Pono ya Beibele

Na Modimo o a Fetoga?

GEORGE DORSEY yo e lego seithuti sa setšo o hlalositše Modimo wa “Testamente ya Kgale” bjalo ka “Modimo yo sehlogo.” O okeditše ka gore: “Yahweh ga . . . a ratege le ganyenyane. Ke Modimo wa bahudi, wa batlaiši, wa bahlabani le wa phenyo.” Ba bangwe ba fihleletše diphetho tše swanago mabapi le Modimo wa “Testamente ya Kgale”—Yahweh, goba Jehofa. Ka gona, ba bangwe lehono ba ipotšiša ge e ba Jehofa ge e le gabotse e be e le Modimo yo sehlogo yo mafelelong a fetotšego semelo sa gagwe bakeng sa go ba Modimo wa “Testamente e mpsha” yo lerato le wa kgaugelo.

Kgopolo e bjalo mabapi le Modimo wa Beibele ga se e mpsha. E ile ya rotošwa la mathomo ke Marcion, wa lekgolo la bobedi la nywaga C.E. yo a swanago le ma-Gnostic. Marcion o ile a gana Modimo wa “Testamente ya Kgale.” O be a tšea Modimo yoo e le Modimo yo šoro le molefeletši, mmuši wa mogateledi yo a bego a nea bao ba mo rapelago meputso. Ka lehlakoreng le lengwe, Marcion o hlalositše Modimo wa “Testamente e mpsha”—bjalo ka ge a utolotšwe ka Jesu Kriste—bjalo ka Modimo yo a phethagetšego, Modimo wa lerato le sekilego le kgaugelo, yo botho le wa tebalelo.

Jehofa o Dumelelana le Tlhohlo ya Maemo ao a Fetogago

Leina la Modimo, Jehofa le bolela gore “Yo a Bakago go ba Gona.” Se se bontšha gore Jehofa o itira gore e be Mophethi wa dikholofetšo tša gagwe ka moka. Ge Moše a be a botšiša Modimo leina la gagwe, Jehofa o ile a oketša tlhalosong ya lona ka gore: “Ke tla ipontšha ke le yo ke tlago go ipontšha ke le yena.” (Ekisodo 3:14, NW) Phetolelo ya Rotherham e e bea ka tsela ye: “Ke Tla Ba se sengwe le se sengwe seo ke kgahlwago ke go ba sona.”

Ka gona Jehofa o kgetha go ba, goba o ipontšha e le se sengwe le se sengwe seo se nyakegago gore a phethe merero ya gagwe ya go loka le dikholofetšo. Bohlatse bja se ke taba ya gore o na le direto tše dintši le mantšu ao a mo hlalosago: Jehofa wa mašaba, Moahlodi, Mmuši, wa Lehufa, Morena yo a Phagamego, Mmopi, Tate, Morutiši yo Mogolo, Modiši, Mokwi wa thapelo, Molopolodi, Modimo yo a thabilego le tše dingwe tše dintši. O kgethile gore a be dilo tše ka moka—le tše dingwe tše dintši—e le gore a phethagatše merero ya gagwe e lerato.—Ekisodo 34:14, PK; Baahlodi 11:27; Psalme 23:1; 65:2; 73:28; 89:26; Jesaya 8:13; 30:20; 40:28; 41:14; 1 Timotheo 1:11.

Ka gona, na se se bolela gore botho goba ditekanyetšo tša Modimo di a fetoga? Aowa. Jakobo 1:17 ge e bolela mabapi le Modimo e re: “Yo xo  Yêna xo sexo phetoxô le xo dikoloxa xa meriti.” Na Modimo a ka lebeletšana bjang le tlhohlo ya maemo a fapa-fapanego mola yena a dutše a sa fetoge?

