O ka se Nyake go e Foša!

GO FOŠA eng? Kopano ya Selete ya Dihlatse tša Jehofa ya “Badiri ba Lentšu la Modimo”! Lelokelelo le la dikopano tšeo di thomago ka November mo Afrika Borwa, di tla swarelwa ditoropong tše makgolo lefaseng ka moka dikgweding tše mmalwa tše tlago. Mafelong a mantši lenaneo le tla thoma mesong ya Labohlano ka 9:30 ka lenaneo la mmino.

Ka morago ga go bula ka kgothatšo ya go ela hloko seo Lentšu la Modimo le se bolelago, lenaneo la mesong le tla tšwela pele ka dipolelo tše rego, “E-bang ba Phadimago ka Botse bja Jehofa” le “Tšwelang Pele le Tiile Bjalo ka Bao ba Bonago yo a sa Bonwego.” Ka gona, lenaneo la mesong le tla phetha ka polelo ya thwadi e rego, “Reta Jehofa—Modiri wa Dilo tše di Kgahlišago.”

Polelo ya mathomo ya lenaneo la thapama e rego, “Le se ke la Lapa go Dira se se Lokilego,” e tla latelwa ke tšhiedišano ya dikarolo tše tharo mabapi le kamoo o ka kgethago molekane wa lenyalo ka gona, go aga lapa leo le tiilego moyeng le go ruta bana go rata Jehofa. Polelo ya go phetha ya letšatši e rego, “Go Sepedišana le Mokgatlo wa Jehofa,” e tla hlahloba kgolo yeo e tšwelago pele mehleng ya rena ya go kwešiša merero ya Modimo.

Lenaneo la Mokibelo mesong le hlalosa tšhiedišano ya bobedi ya dikarolo tše tharo, yeo e nago le sehlogo se se rego “Badiredi ba Lentšu la Modimo.” Ye e tla nea ditšhišinyo tša kamoo re ka tšwetšago pele modiro wa rena wa go dira barutiwa. Ka morago ga moo go tla ba le polelo e thabišago pelo e rego “Go se Leše Modimo Dihlong.” Ka morago ga moo go tla latela polelo ya kolobetšo, gomme bao ba swanelegago bakeng sa kolobetšo ba tla newa sebaka.

Thapama tšhiedišano ya boraro ya dikarolo tše tharo e tla gatiša sehlogo seo se rego, “Šoma ka Thata go Hlagolela Boemo bja Moya,” mo e lego gore go tla newa gape le ditšhišinyo tšeo di šomago mabapi le kamoo boemo bja moya bo ka hlagolelwago ka gona. Lenaneo le tla phetha ka polelo e neago seetša e rego “Go Sepela Seetšeng se Tšwelago Pele sa Lentšu la Modimo.” E tla ahla-ahla Jesaya dikgaolo 25 le 26 gomme e tla hlalosa kamoo re ka kwešišago gakaone puku ye e kgahlišago ya Beibele.

Sontaga mesong go tla akaretšwa tšhiedišano ya mafelelo ya dikarolo tše tharo e nago le sehlogo seo se rego, “Boporofeta bja Tsefanya bjo bo Nago le se bo se Bolelago Bakeng sa Bao ba Dirago Thato ya Modimo.” E tla hlalosa kamoo boporofeta bjo bo ilego bja šoma ka gona mehleng ya bogologolo setšhabeng sa Juda le kamoo bo šomago ka gona mehleng ya rena, kudu-kudu madumeding a lefase le. Ka moragonyana o tla thabela terama ya moaparo o feletšego e nago le sehlogo seo se rego “Mehlala ya Temošo Bakeng sa Mehla ya Rena,” yeo e hlalosago boitshwaro bjo bobe bja banna ba Isiraele pejana ga ge Isiraele e tsena Lefaseng la Kholofetšo. Polelo ya mafelelo ya kopano mathapameng a Sontaga e tla ba polelo ya phatlalatša e rego, “Lebaka Leo ka Lona o Swanetšego go Šetša Mediro e Kgahlišago ya Modimo.”

Dira dithulaganyo gona bjale gore o be gona matšatšing ka moka a mararo. Bakeng sa go hwetša lefelo leo le lego kgaufsi le legae la gago, ikopanye le Holo ya Mmušo ya Dihlatse tša Jehofa ya lefelong la geno goba o ngwalele bagatiši ba makasine wo.