Kamoo Lapa la Rena le Ilego la Boelanywa ka Gona

Ka ge go anega Lars le Judith Westergaard

NTLO e bonagala bjalo ka thulaganyo e tlwaelegilego bakeng sa lapa le lengwe le le lengwe leo le thabilego kua Denmark. Ke ntlo ya boiketlo yeo e nago le serapana seo se kgahlišago, yeo e lego motseng wa khutšo. Ka gare, seswantšho se segolo seo se lego lebotong se bontšha bana ba phetšego gabotse le ba myemyelago ba ka lapeng.

Tate, e lego Lars, ke mogolo wa phuthego ya Dihlatse tša Jehofa. Mosadi wa gagwe, Judith ke mmulamadibogo (moebangedi wa nako e tletšego). Gaešita le ge e le banyalani ba thabilego, ga se gwa ka gwa dula go le bjalo ka mehla. Lars le Judith ba ile ba lebeletšana le mathata le lehloyo tšeo di ilego tša feleletša ka tlhalo le go arogana ga lapa la bona. Lega go le bjalo, lapa la bona gona bjale le boelane gape. Ka baka la’ng? Bona ka noši ba hlalosa seo se diragetšego.

Lars le Judith ga ba na bothata bja go re botša gore ke eng seo se ilego sa se sepele gabotse o šoro lenyalong la bona le kamoo ba ilego ba boelanywa ka gona. Ba ikwa gore mohlomongwe phihlelo ya bona e ka thuša ba bangwe.

Le Thomile Gabotse Kudu

Lars: Lenyalo la rena e be e le lethabo le legolo kudu ge le thoma, ka April 1973. Lefase ka moka le be le bonala le holofetša kudu. Re be re sa tsebe Beibele goba Dihlatse tša Jehofa, eupša re be re kgodišegile gore re ka dira lefase gore e be lefelo le le kaone kudu go ka phela go lona ge e ba batho ka moka ba be ba ka le šomela ka thata ka mo go lekanego. Ka gona re ile ra itswalanya le maiteko a mantši a dipolitiki. Lethabo la rena le ile la gola ge lapa la rena le be le oketšwa ka bašemane ba bararo bao ba phetšego gabotse le ba babotse—Martin, Thomas le Jonas.

Judith: Ke be ke na le maemo a phagamego lekaleng la ditirelo tša selegae. Ka nako e swanago, ke be ke kopanela dipolitiking le medirong ya mokgatlo wa bašomi. Ganyenyane-ganyenyane ke be ke newa maemo a boetapele.

Lars: Ge e le nna, mošomo wa-ka o be o le go mokgatlo o mogolo wa bašomi, e bile ke ile ka tšwela pele maemong a bohlokwa. Mešomo ya rena e be e tšwela pele, le gona go be go bonala go se na selo seo se tlago go šitiša lethabo la rena.

Go Arogana

Lars: Eupša re be re nweletše medirong ya rena e fapa-fapanego mo e lego gore re be re fetša nako e nyenyane re le gotee. Re be re šomela mokgatlo o tee wa dipolitiki eupša dikarolong tše fapanego tša wona. Bašemane ba rena ba bararo ba be ba hlokomelwa ke ba bangwe, e ka ba ka moo ba lego noši goba mafelong a go hlokomela bana mosegare. Ka ge bobedi bja rena re be re nagana ka ditaba tša rena ka noši, bophelo bja rena bja lapa bo ile bja se sa ba le thulaganyo. Ge go ka direga gore bobedi bja rena re be ka gae, gantši diphenkgišano tša mašata di be di šitiša. Ka gona, ke ile ka thoma go nwa bjala bjalo ka sehlare sa go okobatša.

 Judith: Ke therešo, re sa dutše re ratana le go rata bana ba rena, eupša lerato la rena le be le sa hlwe le hlagolelwa ka tsela yeo le bego le swanetše go ba ka yona; le be le bonala le pona. Tswalano ya rena e ile ya se sa thabiša, gomme bana ba ile ba tlaišega e le mafelelo a se.

