Na ke Swanetše go Dula Nageng e Šele?
Bafsa ba a Botšiša . . .
Na ke Swanetše go Dula Nageng e Šele?
“Ke be ke nyaka go dula lefelong le lengwe.”—Sam.
“Ke be ke nyaka feela go fo tseba. Ke be ke nyaka go bona selo se sengwe se sefsa.”—Maren.
“Mogwera wa kgaufsi o mpoditše gore go tloga ka gae lebakanyana go tla nkhola.”—Andreas.
“Ke be ke fagahletše go lekela hlogong.”—Hagen.
NA O ke o lore ka go dula nageng e šele—mohlomongwe lebakanyana feela? Ngwaga o mongwe le o mongwe, dikete tša bafsa di kgona go dira seo. Andreas ge a bolela mabapi le phihlelo ya gagwe nageng e šele o re: “Nka rata go go dira gape.”
Bafsa ba bangwe ba huduga ka lebakanyana ka gobane ba nyaka go hwetša tšhelete goba go ithuta leleme le šele. Ka mohlala, dinageng tše dintši mananeo a go ba mohlokomedi gomme o hwetše le sebaka sa go ithuta leleme la ka mo lapeng a tumile kudu. Se se dumelela bašele ba bafsa go dira modiro wa ka gae bakeng sa lapa bakeng sa go hwetša madulo le dijo, gomme ba kgona go diriša nako ya bona ya go se dire selo bakeng sa go ithuta leleme la lefelong leo. Gape go na le bafsa bao ba hudugelago nageng e šele bakeng sa go hwetša thuto. Ba bangwe ba huduga bakeng sa go hwetša mošomo e le gore ba kgone go thuša malapa a gabo bona ka tša ditšhelete. Go sa dutše go le bjalo ba bangwe ba a huduga ka gobane ga ba kgonthišege ka seo ba nyakago go se dira ka morago ga go fetša sekolo gomme ba nyaka go intšha ka go ya nageng e šele.
Ka mo go kgahlišago, bafsa ba bangwe ba Bakriste ba hudugetše dinageng tšeo go nago le tlhokego ya baebangedi, bakeng sa go katološa bodiredi bja bona. Go sa šetšwe lebaka le ge e le lefe la go huduga, go dula nageng e šele e ka ba thuto ya bohlokwa bakeng sa go se ithekge ka batho ba bagolo. Go ka katološa matla a gago a go nagana go tša setšo. O ka ba wa kgona le leleme le šele—selo se sengwe seo se ka oketšago kgonagalo ya go hwetša mošomo.
Lega go le bjalo, go dula nageng e šele ga se ka mehla e lego phihlelo e thabišago. Ka mohlala, Susanne o ile a fetša ngwaga e le morutwana yo a tšerego sekgoba sa yo mongwe nageng e šele. O re: “Ke be ke kgonthišegile gore e be e tla ba mo go kgahlišago go tloga mathomong go fihla mafelelong. Go be go se bjalo.” Bafsa ba bangwe ba ile ba swarwa gampe goba ba ile ba ba le mathata a magolo. Ka gona pele o phutha seo e lego sa gago, e tla ba gabohlale gore o dule fase gomme o hlahlobe mehola le mathata.
Hlahloba Maikemišetšo a Gago
Go hlahloba mehola le mathata ge e le gabotse go tla akaretša go hlahloba maikemišetšo a gago a go nyaka go ya nageng e šele. Ke selo setee go sepela bakeng sa go tšwetša pele dikgahlego tša moya goba go hlokomela boikarabelo bja lapa. Eupša go swana le bafsa bao ba tsopotšwego mathomong, ba bantši ba kganyoga go huduga feela ka gobane ba nyaka go lekela hlogong, tokologo e oketšegilego, goba boipshino. Ga se gore seo se fošagetše Mmoledi 11:9 e kgothaletša bafsa go ‘ithabela bofseng bja bona.’ Lega go le bjalo, temana ya 10 Mmo 11:10 e lemoša ka gore: “Se hlohlê pelo ya xaxo, ’me mmele wa xaxo O o sexêlê bošula.”
e le ka kgonthe. Go feta mooGe e ba maikemišetšo a gago a go ya nageng e šele e le go phema dithibelo tša batswadi, o ka no ba o ipiletša “masetla-pelo.” Na o gopola seswantšho sa Jesu sa morwa wa lehlaswa? Se be se akaretša monna yo mofsa yo ka boithati a ilego a ya nageng e šele, ka ntle le pelaelo bakeng sa go hwetša tokologo e oketšegilego. Lega go le bjalo, go se go ya kae, go ile gwa ba le masetla-pelo, gomme o ile a ikhwetša a swerwe ke tlala, a diila e bile a babja moyeng.—Luka 15:11-16.
