Pono ya Beibele

Modiredi ke Mang?

BOŠEGONG bja lehu la Jesu la sehlabelo, bagwera ba gagwe ba kgaufsi ba ile ba ba le ngangišano e šoro. Go ya ka Luka 22:24, gona moo “xwa tsoxa kxang mo xare xa bôná, ya xo re e a swanetšwexo ke xo ba yo moxolo xo bôná ké mang.” Le e be e se lekga la mathomo mo go ilego gwa tsoga ngangišano e bjalo magareng ga baapostola ba Jesu. Go bonyenyane ditiragalong tše pedi tšeo di fetilego, Jesu o ile a swanela ke go phošolla go nagana ga bona.

Ke mo go nyamišago gakaakang gore bošegong bjo bjo bohlokwa, Jesu o ile a ikhwetša a swanetše go ba gopotša gape seo modiredi wa Mokriste a swanetšego go ba sona e le ka kgonthe. O itše: “E moxolo mo xo lena a a kê e monyenyane; e a bušaxo a a kê mohlankedi.”—Luka 22:26.

Ga se gwa swanela go re makatša gore baapostola ba be ba na le kakanyo e fošagetšego mabapi le bohlokwa bja maemo le bophagamo. Pele ga Jesu, mohlala wa bona o mogolo tabeng ya boetapele bja bodumedi o be o neilwe ke ba-mangwalo le Bafarisei. Go e na le go nea batho tlhahlo ya moya le taelo, badiredi ba ba maaka ba ile ba amogela meetlo le melao yeo e ‘kgonyelago batho mmušo wa magodimo.’ E be e le ba sekametšego maemong, ba nyakago botumo le baikgantšhi bao ba dirilego mediro ya bona “ba e dirêla xo bônwa ke batho.”—Mateo 23:4, 5, 13.

Mohuta o Mofsa wa Modiredi

Lega go le bjalo, Jesu o ile a tliša kgopolo e mpsha ya bodiredi bja moya go barutiwa ba gagwe. O rutile gore: “Lena Le se kê la dumêla leo la Rabi, xobane wa lena Moruti ké o tee, ké Kriste; ’me lena ka moka Le bana ba o tee. Le se kê la bitša wa mo lefaseng la re: Tata-wešo! Xobane Tata-weno ké o tee wa maxodimong . . . E moxolo mo xo lena a e bê mo-Le-diredi.” (Mateo 23:8-11) Barutiwa ba Jesu ba be ba sa swanela go ekiša baetapele ba bodumedi ba mehleng ya bona. Ge ba be ba nyaka go ba badiredi ba kgonthe, ba be ba swanetše go ekiša Jesu. O tlogetše mohlala wa mohuta ofe?

Beibele gantši e diriša lentšu la Segerika di·aʹko·nos bakeng sa “modiredi.” The Encyclopedia of Religion e hlalosa gore lentšu le le emela “e sego maemo eupša tswalano ya go direla ya modiredi go yo a direlwago: a latela mohlala wa Kriste . . . e pelong ya Mokriste ya kwešišo ya bodiredi.”

Ka go dumelelana le tlhaloso e swanetšego ya lentšu “modiredi,” Jesu o ile a ineela ka mo go feletšego go ba bangwe. Ka go se fele pelo o hlalositše gore: “Morwa-motho e a sa kaxo a tlela xo dirêlwa, à tlile xo dirêla, le xo neêla bophelô bya xaxwe xore e bê topollô ya ba bantši.” (Mateo 20:28) Jesu ka go hloka boithati o ile a diriša nako ya gagwe, matla le bokgoni bja gagwe bakeng sa go thuša ba bangwe nameng le moyeng. Ka baka la’ng? Ka gobane o be a kwela mašaba ao a bego a tlaišwa moyeng bohloko ao a bego a tlile go tlo mmona. O be a nyaka go thuša. Go fana ka lerato ke sona seo se hlohleleditšego bodiredi bja gagwe, le gona o be a nyaka gore barutiwa ba gagwe ba bontšhe boemo bjo bo swanago bja kgopolo bja go nea.—Mateo 9:36.