Lars: Ka maiteko a a tlalelo bakeng sa go bušetša lapa la rena sekeng, ke ile ka phetha ka go tlogela mošomo. Ka 1985 re ile ra huduga toropong gomme ra ya motseng mo re dulago gona ga bjale. Maemo a ile a kaonefala ka lebakanyana, eupša nna le mosadi wa-ka re ile ra tšwela pele re tshwenyega ka dinyakwa tša rena tšeo di fapa-fapanego. Mafelelong, ka February 1989, lenyalo la rena la nywaga e 16 le ile la feleletša ka tlhalo. Lapa la rena le be le senyegile.

Judith: Go be go le bohloko go bona lapa la rena le arogana le go bona kamoo bana ba rena ba ilego ba tlaišega. Re be re befetšwe mo e lego gore re be re sa kgone gaešita le go dumelelana ka karolelano ya go hlokomela bašemane, ka gona ke ile ka hwetša tlhokomelo ya bašemane ba bararo ka moka.

Lars: Nna le Judith re ile ra dira maiteko a sego kae ka kgakanego bakeng sa go boloka lapa la rena le le senyegilego gotee. Re ile ra ba ra rapela Modimo bakeng sa thušo. Eupša re be re tseba mo go nyenyane kudu ka Modimo.

Judith: Dithapelo tša rena di ile tša re tlogela le maikwelo a gore Modimo ga se a theetša. Re a leboga ka gore ga e sa le go tloga ka nako yeo re bone gore Modimo o theetša dithapelo.

Lars: Re be re sa tsebe gore go be go nyakega gore re dire maiteko a magolo le gore rena ka noši re dire diphetogo. Ka gona tlhalo e ile ya ba selo sa kgonthe se se nyamišago.

Go Fetoga mo go sa Letelwago ga Lars

Lars: Nakong ya ge ke be ke dula ke nnoši, ditiragalo di ile tša fetoga ka mo go feletšego go nna ka mo go sa letelwago. Ka letšatši le lengwe ke ile ka amogela dimakasine tše pedi go Dihlatse tša Jehofa. Pele ga nako yeo ke be ke raka Dihlatse ga bonolo. Eupša ge ke dutše ke lebeledišiša dimakasine tšeo, ke ile ka bona gore ge e le gabotse Dihlatse di dumela go bobedi Modimo le Jesu Kriste. Seo e be e le se makatšago kudu. Ke be ke sa tsebe gore e be e le Bakriste.

Mo e ka bago ka nako e swanago, ke be ke dula le mosadi yo ke kopanego le yena. Ke ile ka hwetša gore e kile ya ba yo mongwe wa Dihlatse tša Jehofa. Ge ke thoma go botšiša dipotšišo, o ile a mpontšha ka Beibeleng gore leina la Modimo ke Jehofa. Ka gona gore “Dihlatse tša Jehofa” go bolela gore “Dihlatse tša Modimo”!

Mosadi o ile a nthulaganyetša gore ke be gona polelong ya phatlalatša Holong ya Kopano ya Dihlatse tša Jehofa. Ruri seo ke se bonego moo se ile sa tutuetša kgahlego ya-ka. Ke ile ka etela Holo ya Mmušo ya lefelong leo bakeng sa go ithuta ka mo go oketšegilego, gomme go ile gwa thongwa thuto ya Beibele. Ga se gwa ntšea nako e telele go lemoga gore mokgwa wo ke bego ke phela ka wona o be o fošagetše, ka gona ke ile ka huduga moo nyatsing ya-ka gomme ka yo dula ke nnoši toropong ya gešo. Ka morago ga go dika-dika mo go itšego ke ile ka ikopanya le Dihlatse tša Jehofa gona moo gomme ka tšwetša pele thuto ya-ka ya Beibele.