Gape go na le bao ba nyakago go huduga ka gobane ba nyaka go phema mathata ka gae. Eupša, bjalo ka ge Heike Berg a ngwala pukung ya gagwe ya What’s Up, “ge e ba o nyaka go tloga feela ka gobane o sa thaba . . . e bile o dumela gore dilo ka moka di tla ba kaone lefelong le lengwe—o a iphora!” Ka kgonthe, go kaone go lebeletšana le mathata ka go lebanya. Ga go hole selo go tšhabela maemo ao re sa a ratego.
Maikemišetšo a mangwe a kotsi ke megabaru le dilo tšeo di bonagalago. Ba hlohleletšwa ke kganyogo ya lehumo, bafsa ba bantši ba hlagolela dikgopolo tša boikgantšho le tšeo e sego tša kgonthe tša seo bophelo bo lego sona dinageng tša diintaseteri. Ba bangwe ba nagana gore batho ka moka ba Bodikela ba humile. Eupša se ga se therešo le gatee. Ka morago ga go huduga, bafsa ba bantši ba ikhwetša ba le nageng yeo ba sa e tsebego, ba lwantšhana le go tšwa bodiiding. * Beibele e lemoša ka gore: “Xobane mexabaru ké wôna modu wa bobe ka moka; xomme ba bangwê ba xo kêkêla xo tšôna ba aroxile tumêlô ba ikôbêla mehlakô e mentši.”—1 Timotheo 6:10.
Na o go Loketše?
Go na le lebaka le lengwe leo o swanetšego go le ela hloko: Na o godile ka mo go lekanego e le ka kgonthe go ka lebeletšana le mathata le dithulano tšeo di ka rotogago nageng e šele? Mohlomongwe o tla swanelwa ke go dula le motho yo mongwe phapošing e tee goba le lapa gomme o itumelelanye le mekgwa ya lona. Ka gona o dira bjang tabeng ya go dirišana le lapa la geno gona bjale? Na batswadi ba gago ba belaela ka gore ga o ele hloko le go ba le boithati? Na o tle o kgethe dilo tšeo o di jago? Na o ikemišeditše go fihla bokgoleng bofe go dira kabelo ya gago medirong ya ka ntlong? Ge e ba tše e le dilo tšeo di lego thata go wena gona bjale, nagana gore di tla ba thata gakaakang go wena nageng e šele!
Ge e ba o le Mokriste, na o tla kgona go boloka boemo bja gago bja moya? Goba na batswadi ba gago ka mehla ba swanetše go go gopotša go se lebale thuto ya Beibele, diboka tša Bokriste le modiro wa boboledi? Na o tla ba yo a tiilego moyeng ka mo go lekanego go ka lwantšhana le dikgateletšo le mapheko nageng e šele tšeo mohlomongwe o ka se lebeletšanego le tšona nageng ya geno? Mofsa yo mongwe wa Mokriste, letšatšing la gagwe la pele sekolong nageng e šele, morutwana yo a tšerego sekgoba sa yo mongwe, o ile a botšwa mo a ka hwetšago dihlare-tagi tšeo di sego molaong. Ka moragonyana ngwanenyana yo a tsenago le yena sekolo o ile a mo kgopela go beana mabaka le yena. Nageng ya gabo, le ka mohla ngwanenyana a ka se bontšhe kgahlego ya gagwe ka mo go lebanyago ka tsela ye. Mofsa wa mo-Afrika yo a ilego a hudugela Yuropa le yena o bolela gore: “Gae ga o ke o bona diswantšho tša boitshwaro bjo bo gobogilego phatlalatša. Eupša mo o di bona gohle.” Go hudugela 1 Petro 5:9.
nageng e šele go ka lebiša go go hwa moyeng ge e ba motho a sa ‘tia tumelong.’—Hwetša Ditherešo!
