Diswantšho Tšeo di Kgothaletšago Bootswa di Hwetšagala Kgokaganong ya Megala

LEFASENG KA BOPHARA, BATHO BA DIMILIONE BA DIRIŠA Internet letšatši le lengwe le le lengwe. Ba bantši ba kgokagana le yona bakeng sa kgwebo, go hwetša ditaba tša lefase, go lekola boemo bja tša boso, go ithuta ka dinaga tše fapanego, go hwetša tsebišo ka tša maeto goba go boledišana le ba lapa le bagwera dikarolong tše fapa-fapanego tša lefase. Eupša ba bangwe—batho ba bagolo ba lego lenyalong le ba sego go lona gotee le palo e makatšago ya bana—ba tla diriša kgokagano ya megala bakeng sa lebaka le le tlogago le fapane: GO LEBELELA DISWANTŠHO TŠEO DI KGOTHALETŠAGO BOOTSWA.

 DISWANTŠHO TŠEO DI KGOTHALETŠAGO BOOTSWA TŠA COMPUTER, tšeo gape di bitšwago cyberporn, di tlwaelegile kudu mo e lego gore di fetogile kgwebo ya diranta tše dimilione-milione. The Wall Street Journal e itše: “Hwetša mokero wa Web wo o neago poelo [mašokotšo] gomme dibaka ke gore kgwebo ya wona le kgotsofalo ke [diswantšho tšeo di kgothaletšago bootswa] tšeo di gobogilego ka mo go lego molaleng.”

Journal e tšwetše pele go hlalosa lebaka leo ka lona batho ba retologelago go Internet bakeng sa diswantšho tšeo di kgothaletšago bootswa gore: “Bathekgi ba ka lebelela tsebišo e gobogilego ka ntle le go ya ka dihlong lebenkeleng la dipuku la maemo a tlase goba gaešita le go etela phapoši ya ka morago ya lebenkeleng la kgaufsi la dibidio. Bathekgi ba ka hlahloba tsebišo e šilafetšego ba le noši ka gae—goba ofising.”

Diswantšho Tšeo di Kgothaletšago Bootswa le Bana

Ka manyami, bontši bja babogedi ba cyberporn ke bana. Bana bao ba iletšwago ke molao go reka dipuku tša diswantšho tšeo di kgothaletšago bootswa goba go hiriša dibidio tša diswantšho tšeo di kgothaletšago bootswa ba ka di hwetša gabonolo ka gabo bona ka go tobetša mouse ka makga a sego kae. O kgetha o sa fetše.

Bana ba bantši ka mehla ba bula mekero ya Internet batswadi ba bona ba sa tsebe. Ge e le gabotse, The Detroit News e re “bana ba fetago ba babedi go ba bahlano ba dirile peeletšo go mokero wa web goba tshepedišong e nngwe ya ditirelo tša kgokagano ya megala gaešita le ge mo e nyakilego go ba 85 lekgolong ya batswadi ba e-na le melao malebana le go dira bjalo.”

Le ge bana ba bantši—gotee le batho ba bagolo—ba šetša bakeng sa go uta therešo ya gore ba lebelela diswantšho tšeo di kgothaletšago bootswa, ga se mang le mang yo a bonago go nyakega ga go di uta. Ba bangwe ba nagana mokgwa wo e le sebopego seo se sego kotsi sa boitapološo. Ba bangwe ba dumela gore diswantšho tšeo di kgothaletšago bootswa ga di a lokela bana eupša ba nea lebaka la gore seo batho ba bagolo ba se dirago ka sephiring ke taba ya bona ka noši.

Dinageng tše dingwe ngangišano mabapi le diswantšho tšeo di kgothaletšago bootswa e fetogile ntwa yeo e lwewago ka tekanyo e kgolo kudu ya tša bopolitiki. Ka lehlakoreng le lengwe la ngangišano, baboleledi ba tokologo ya polelo ba ema ka go dumelelana le diswantšho tšeo di kgothaletšago bootswa, gomme ka go le lengwe, baboleledi ba ditekanyetšo tša malapa ba tutueletša balaodi gore ba iletše diswantšho tšeo di kgothaletšago bootswa.

Phafoga! ga e tšee lehlakore ditabeng tša dipolitiki. Morero wa lelokelelo le ke go tsebiša babadi ba rena ka dikotsi tša go bogela diswantšho tšeo di kgothaletšago bootswa, go bontšha ditsela tšeo ba ka itšhireletšago ka tšona bona le baratiwa ba bona le go nea ditšhišinyo tšeo di theilwego Beibeleng bakeng sa motho le ge e le ofe yo a tantšwego ke diswantšho tšeo di kgothaletšago bootswa gomme a kganyoga go lokologa go tšona.