Lega go le bjalo, ke be ke sa dutše ke e-na le dipelaelo tše itšego. Na Dihlatse tša Jehofa ruri e be e le batho ba Modimo? Go thwe’ng ka dilo ka moka tšeo ke ithutilego tšona ge ke be ke sa le ngwana? Ka ge ke godišitšwe ke le Mosabatha, ke ile ka ikopanya le modiredi wa Mosabatha. O ile a dumela go bala le nna Laboraro le lengwe le le lengwe, mola Dihlatse tša Jehofa di be di bala le nna ka Mošupologo o mongwe le o mongwe. Seo ke bego ke se nyaka e be e  le karabo e kwalago go tšwa dihlopheng ka bobedi ditabeng tše nne tše lebanyago: maboo a Kriste, tsogo, thuto ya Boraro botee le tsela yeo phuthego e swanetšego go rulaganywa ka yona. Go ntšere dikgwedi tše sego kae feela go phumola dipelaelo ka moka. Tabeng e nngwe le e nngwe go tše tše nne—le dilong ka moka—ke feela ditumelo tša Dihlatse tša Jehofa tšeo di bego di theilwe Beibeleng ka mo go feletšego. Ka baka la seo, ka lethabo ke ile ka thoma go tšea karolo medirong ka moka ya phuthego gomme kapejana ke ile ka dira boineelo go Jehofa. Ka May 1990, ke ile ka kolobetšwa.

Go Thwe’ng ka Judith?

Judith: Sehloeng sa mathata a rena a lenyalo, ke ile ka thoma go ya kerekeng gape. Ge ke e-kwa gore Lars o be a e-ba yo mongwe wa Dihlatse tša Jehofa, ke be ke sa thaba le gatee. Morwa wa rena yo monyenyane, Jonas wa nywaga e lesome, ka dinako tše dingwe o be a etela tatagwe, eupša ke ile ka thibela Lars go ya le Jonas dibokeng le ge e le dife tša Dihlatse. Lars o ile a ipelaetša go babuši, eupša ba be ba le ka lehlakoreng la-ka.

Ke be ke kopane le monna yo mongwe. Ka mo go swanago, ke ile ka ineela kudu dipolitiking le mehuteng ka moka ya mediro ya setšhaba. Ka gona ge e ba motho a be a ka bolela ka go boelanywa gape ga lapa la rena ka nako yeo, go be go tla bonala go sa kgonege.

Lesolong la go nyaka selo seo nka lwantšhanago le Dihlatse tša Jehofa ka sona, ke ile ka ya go modiredi wa kereke ya lefelo la rena yo a ilego a dumela di sa tloga fase gore ga a tsebe selo ka Dihlatse le gore o be a se na puku mabapi le bona. Sohle seo a bego a ka se bolela e bile gore go kaone ke se ke ka tlwaelana le bona. Ee, seo ga se sa dira selo go fetola pono ya-ka e fošagetšego mabapi le Dihlatse tša Jehofa. Eupša bjale ke ile ka gapeletšega go kopana le bona ka tsela yeo ke bego ke se ka e letela.

Ngwanešo yo a dulago Sweden o ile a ba yo mongwe wa Dihlatse tša Jehofa, gomme ke ile ka laletšwa lenyalong la gagwe Holong ya Mmušo! Phihlelo yeo e dirile phetogo e makatšago ponong ya-ka ka Dihlatse. Seo se ilego sa mmakatša ke gore e be e se batho bao ba sa kgahlišego bao ke bego ke dula ke ba nagana. E be e le ba botho le ba thabilego, e bile ba bontšha ba tloga ba e-na le metlae.

Go sa dutše go le bjalo, Lars yo e bego e le monna wa-ka, o be a fetogile ka mo go feletšego. E be e le yo a nago le boikarabelo ka mo go oketšegilego, a fetša nako le bana, e le yo botho le yo a laolegago polelong ya gagwe, e bile ga se a ka a nwa ka go se lekanyetše bjalo ka ge a ile a dira nakong e fetilego. Botho bja gagwe e be e le bjo ipiletšago gakaakang! Ga bjale e be e le mohuta wa monna yo ka mehla ke bego ke nyaka gore e be yena. E be e le kgopolo e ferekanyago gakaakang gore ga ke sa nyalane le yena le gore mohlomongwe ka letšatši le lengwe mosadi yo mongwe o tla nyalana le yena!

