Go Myemyela—Go go Loketše!

Ka mongwaledi wa Phafoga! kua Japane

GE E ba e le ga kgonthe go dira gore go belaela go timelele. Go tloša kgethollo e kgolo yeo e bilego gona go theoša le nywaga. Go letefatša dipelo tšeo di tiišitšwego ke go se dumele le go se botane. Go tliša khunologo le lethabo go ba bantši. Go re, “Ke a kwešiša. O se ke wa tshwenyega.” Go dira boipiletšo bja gore, “Ke holofela gore re tla ba bagwera.” Ka gona ke eng sedirišwa se se matla? Ke go myemyela. E ka ba go myemyela ga GAGO.

Go myemyela ke eng? Go myemyela ka kakaretšo go hlaloswa ka dipuku-ntšung e le ‘ponagalo ya sefahlego yeo go yona dikhutlo tša molomo di kobegelago godimo ganyenyane, di bontšha go thaba, go amogela goba tlhalalo.’ Mo ke mo go letšego sephiri sa go myemyela go borutho. Go myemyela ke tsela ya motho ya setu ya go hlalosa maikwelo a gagwe goba ya gore motho a bone maikwelo a ba bangwe. Ke therešo gore go myemyela go ka bontšha gape lenyatšo eupša yeo ke taba ye nngwe.

Na go myemyela ka kgonthe go dira phapano? Go ba gona, na o gopola nakong ya ge go myemyela ga motho yo mongwe go ile gwa go tlišetša maikwelo a go lokologa goba go ilego gwa go dira gore o ikwe o iketlile? Goba ge go hlokega ga go myemyela go ilego gwa dira gore o ikwe o tšhogile goba gaešita le go ganwa? Ee, go myemyela go dira phapano. Go kgoma bobedi yo a myemyelago le yo a myemyelelwago. Moanegwa wa Beibele Jobo o ile a bolela ka manaba a gagwe gore: “Xe ba holofoloxile, ke be ke sêxa nabô’, ’me ba se nyatšê xo êʹla xa ’fahloxô sa-ka.” (Jobo 29:24) Go “êʹla” ga sefahlego sa Jobo go ka ba go hlalositše go taga ga gagwe goba lethabo.

Mokgwa o nepagetšego wa go myemyela e sa dutše e le wa therešo go fihla le lehono. Go myemyela go borutho go ka thuša go lokolla dikgateletšego tšeo di agegago. Go ka ipontšha e le mojako bakeng sa matla goba maikwelo a gateletšegilego maemong ao a tletšego dikgateletšo tša maikwelo goba tša leago. Ge e ba re ikwa re gateletšegile goba re gakanegile, go myemyela go ka re thuša go lokolla kgateletšego yeo le go lebeletšana le go gakanega ga rena. Ka mohlala, Tomoko gantši o be a bona ba bangwe ba mo lebeletše. O be a nagana gore ba be ba mo lebeletše ka go mo sola, ka ge ba be ba tloša mahlo a bona kapejana ge ba bona gore o ba lemogile. Tomoko o ile a ikwa a le noši e bile a sa thaba. Ka letšatši le lengwe mogwera o ile a šišinya gore a myemyelele batho ge a kopana le bona ka mahlo. Tomoko o ile a leka seo ka dibeke tše pedi gomme a tlabja ke  gore yo mongwe le yo mongwe o be a mo myemyelela! Kgateletšego e be e ile. O re: “Bophelo ruri bo fetogile bjo bo thabišago.” Ee, go myemyela go re dira gore re ikwe re iketlile ge re na le ba bangwe le gona go re thuša gore re be le bogwera ka mo go oketšegilego.

Mafelelo a Mabotse go Wena le go ba Bangwe

Go myemyela go ka kgoma motho maikwelong. Go thuša motho gore a be le pono e nepagetšego. Go lokile gape bakeng sa go phela gabotse mmeleng. Go na le polelwana e rego: “Lesego ke sehlare se sebotse.” Ge e le gabotse, balaodi ba tša kalafo ba lemogile gore pono ya motho ya monagano e sepedišana kudu le boemo bja motho bja mmele. Dinyakišišo tše dintši di bontšha gore kgateletšego ya nako e telele, maikwelo a fošagetšego le tše swanago le tšeo di fokodiša tshepedišo ya go lwantšha malwetši. Ka lehlakoreng le lengwe, go myemyela go re dira gore re thabe, le gona lesego le tiiša tshepedišo ya rena ya go lwantšha malwetši.

Go myemyela go na le mafelelo a magolo go ba bangwe. Nagana ka boemo bjo go bjona o amogelago tayo goba o lemošwago. Ke ponagalo efe ya sefahlego yeo o ka ratago go e bona go monei wa tayo? Ponagalo e tonyago goba e tiilego e ka bontšha pefelo, go selekega, go lahla goba gaešita le lehloyo. Ka lehlakoreng le lengwe, na go myemyela ga monei wa tayo go borutho mohlomongwe go ka se go dire gore o ikwe o lokologile goba gaešita le go theetša tayo? Ka kgonthe, go myemyela go thuša go theoša go se kwešišane maemong a gateletšago.

