Na Tokologo e Kgolo ya Letswalo e tla ka ya Dumelelwa Mexico?

KA MONGWALEDI WA PHAFOGA! KUA MEXICO

TOKOLOGO ya bodumedi kua Mexico e tiišetšwa ka molao. Lega go le bjalo, molao o sa dutše o e-na le dithibelo tše itšego tokologong ya borapedi. Ka mohlala, kgopolo ya go gana go tsenela ditirelo tša bohlabani ka baka la letswalo ga e tsebje ka tekanyo e itšego mo nageng ye. Ke ka baka leo Mokgatlo wa Dinyakišišo tša Molao wa Yunibesithi e Ipušago ya Ditšhaba ya Mexico (UNAM [National Autonomous University of Mexico]), o ilego wa dira phetho ya go swara seboka sa ditšhaba-tšhaba sa dipolelo tša tšhiedišano seo se bego se na le sehlogo se se rego, “Go Gana ka Baka la Letswalo kua Mexico le Lefaseng.” Mokgatlo wa Dinyakišišo tša Molao wa UNAM ke wo o ikarabelago mmušong, eupša morero wa wona ke go nyakišiša melao yeo e hlomilwego le kamoo e šomago ka gona. Dihlatse tša Jehofa kua Mexico di be di laleditšwe go romela moemedi bakeng sa go nea polelo ka sehlogo se se rego, “Dihlatse tša Jehofa le go Gana ka Baka la Letswalo.”

Baprofesara ba a Bolela

Taba e rego “Go Gana ka Baka la Letswalo Molaong wa Ditšhaba-tšhaba,” yeo e neilwego ke Dr. Javier Martínez Torrón, yo e lego moprofesara Yunibesithing ya tša Molao ya Granada, kua Sepania, e bontšhitše gore tokologo ya letswalo le tshwanelo ya go gana go dirišwa ga melao goba ditshwanelo tše itšego ka baka la letswalo go šetše go lemogwa ditšhabeng ka moka. O ile a bolela ka boemo bja Dihlatse tša Jehofa kua Sepania le ka taba ya Kokkinakis kua Gerika. *

Dr. José Luis Soberanes Fernández, yo e lego moprofesara go Mokgatlo wa Dinyakišišo tša Molao wa UNAM, o boletše ka sehlogo se se rego “Phihlelo ya ma-Mexico Tabeng ye.” Ge a be a lebišitše go Sehlogo sa Mathomo seo se rego: “Ga go tabeng le e tee mo ditumelo tša bodumedi di lokollago mang goba mang go dumelelaneng le molao wa naga ye. Ga go na le o tee yo a tla kgonago go dira boipiletšo ka mabaka a bodumedi e le gore a pheme boikarabelo le mediro tšeo di beilwego ka melao,” o boletše gore, “Re swanetše go bontšha gore Molao wa Mexico wa Mekgatlo ya Bodumedi le Borapedi bja Phatlalatša ge e le gabotse di thibela go gana ka baka la letswalo.” Mafelelong, Dr. Soberanes o itše: “Re dumela gore ke mo go akgofilego go hloma molao tabeng ya go gana ka baka la letswalo Mexico.”

O be a lebišitše tabeng ya gore ngwaga o mongwe le o mongwe bana ba makgolo ba Dihlatse kua Mexico ba lebeletšana le mathata ao a tswalanego le thuto ya bona ka baka la go gana ga bona mo go theilwego Beibeleng go dumediša folaga. Bana ba bangwe ba Dihlatse ga ba dumelelwe gaešita le go ngwadišetša go tsena sekolo. Lega go le bjalo, ka thušo ya boipelaetšo le thušo ya Khomišene ya Ditshwanelo tša Batho, bontši bja bona bo ile bja newa gape tshwanelo ya bona go tša thuto. Bahlankedi ba bangwe ba tša thuto ba gatile megato bakeng sa go thibela gore bana ba rakwe sekolong, eupša barutiši ba bangwe ba hlokomologa maiteko a bjalo. Balaodi ba be ba kgotleletše boemo bja Dihlatse, eupša ga se gwa ka gwa ba le boemo bjo dikolo tša Mexico di bego di ka bo latela.