Pele ga ge o ka tšea mogato, o swanetše go hwetša ditherešo ka moka. O se ke wa ithekga ka ditaba tša mabare-bare. Ka mohlala, ge e ba o nagana ka lenaneo la go ba morutwana wa go tšea sekgoba sa yo mongwe, na go tla go bitša bokae? O tla makala go tseba gore gantši go akaretša dikete tša diranta. Gape o swanetše go tseba ge e ba thuto yeo o tla e hwetšago nageng e šele e tla ba e tsebjago gae. Gape, kgoboketša tsebišo e ntši ka mo o ka kgonago mabapi le naga yeo—melao ya yona, setšo sa yona le ditlwaelo tša yona. Ke ditshenyagalelo dife tšeo di akaretšwago ge o dula moo? Ke lekgetho lefe leo o tla swanelwago ke go le lefa? Na go na le dikotsi tša maphelo tšeo o swanetšego go di ela hloko? O tla hwetša e le mo go holago go bolela le batho bao ge e le gabotse ba ilego ba dula moo.
Ke moka go na le taba ya mafelo a marobalo. Batswadi bao go dulwago le bona ba morutwana wa go tšea sekgoba sa yo mongwe gantši ga ba letele tefo le ge e le efe ya dilo tše di bonagalago. Lega go le bjalo, go dula le batho bao ba sa hlomphego ditekanyetšo tša Beibele go ka baka dikgateletšego tše dikgolo le go goga boima. Go dula le bagwera goba meloko e ka ba selo se sengwe. Eupša hlokomela gore o se ke wa fetoga morwalo go bona—gaešita le ge ba go kgothaletša go dula. Se se ka imela goba gaešita le go senya tswalano ya gago le bona.—Diema 25:17.
Ge o beakanya go hwetša tšhelete ge o dutše o le nageng e šele, o se ke wa lebala tshwanelo ya gago ya Bokriste ya go theetša babuši ba lefase. (Ba-Roma 13:1-7) Na molao o a go dumelela go šoma nageng yeo? Ge e ba go le bjalo, ka tlase ga maemo afe? Ge e ba o šoma ka tsela yeo e sego molaong o tla bea boemo bja gago kotsing bjalo ka Mokriste yo a botegago gomme gwa go tlogela o se na ditšhireletšego tša motheo, tše bjalo ka phemelo ya kotsi. Gaešita le ge go le molaong go šoma, o tla swanelwa ke go bontšha kelohloko le bohlale. (Diema 14:15) Bathwadi bao ba sa botegego gantši ba ikhola ka bašele.
Go Dira Phetho
Ka gona, go molaleng gore phetho ya go hudugela nageng e šele ke e kgolo—le gona ga se ya swanelwa go tšewa ga bohwefo. Dula fase le batswadi ba gago, gomme ka kelohloko le lekodišiše mehola yeo e letetšwego le dikotsi tšeo di ka kgonegago. Leka gore o se ke wa dumelela mafolofolo a gago a laola temogo ya gago. Botega ge o hlahloba maikemišetšo a gago. Theetša batswadi ba gago ka kelohloko. Go ba gona, ba sa dutše ba tla ikwa ba na le boikarabelo bakeng sa gago, gaešita le ge o le kgole le bona ka dikhilomithara tše makgolo. Mohlomongwe o tla nyaka thekgo ya bona ya tša ditšhelete bakeng sa gore o phele.
Ka morago ga go ela hloko dilo ka moka, e ka ba e le gore go huduga ga se gabohlale—bonyenyane bakeng sa nako e nyenyane. Se e ka ba seo se nyamišago, eupša go na le dilo tše dingwe tše dintši tšeo o ka di dirago. Ka mohlala, na o kile wa utolla kgonagalo ya go etela mafelo a mangwe a kgahlišago nageng ya geno? Goba ke ka baka la’ng o sa thome go ithuta leleme le šele? Ge nako e dutše e e-ya, mohlomongwe sebaka sa go ya nageng e šele se tla bulega.
Ka gona, go thwe’ng ge e ba o dira phetho ya gore o huduge? Sehlogo sa nakong e tlago se tla hlalosa kamoo o ka atlegago ka go dula nageng e šele.
[Mongwalo wa ka tlase]
^ ser. 15 Bona sehlogo seo se rego “Go Bala Ditshenyagalelo tša go Khudugela Nageng e Humilego,” tokollong ya Morokami wa April 1, 1991, o gatišitšwego ke Watch Tower Bible and Tract Society of Pennsylvania.
[Seswantšho go letlakala 27]
Bafsa ba bangwe ba huduga bakeng sa go tšwetša pele modiro wa boboledi wa Mmušo
[Seswantšho go letlakala 28]
Bolela le batswadi ba gago mabapi le mehola le dikotsi tša go huduga