ditebelelong tša batho bakeng sa bokamoso, ke gabohlale go dira boiteko bja go tseba Beibele gakaone. Ka gona, Dihlatse tša Jehofa di tla thabela go etela legaeng la gago bakeng sa go swara thuto e sa lefelelwego ya Beibele le wena. * Ge e ba o amogela boithapo bjo, go se go ye kae o tla bona gore botee bja lefase bo a fihlelelwa le gore le wena o ka kopanela go bjona!

[Mongwalo wa ka tlase]

[Diswantšho go letlakala 17]

Go dikologa lefase ka moka, Dihlatse tša Jehofa di thabela botee bjo bo makatšago

Kiev, Ukraine

Zagreb, Croatia

[Seswantšho go letlakala 18]

Morero wa Modimo bakeng sa batho ke gore e be lapa le tee leo le kopanego, la lefase ka bophara