Go Godiša Bana Bao ba Tsepamišitšwego Gabotse—Bjang?

Pego yeo e lego kuranteng ya The Gazette kua Montreal, Canada e re: “Bana ba ithuta go itlhompha le go itshwara ka go amogela bobedi lerato le tayo tšeo di tšwago go batswadi.” Na se se akaretša’ng? Go ya ka setsebi sa tša monagano sa kua Montreal Constance Lalinec, ke gabohlokwa go bea ditekanyetšo tše kwalago boitshwarong bja ngwana.

Lalinec yo a šomago le bana le malapa, o ngwala gape gore “ge e ba re šireletša bana go lebeletšana le ditla-morago tša ditiro tša bona, re ba thibela gape go ithuta ga bona mo gogolo.” Go tlogelela dilo go ka kgoma gabohloko tšwelopele ya ngwana.

Keletšo e bohlale mabapi le go godiša ngwana yeo e hlatsetšwego lebaka le letelele yeo e tšwago Beibeleng e swanelega kudu. E re: “Mo xo ya lena polêlô ‘E’ e bê ‘E’, ‘Aowa’ e bê ‘Aowa’.” (Mateo 5:37, mongwalo o sekamego ke wa rena.) Ge feela melao e leka-lekanego e theilwe e bile bana ba gago ba e kwešiša, e kgonthišetše gantši le gona ka mehla. Thekga mantšu a gago ka tiro e atlegago. Se se romela molaetša o kwalago go bana mabapi le melao ya batswadi le ditebelelo—gore batho ba ‘tla buna seo ba se bjalago.’ (Ba-Galatia 6:7; Ba-Roma 2:6) Maikemišetšo ao a kganyogwago a lerato le tayo e atlegago ke tša bakeng sa gore bana ba ithute go latela melao le go kgotlelela kgateletšego le kgotsofalo yeo e diegago e le gore ba ka tšweletša dika tšeo ba di nyakago bakeng sa go gola e le batho ba bagolo bao ba tsepamišitšwego gabotse le ba ikarabelago.

Keletšo e oketšegilego mabapi le seo Modimo a se botšago batswadi mabapi le go laya bana ba bona ka lerato e hwetšagala pukung ya Sephiri sa Lethabo la Lapa. O ka hwetša kopi ya puku ye ya matlakala a 192 ka go tlatša le go romela setlankana seo se sepelago le sehlogo se atereseng e bontšhitšwego setlankaneng goba atereseng e swanetšego e lokeleditšwego go letlakala 5 la makasine wo.

□ Nthomeleng kopi ya puku ya Sephiri sa Lethabo la Lapa.

Bontšha gore ka leleme lefe

□ Hle ikopanyeng le nna mabapi le thuto e sa lefelelwego ya legae ya Beibele.