Ka gona ke ile ka rulaganya “tlhaselo” e sa lemogegego. Nakong ya ge Jonas a be a dula le tatagwe, ke ile ka rulaganya go yo bona Jonas le Lars ke na le banabešo ba babedi ka boradia bja gore e be eka ba tlo bona ngwana ngwanabo bona. Re ile ra kopana phakeng ya go ithabiša. Ge banabešo ba dutše ba hlokometše mošemane, nna le Lars re ile ra hwetša panka gomme ra dula fase.

Seo se ilego sa mmakatša ke gore kapejana ge ke rotoša taba ya bokamoso bja rena, Lars o ile a ntšha puku ka mokotleng wa gagwe. E be e bitšwa Go Dira Bophelo bja Lapa la Gago Gore bo Thabiše. * O ile a mpha puku gomme a šišinya gore ke bale dikgaolo tšeo di lego mabapi le karolo ya monna le ya mosadi ka lapeng. O ile a bolela ntlha e bohlokwa ya go nkgothaletša gore ke hlahlobe mangwalo.

Ka gona, ge nna le Lars re emelela setulong, ke be ke nyaka go mo swara ka letsogo, eupša ka botho o ile a gana seo. Lars o be a sa ikemišetša go thoma segwera se sefsa le nna ka ntle le go tseba pono ya-ka mabapi le tumelo ya gagwe e mpsha. Seo se ile sa nkgopiša ka tsela e itšego, eupša bjale ke ile ka lemoga gore boitshwaro bja gagwe e be e le bjo bo kwagalago le gore bo be bo tla nkhola ge e ba a be a ka ba monna wa-ka gape.

Tše ka moka di ile tša ntira gore ke kgahlegele Dihlatse tša Jehofa le go feta. Letšatšing le latelago, ke ile ka ikopanya le mosadi yo ke bego ke tseba gore ke Hlatse, gomme re ile ra rulaganya gore yena le monna wa gagwe ba nnee tsebišo yeo ke bego ke e nyaka mabapi le bodumedi bja bona. Ba be ba e-na le dikarabo tša Beibele dipotšišong tša-ka ka moka tše dintši. Ke ile ka kgona go bona gore seo Dihlatse tša Jehofa di se rutago se theilwe ka mo go tiilego Beibeleng. Ka morago ga ntlha e nngwe le e nngwe, ke be ke swanetše go ineela therešong.

Nakong yona yeo ke ile ka tlogela Kereke ya Luthere  ya Boebangedi gomme ka kgaotša mediro ya-ka ya dipolitiki. Ke ile ka ba ka tlogela le go kgoga. Seo e be e le mogato o thata go e feta ka moka. Thuto ya-ka ya Beibele e thomile ka August 1990, gomme ka April 1991 ke ile ka kolobetšwa bjalo ka yo mongwe wa Dihlatse tša Jehofa.

Lenyalo la Bona la Bobedi

Judith: Ga bjale, bobedi bja rena bjale re be re le Dihlatse tše kolobeditšwego. Gaešita le ge re ile ra tšea ditsela tše fapanego, bobedi bja rena re ile ra ba le thuto ya Beibele. Re leboga dithuto tša yona tše botse, re be re fapane le seo re bego re le sona pele. Re be re sa dutše re e-na le taba le yo mongwe, mohlomongwe ka tsela e tseneletšego kudu go feta pele. Ka gona, ga bjale re be re lokologile go ka nyalana gape—ka gona se ke seo re se dirilego. Re ile ra ikana la bobedi, eupša nakong ye Holong ya Mmušo ya Dihlatse tša Jehofa.