Tseleng ya gagwe ka moka ya bophelo, Jesu o ile a bea mohlala bakeng sa badiredi ba nakong  e tlago. O itše: “Punô ké e ntši; ’me badiri xa ba nene. Ké xôna kxopêlang Mong wa punô a romêlê badiri punong ya xaxwe.” (Mateo 9:37, 38) Ee, badiredi ba Kriste e be e swanetše go ba badiri modirong o mogolo kudu wo lefase le sa kago la o bona—ba nea batho bohle khomotšo ya moya ka go bolela le go ruta ditaba tše dibotse tša Mmušo wa Modimo.—Mateo 28:19, 20.

Tlhokomelo ye ya go nea le go hlokomela dinyakwa tša ba bangwe ke yona yeo e dirilego gore mokgwa wa Kriste wa go direla e be o fapanego e le ka kgonthe. O rutile badiredi ba gagwe go ba diroto, barei ba dihlapi ba moya le badiši, e sego go ba badumedi ba diphiri le dirutegi tša diaparo le maswao tše kgethegilego.—Mateo 4:19; 23:5; Johane 21:15-17.

Pono ya Beibele

Ka manyami, nywaga-kgolong e fetilego kgopolo ye e phagamego, e se nago boithati ya badiredi bjalo ka baboledi bao ba ineetšego le barutiši e ile ya kgopamišwa. Seo se thomilego e le bodiredi bja Bokriste se ile sa fetoga go ba mokgatlo o tlwaetšwego wa boruti. Go ile gwa hlongwa ditaelo le dihlopha tša baruti e bile di be di newa botumo le matla gomme gantši di kgobelelwa mahumo a mantši. Se se ile sa hlola dikarogano. Sehlopha sa baruti seo se ilego sa tšweletša se, se be se ineetše kudu go direleng ditirelo tša bodumedi le dikeletšong tše kgopamilego. Bokriste bja lekgolong la pele la nywaga bo ile bja fetoga ge nywaga-kgolo e dutše e e-ya go tloga bodumeding bjo mafolofolo moo mang le mang e bego e le modiredi go ya go motho yo a sa rego selo moo e bego e le ba mmalwa feela bao ba bego ba tlwaeditšwe ka mo go kgethegilego le bao ba kgethilwego bao ba bego ba ka bolela le go ruta.

Lega go le bjalo, Beibele e hlalosa modiredi wa Mokriste, e sego ka maemo a mo hlaolago, yo a tšeelwago godimo, mogolo goba molaedi wa mmušo eupša ka modiro wa gagwe o se nago boithati. Moapostola Paulo o ile a bontšha boemo bja kgopolo bjo badiredi ba Bakriste ba swanetšego go bo bontšha. O ile a ba kgothaletša gore ‘ba se ke ba dira selo ka go nyaka go retwa, sa bona e be go ipoetša.’—Ba-Filipi 2:3.

Ge e le gabotse Paulo o ile a dira seo a bego a se bolela. A latela kgaufsi mohlala wa Kriste ga se a nyaka ‘sa go ikhola, eupša a nyaka se se holago ba bantši gore ba phologe.’ O ile a kwešiša e bile ka mo go tseneletšego a kwa boikarabelo bja gagwe bja go “bolêla Ebangedi ya Kriste è sa rêkwe” bjalo ka ge a itše, “ke xe ke dira kè sa ikhole ka yôna Ebangedi.” O be a sa “nyake xo xodišwa ke batho.”—1 Ba-Korinthe 9:16-18; 10:33; 1 Ba-Thesalonika 2:6.

A mohlala o mobotse gakaakang bakeng sa modiredi wa kgonthe wa Mokriste! Bao ba ekišago mohlala wa gagwe o mobotse kudu gomme ba sepela tseleng e se nago boithati yeo e beilwego ke Jesu Kriste, ba ineela ka bolokologi bakeng sa go nea thušo ya moya le khomotšo ya ditaba tše dibotse go ba bangwe, ba ipontšha e le badiredi ba kgonthe ba Modimo.—1 Petro 2:21.