Dikgopolo tše Nepagetšego di Dira Gore go Myemyela go be Bonolo

Ke therešo gore bontši bja rena ga re swane le dibapadi tša ditsebi tše di bontšhago go myemyela mo go kgahlišago nakong e nngwe le e nngwe yeo di e neilwego; goba ga re dume go ba bjalo. Re nyaka gore go myemyela ga rena e be gatlhago le ga kgonthe. Mohlahli wa sekolo wa tša poledišano o ile a hlalosa gore: ‘Ke gabohlokwa go iketla le go myemyela go tšwa pelong, go sego bjalo go myemyela ga gago go tla bonala e le ga go itiriša.’ Re ka myemyela bjang e le ka kgonthe go tšwa dipelong? Mo Beibele e ka re thuša. Mabapi le polelo ya rena go Mateo 12:34, 35 e re botša gore: “Xobane molomo o bolêla tše pelo e di falatšaxo. Motho yo botse ó nthša tše botse lehumong le le botse la pelo; motho e mobe ó nthša tše mpe lehumong le lebe.”

Gopola gore go myemyela ke tsela ya setu ya go bolela maikwelo a rena. Ge re gopola gore re bolela “tše pelo e di falatšaxo” le gore “tše botse” di tšwa “lehumong le le botse,” seo se hlatsela gore senotlelo sa go myemyela ga kgonthe se ithekgile megopolong le maikwelong a rena. Ee, seo se lego ka pelong tša rena ka ntle le pelaelo go se go ye kae se tla hlaloswa, e sego feela ka mantšu a rena le ditiro eupša gape le ka ponagalo ya rena ya sefahlego. Ka gona, re swanetše go tšwela pele re šomela go dula dikgopolong  tše nepagetšego. Ponagalo ya rena ya sefahlego e kgongwa ka matla ke dikgopolo tša rena ka ba bangwe. Ka gona a re lebišeng tlhokomelo dikeng tše botse tša ditho tša lapa, batho bao e lego baagišani ba rena le bagwera ba rena ba babotse. Re tla hwetša go le bonolo kudu go ba myemyelela. E tla ba go myemyela ga kgonthe ka gobane go tla be go hlohleletšwa ke pelo yeo e tletšego go loka, kgaugelo le botho. Mahlo a rena a tla taga, le gona ba bangwe ba tla tseba gore ke ga kgonthe.

Lega go le bjalo, re swanetše go lemoga gore ka baka la setlogo sa bona goba tikologo, batho ba bangwe ba hwetša go le thata kudu go myemyela go feta ba bangwe. Gaešita le ge ba kgahlegela baagišani ba bona, ga se ba tlwaela go ba myemyelela. Ka mohlala, banna ba ma-Japane go letetšwe gore ba boloke boiketlo bja bona bjo bo phethagetšego le go dula ba homotše ka dinako tšohle. Ka gona, bontši bja bona ga se ba tlwaela go myemyela go bao ba lebelelwago e le bao ba sa ba tsebego. Selo se swanago e ka ba e le sa therešo ka ditšo tše dingwe. Goba batho ba bangwe ba ka fo ba ba na le dihlong ka tlhago gomme ba ka no hwetša go se bonolo go myemyelela ba bangwe. Lega go le bjalo, ga se ra swanela go ahlola ba bangwe go ya ka mo go myemyela ga bona go lego go gogolo ka gona goba makga ao ba myemyelago ka wona. Batho ke ba fapa-fapanego, gomme go bjalo le ka dimelo tša bona le ditsela tša bona tša go boledišana le ba bangwe.

Lega go le bjalo, ge e ba o hwetša e le tlhohlo go myemyelela ba bangwe, ke ka baka la’ng o sa leke go šomela go seo? Beibele e eletša ka gore: “A re se kê ra lapa xo dira botse . . . A re direng botse; re bo dirêlê batho bohle.” (Ba-Galatia 6:9, 10) Tsela e nngwe ya go dira “botse” go ba bangwe ke go ba myemyelela—gomme se se ithekgile ka boiteko bja gago! Ka gona tšea mogato wa pele wa go dumediša ba bangwe le go nea mantšu a kgothatšo ka go myemyela. Go tla lebogwa kudu. Gape, o tla lemoga gore go myemyela go ba bonolo kudu ge o dutše o hlagolela mokgwa wo.

[Lepokisi go letlakala 30]

Lentšu la Temošo

Ke taba e nyamišago gore ga se go myemyela ka moka mo re go bonago mo e lego ga kgonthe. Baradia ba hula barekiši, e bile ba bangwe ba bontšha go myemyela mo go tanyago. Ba a tseba gore go myemyela go ka rola motho dibetša gomme gwa mo dira gore a se šetše. Batho bao ba nago le boitshwaro bjo bo belaetšago goba maikemišetšo a sa hlwekago ba ka myemyela ka tsela e goketšago. Lega go le bjalo, go myemyela ga bona ke ga lefeela; ga bofora. (Mmoledi 7:6) Ka gona ge re dutše re sa gononele ba bangwe ka mo go feteletšego, re swanetše go thabela gore go phela “mehleng ya bofelo” yeo go lego thata go lebeletšana le yona, re ipontšha ‘re hlalefile wa dinoga, le ba bomenetša bjalo ka maeba,’ go etša ge Jesu ka noši a laetše.—2 Timotheo 3:1; Mateo 10:16.

[Seswantšho go letlakala 31]

Tšea mogato wa pele wa go dumediša ba bangwe ka go myemyela