Lars: Mohlolo o diregile—lapa la rena le boelantšwe gape! Ga bjale re thabile le go ipshina gakaakang!

Judith: Lenyalong go be go tlile barwa ba rena, meloko e mentši le bagwera ba bantši ba bafsa le ba kgale. E be e le phihlelo e kgahlišago. Gare ga baeng go be go e-na le bao ba re tsebilego nakong ya lenyalo la rena leo le fetilego; ba be ba thabetše go re bona re le gotee gape gomme ba be ba makaditšwe ke go bona lethabo la kgonthe magareng ga Dihlatse tša Jehofa.

Bana

Lars: Ga e sa le go tloga ge re kolobeditšwe re bile le lethabo la go bona barwa ba rena ba babedi ba dira kgetho ya go neela maphelo a bona go Jehofa.

Judith: Jonas o ile a bontšha tebogo ka therešo yeo e tšwago ka Beibeleng ga e sa le go tloga ge a tlwaelana le yona e sa le mošemane ge a be a etela tatagwe. O be a na le nywaga e lesome feela ge a mpotša gore o nyaka go dula le tatagwe ka gobane, bjalo ka ge a be a e hlalosa, “Tate o latela Beibele.” Jonas o kolobeditšwe ge a na le nywaga e 14. O feditše dithuto tša gagwe, gomme gona bjale ke modiredi wa nako e tletšego.

Lars: Morwa wa rena yo mogolo Martin, ga bjale o na le nywaga e 27. Diphetogo tšeo a bonego re di dira di mo file mo gontši moo a ka naganago ka gona. O tlogile gae gomme o dula karolong e nngwe ya naga. Nywaga e mebedi e fetilego o ile a thoma go ithuta Beibele le phuthego ya lefelong leo ya Dihlatse tša Jehofa. Ka morago ga dikgwedi tše tlhano feela, o be a loketše go kolobetšwa. O tšwela pele le dithulaganyo tše botse bakeng sa bokamoso bja gagwe bjalo ka Mokriste.

Morwa wa rena wa magareng Thomas, ga bjale ga se yo mongwe wa Dihlatse tša Jehofa. Ke therešo gore re sa dutše re mo rata, e bile re na le tswalano e botse le yena. O thabile ka phetogo yeo e diregilego lapeng la rena. Gomme ka moka ga rena re dumelelana ka gore re leboga melao ya metheo yeo rena bjalo ka batswadi re ithutilego yona go tšwa Beibeleng, lapa la rena le ile la boelanywa gape. A tšhegofatšo e kaakang go rena gore gona bjale re ka kgona go bokanya lapa la rena gotee, e le bašemane ka moka ba bararo le batswadi ka bobedi!

Bophelo bja Rena Lehono

Lars: Ga re bolele gore re fetogile bao ba phethagetšego. Eupša re ithutile selo se itšego—gore lerato le tlhomphano ke dinotlelo tše dikgolo tša lenyalo leo le atlegilego. Motheo wo lenyalo la rena le theilwego go wona gona bjale o fapane kudu go tloga go wa pele. Gona bjale bobedi bja rena re amogetše pušo e phagamego go feta ya rena, ka gobane bobedi bja rena re lemoga gore re phelela Jehofa. Nna le Judith re ikwa re kopantšwe e le ka kgonthe le go lebelela pele bokamosong ka kholofelo.

Judith: Ke nagana gore re bohlatse bjo bo phelago bja gore Jehofa ke moeletši yo kaone kudu wa lenyalo le lapa yo a lego gona.

[Mongwalo wa ka tlase]

[Seswantšho go letlakala 28]

Lars le Judith nakong ya lenyalo la bona la pele, ka 1973

[Seswantšho go letlakala 29]

Bašemane ba bararo ba lahlegetšwe ke lapa la bona le bego le na le botee gomme ba le hwetša gape

[Seswantšho go letlakala 31]

Lars le Judith lehono, ba boelantšwe ke go latela melao ya metheo ya Beibele