Ke ka Baka La’ng go Kgahlegela go Dirišana le Meoya go Phatlaletše Gakaakaa?

Go dirišana le meoya go hlalositšwe e le “tumelo ya gore karolo ya moya ya batho e phologa lehu la mmele wa nama gomme e ka kgona go boledišana le ba ba phelago, gantši ka motho yo a dirago e le senoge.”

KA 1998 puku yeo e hlalosago kamoo o ka ikopanyago ka gona le bahu e ile ya ba e tumilego kudu kua United States mo e lego gore kapejana e ile ya fihlelela maemo a godimo a lelokelelo la New York Times la dipuku tšeo di rekišwago kudu.

Nywaga e sego kae e fetilego kua Moscow, didupe le diboka tša go dirišana le meoya di ile tša ba le phenkgišano le bo-radipolitiki gotee le bo-rakgwebo bao ba ilego ba lefa ditefo tše phagamego bakeng sa go hlahlobja.

Brazil, diswantšhetšo-dikgao tša thelebišene tšeo di bontšhago go dirišana le meoya di tanya palo e kgolo ya babogedi.

Bakeng sa batho ba bantši bao ba dulago Afrika le Asia, go dirišana le meoya ke selo seo se tlwaelegilego go fo swana le go bapatša mmarakeng.

Lebaka Leo ka Lona ba Bantši Gakaakaa ba Fetogelago go Dirišaneng le Meoya

Ba bantši ba fetogela go dirišaneng le meoya bakeng sa go hwetša khomotšo ka morago ga lehu la baratiwa. Ka thušo ya dinoge ba ka hwetša tsebišo e kgethegilego yeo e bonagalago e e-tšwa go bahu. Ka baka leo, ba bjalo bao ba hwetšwego gantši ba kgodišwa ka gore bahu ba bona ba a phela le gore go boledišana le bahu go tla ba thuša go lebeletšana le tahlegelo ya bona.

Ba bangwe ba goketšwa  go dirišaneng le meoya ka gobane ba boditšwe gore meoya e tla ba thuša gore ba hwetše kalafo ya malwetši, ba phologe go kgomarelwa ke bodiidi, ba atlege leratong la ba bong bjo bo sa swanego, ba rarolle mathata a lenyalo goba ba hwetše mošomo. E bile ba bangwe ba bantši ba fetogela go dirišaneng le meoya feela ka go fo nyaka go tseba.

Lega go le bjalo, lebaka le lengwe leo ka lona dimilione tša batho di fetogetšego go dirišaneng le meoya ke gore di rutilwe gore go dirišana le meoya, bjalo ka ge setsebi se sengwe tabeng ye se go hlalositše ke “bodumedi bja tlaleletšo” bjo bo lego “boemong bja kgaufsi le Bokriste.” Boemo bja bodumedi Brazil ke mohlala wa se.

Brazil e na le palo e kgolo kudu ya bao e lego ba Roma Katholika lefaseng, eupša bjalo ka ge mongwadi Sol Biderman a e hlalosa, “dimilione tša babotegi di tšhuma dikerese aletareng e fetago e tee e bile di ikwa [e le gore ga go na] phapano le ge e le efe.” Ge e le gabotse, kuranta ya ditaba tša beke le beke ya Brazil e lego Veja e begile gore 80 lekgolong ya bao ka mehla ba etelago mafelo a go dirišana le meoya kua Brazil ke Makatholika ao a kolobeditšwego ao a ilego a ba gona gape le go Mmisa. Go oketša mo ke taba ya gore gaešita le baruti ba bangwe ba tšea karolo dipokanong tša go dirišana le meoya, e bile motho a ka bona lebaka leo ka lona badumedi ba bantši ba naganago gore go ikgokaganya le meoya bakeng sa khomotšo le tlhahlo go dumeletšwe ke Modimo. Eupša na go bjalo?

[Lepokisi/Diswantšho go letlakala 3]

Dibopego tše Fapa-fapanego tša go Dirišana le Meoya

Tiro ya go dirišana le meoya e ka akaretša go ikgokaganya le senoge, go boledišana le bahu goba go tsoma dipheku. Sebopego se sengwe seo se tumilego sa go diriša meoya ke bodupe—go leka go hwetša seo bokamoso bo se huperego goba dilo tšeo di sa tsebjego ka thušo ya meoya. Dibopego tše dingwe tša bodupe ke bolepi bja dinaledi, go lebelela ka kgwele ya crystal, go hlatholla ditoro, go laola ka methalo ya diatla le go bolela bokamoso e sa le pele ka go diriša dikarata tša go noga.