Seboka sa dipolelo tša tšhiedišano se ile sa akaretša gape go gana ka baka la letswalo mo go ilego gwa newa ke madumedi a mangwe, bjalo ka go gapeletšwa go šoma ka matšatši ao a tšewago e le a makgethwa, go nyakwa ga gore go aparwe ka tsela yeo e lwantšhanago le ditumelo  tša bona tša bodumedi mošomong, bjalo bjalo. Go gana ditirelo tša bohlabani le dikalafo tše itšego le gona go ile gwa akaretšwa.

Dihlatse tša Jehofa le Kesara

Setho sa bašomi ba ofisi ya lekala ya Dihlatse tša Jehofa Mexico se ile sa nea kakaretšo ya ditumelo tša tšona tša motheo. Se hlalositše go kgomarela ga tšona melao ya motheo ya Beibele e bjalo ka wo o bolelwago go Luka 20:25, wo o botšago Bakriste gore, “nthšetšang Kesara tše e lexo tša Kesara.” Se ile sa bolela gape ka Ba-Roma 13:1, yeo e rego Bakriste ba swanetše go hlompha babuši ba phagamego. Se ile sa gatelela gore Dihlatse tša Jehofa ke badudi bao ba tlwaelegilego, ba kwago molao bao ba katanelago go lefa makgetho a bona, ba phela maphelo ao a rulagantšwego, ba boloka magae a bona a hlwekile, gomme ba romela bana ba bona sekolong.

Ka morago se ile sa bontšha lebaka la Mangwalo leo le dirago gore Dihlatse di gane go dumediša folaga, leo le ka hwetšwago go Melao e Lesome, go Ekisodo 20:3-5: “Ke se kê ka bôna Ò na le medimo e šele. O se ke wa itirêla modimo wa xo betlwa, le xe e le seswanthšô se sengwê sa tše di lexo kwa lexodimong, le xe e le sa tše di lexo mono lefaseng, le sa tše di lexo meetseng ka tlase xa lefase. O se ke wa di khunamêla; O se kê wa di dirêla.”

Dihlatse tša Jehofa di rapela Modimo a nnoši, gomme ga di rapele diswantšho le ge e le ka tlase ga maemo afe. Lega go le bjalo, le ka mohla di ka se dire tiro le ge e le efe ya go nyatša malebana le seka sa naga goba go bolela ka sona ka tsela ya go se nyatša.

E le gore go gatelelwe pono ya Dihlatse tša Jehofa tabeng ye, go ile gwa bontšhwa bidio ya Purple Triangles. Bidio ye e bontšha boemo bja go tia bjo Dihlatse tša Jehofa di ilego tša bo tšea kua Nazi, Jeremane (1933-45). E bontšha kanegelo ya ba ga-Kusserow, lapa leo le ilego la ema le tiile ditumelong tša lona nakong ya pušo ya Nazi. *

Lebaka la Mangwalo la go gana ga Dihlatse tša Jehofa go amogela ditšhelo tša madi le ile la newa. (Genesi 9:3, 4; Ditiro 15:28, 29) Thulaganyo ya Dikomiti tša go Hloma Kwano le Dipetlele lefaseng ka bophara e ile ya hlaloswa. Go oketša moo, go ile gwa gatelelwa dilo tšeo di fihleletšwego ke dingaka tšeo di nago le tirišano tabeng ya kalafo ya go bua ka ntle le madi go Dihlatse tša Jehofa.

Letšatši le lengwe le le lengwe batho ba ka bago 100 ba be ba e-ba gona sebokeng sa dipolelo tša tšhiedišano, bao bontši bja bona e bego e le bo-ramolao. Baemedi ba Ofisi ya Ditaba tša Bodumedi ba Mexico le bona ba be ba le gona. Bohle bao ba bego ba le gona ba be ba kgona go theetša pono ya ditsebi mabapi le go hlompha go gana ka baka la letswalo. Kakanyo ye ke e mpsha go bahlami ba molao ba Mexico, gaešita le ge e amogelwa gohle dinageng tše dintši tša pušo ka batho, bjalo ka Fora, Portugal, Sepania le United States go akaretša le dinageng tše dingwe tšeo e kilego ya ba tša Bokomanisi, bjalo ka Czechia le Slovakia.

[Mengwalo ya ka tlase]

[Seswantšho go letlakala 13]

Dihlatse tša Jehofa Mexico di tšeela godimo tokologo ya tšona ya go dira boboledi