Mohlala wa batswadi bao ba hlokomelago bao ba fetošago dikarolo tša bona ka baka la bana ba bona o bontšha kamoo se se kgonegago. Letšatšing le tee, motswadi e ka ba moapei, mohlwekiši wa ntlo, ra-mohlagase, mooki, mogwera, moeletši, morutiši, molai le tše dingwe tše dintši. Motswadi ga a fetole semelo ge a tšea dikarolo tše; o fo itumelelanya le dinyakwa ge di tšwelela. Selo se swanago ke sa therešo le ka Jehofa eupša ka tekanyo e phagamego kudu. Ga go na mollwane mabapi le seo a ka itirago gore a be sona bakeng sa go phethagatša merero ya gagwe le go hola dibopiwa tša gagwe.—Ba-Roma 11:33.

Ka mohlala, Jehofa o utollwa e le Modimo yo lerato le wa kgaugelo go bobedi Mangwalo a Bakriste a Sehebere le a Segerika. Moporofeta Mika wa lekgolo la seswai la nywaga B.C.E. o ile a botšiša mabapi le Jehofa gore: “Ó kae Modimo a etšaxo Wene Molebalêla-batho-sebe, Mo-feta-dikaroxô tša sethšaba s’axo, O se naxo mangalá a sa felexo, sa xaxo ya ba xo tsefêlwa xe O xauxêla?” (Mika 7:18) Ka mo go swanago, moapostola Johane o ile a ngwala mantšu a tumilego a rego: “Modimo ké Yêna leratô.”—1 Johane 4:8.

Ka lehlakoreng le lengwe, dikarolong ka bobedi tša Beibele, Jehofa o hlaloswa e le Moahlodi wa go loka wa bao leboelela, ka go fetišiša le ka go se itshole ba tshelago melao ya gagwe le go gobatša ba bangwe. Mopsalme o itše: “Ba babe bôná [Jehofa] ó tlo ba fediša.” (Psalme 145:20) Ka mo go swanago, Johane 3:36 e re: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bá a bo bôna; se se tl’o xo dula sè mo okametše ké boxale bya Modimo.”

Wa Dika tše di sa Fetogego

Semelo sa Jehofa le dika tša gagwe tše dikgolo—lerato, bohlale, toka le matla—ga se tša fetoga. O boditše batho ba Isiraele gore: “Ke nna Jehofa ga ke ešo ka fetoga.” (Maleaki 3:6, PK) E be e le nywaga e 3 500 ka morago ga gore Modimo a bope motho. Go hlatsela mantšu a a Modimo, tlhahlobo ya kgaufsi ya Beibele ka moka e utolla Modimo yo a sa fetogego ditekanyetšong le dikeng tša gagwe. Ga se gwa ba le go nolofatšwa ga semelo sa Jehofa Modimo nakong ya makgolo a nywaga, ka ge go nolofatšwa mo go bjalo go be go sa nyakege.

Go tia ga Modimo bakeng sa toka, bjalo ka ge go utolotšwe ka Beibeleng ka moka, lerato la gagwe ga se le legolo goba le lenyenyane go feta kamoo le bego le le ka gona mathomong ditirišanong tša gagwe le batho Edene. Diphapano tša semelo sa gagwe tšeo ka mo go swanago di bontšhitšwego dikarolong tše fapanego tša Beibele ka kgonthe ke ditherešo tše fapanego tša semelo se swanago seo se sa fetogego. Se ke mafelelo a maemo le batho ba fapa-fapanego bao a ilego a dirišana le bona, seo se ilego sa lebiša boemong bjo bo fapanego bja kgopolo goba ditswalanong tšeo di fapa-fapanego.

Go sa dutše go le bjalo, Mangwalo a bontšha gabotse gore semelo sa Modimo ga se sa fetoga go theoša le nywaga-kgolo e bile se ka se fetoge nakong e tlago. Jehofa ke bobedi go se kgaotše le go dumelelana mo go phagamego. Ka dinako tšohle ke yo o ka ithekgago ka yena le go mmota. Re ka ithekga ka yena ka mehla.

[Diswantšho go letlakala 24, 25]

Yena Modimo yo a sentšego Sodoma le Gomora . . . 

. . .o tla tliša lefase le lefsa la go loka