Emperor e Makatšago

PENGUIN e kgolo go di feta ka moka, yeo e lego emperor ya botelele bjo bo fetago mithara e bile e imela go fihla go dikhilograma tše 40. Ge di-penguin tše dingwe di leba leboa bakeng sa go phologa marega a sehlogo le a leswiswi a Antarctica, di-emperor di leba borwa—bakeng sa Antarctica! Ka baka la’ng? Ka mo go makatšago, bakeng sa go ba le bana.

Ge emperor ya tshadi e beela mae a yona, ya tona kapejana e a tloša mo lehlweng gomme ya a bea mo maotong a yona. Ka morago e a tsenya ka tlase ga morabana wa yona wa mafotwane—letlalo le phuthegilego ka tlase ga mpa ya yona. Gomme ya tshadi e leba lewatleng moo go lego bonolo go sepela le go hwetša dijo. Lebaka la matšatši a 65, nakong ya boemo bjo šoro bja leratadima, ya tona e alamela mae ge e dutše e boloka makhura a yona a mmele. Bakeng sa go boloka borutho bja mmele di dutše di aparetšwe ke moya wa go tonya wa kapoko wo o sepelago dikhilomithara tše 200 ka iri, dinonyana tše tše bohlale di kgobokana gotee ka dihlopha tše dikgolo, e nngwe le e nngwe e šiedišana ka karolo ya yona ka ntle, ka mokokotlo wa yona o lebile moyeng.

Ka nako e lebanego ka mo go makatšago, lee le phaphaša ge ya tshadi e thoma go fihla. Eupša e hwetša bjang molekane wa yona gare ga dikete-kete tšeo di swanago? Ka molodi. Nakong ya mathomo a lefereyo la tšona, bobedi bjo bo ile bja leletšana molodi gomme bja boloka karabelo ya e nngwe mogopolong. Ge tša ditshadi di boa, tša ditona le tša ditshadi di letša ka go tšwa dipelong. Batho ba tla hlaka-hlakanywa ke lešata, eupša di-emperor kapejana di hwetša balekane ba tšona. Ka gona, ka morago ga go iša lefotwane leo le sa tšwago go phaphašwa, ya tona ye e swerwego ke tlala e a sepela, dimpa di sesa go kgabaganya dikhilomithara tše 70 tša lehlwa bakeng sa lesolo la yona la go hwetša meetse le dijo moo di hwetšagalago gabonolo.

[Mothopo wa Seswantšho go letlakala 31]

By courtesy of John R. Peiniger