Go Diriša Thelebišene ka Kelohloko

PEGO yeo e hlamilwego ke sehlopha sa babogedi ba go lekodišiša ditaba kua United States ya Not in the Public Interest—Local TV News in America e bolela gore, thelebišene e šoma bjalo ka “moanegi yo mogolo wa dikanegelo, mohlokomedi wa bana le motutuetši wa batho ka kakaretšo. TV e gona go re dikologa . . . E moyeng go swana le muši wo o tšwago mothong yo mongwe.” E bile go fo swana le ge go hema muši wo o tšwago mothong yo mongwe go le kotsi, ka gona go monya mananeo a TV lebaka la diiri tše ntši ka ntle le go kgetha go na le mafelelo a gobatšago—kudu-kudu go bana.

Ge e bolela ka bosenyi le bošoro thelebišeneng, pego e swanago e bolela gore “dinyakišišo tše dintši tše makgolo di bontšhitše gore go lebelela diswantšho tša bošoro go tutuetša ka mo go fošagetšego go ithuta ga bana, bošoro le go ipea maemong a ba bangwe.” Mokgatlo wa tša Kalafo wa Amerika o boletše ka 1992 gore “bošoro bja thelebišene ke selo se kotsi seo se tšhošetšago maphelo a bafsa.”

O ka laola bjang tutuetšo e fošagetšego ya mananeo a TV baneng ba gago? Pego e lokeleditše ditšhišinyo tše dingwe tšeo di tlwaelegilego go tšwa go dikgothatšo tša mekgatlo e sego kae ya tša maphelo ya setšhaba mabapi le ka mo go ka dirišwago thelebišene ka kelohloko kudu. Ditšhišinyo tše dingwe tša tšeo di akaretša tše di latelago.

▪ Rulaganya le go lekanyetša go lebelela ga gago TV. Bea mellwane mabapi le nako yeo bana ba ka e bogelago. O se ke wa bea TV ka diphapošing tša bana.

▪ Bea seswantšho sa mmapa wa lefase kgaufsi le TV e le gore bana ba ka kgona go lebelela mafelo ao ba a bonago mananeong.

▪ Bogela thelebišene le bana ba gago bakeng sa gore o ka hlalosa dilo tše bjalo ka phapano magareng ga boikgopolelo le dilo tša kgonthe. Bana ba bantši ba ka tlase ga nywaga e lesome ga se gantši ba tsebago phapano.

▪ Tloša thelebišene lefelong leo le tlwaelegilego legaeng la gago. Bea TV ka gare ga raka yeo e nago le mejako. Go tla dira gore go be thata go e bula le go fetoša diteišene.