Go Fihlelela Maikemišetšo

BOTHO, borwarre le khutšo tša ditšhaba-tšhaba—ke mang yo a ka se kego a reta maikemišetšo a bjalo a mabotse? Motsošološi wa di-Olympic e lego Baron Pierre de Coubertin o be a dumela gore dipapadi tšeo di be di tla fediša diphenkgišano tša ditšhaba ka go godiša tlhompho e kgolo ya go hlompha baphenkgišani go sa šetšwe morafo, bodumedi goba bong. O be a nagana gore “lefase le lekaone le ka tlišwa feela ke batho ba kaone.” Eupša na dipapadi ruri di ka tliša khutšo ya lefase? Ge re ahlola go ya ka pego ya tšona ya nakong e fetilego, re tla swanelwa ke go araba ka gore aowa.

Le ge dipapadi di e-na le lefelo la tšona, fela thuto yeo e tšwago Beibeleng ke senotlelo sa go godiša khutšo ya kgonthe. Ruri, melao ya motheo ya Beibele e ka tšweletša “batho ba kaone,” bjalo ka ge Coubertin a bea taba. Ela hloko mangwalo a mangwe ao a godišago khutšo gare ga batho bao ba a dirišago, go sa šetšwe setšhaba sa bona.

“Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”—Johane 13:35.

“Ge go ka kgonega, ge e le lena le phele ka khutšo le batho ka moka.”—Ba-Roma 12:18, PK.

“Byale xe re sa na le lebaka, a re direng botse;  re bo dirêlê batho bohle.”—Ba-Galatia 6:10.

“Le se kê la dira selô ka kxang le ka xo nyaka xo rêtwa. Sa lena a e bê xo ipoetša le xo phalana xo xodišaneng.”—Ba-Filipi 2:3.

“Xo tlwaetša mmele xo hola xa-nyane fêla. Se se holaxo xohle ké borapedi ka xe bo na le kholofedišô ya bophelô byono le ya byo bo tl’o xo tla.”—1 Timotheo 4:8.

Na maikemišetšo a ao a hlalositšwego ka mangwalong a a šoma e le ka kgonthe? Ela hloko seo se diragetšego kua Munich, Jeremane. Ka 1974, nywaga e mebedi feela ka morago ga ge Dipapadi tša di-Olympic tšeo di bego di swaretšwe toropong yeo di ilego tša senywa ke botšhošetši le polao, Dihlatse tša Jehofa di ile tša swara kopano ya ditšhaba-tšhaba Lepatlelong la di-Olympic. Go bao ba bego ba le gona, go be go na le dihlopha tše tšwago Gerika le Turkey—dinaga tšeo di bego di lwantšhana. Ge e le gabotse, selemong sona seo, madira a Gerika le a Turkey a ile a nwelela ntweng ba lwela sehlakahlaka sa Tsipero. Na se se be se tla kgoma Bakriste bao ba bego ba tla ba gona kopanong ye? Aowa! E be e le mo go kgomago maikwelo gakaakang go babogedi go bona ba-Gerika le ma-Turkey ba gokarelana le go bitšana ngwanešo le kgaetšedi!

Dihlatse tša Jehofa di tsebja lefaseng ka bophara ka go fihlelela ditswalano tša khutšo le go lwantšha mapheko a botšhaba, morafo le setšo. Ke therešo gore ga di ipolele e le tšeo di fihleletšego ka mo go feletšego kgopolo ya kwano ya lefase ka moka gotee le tirišano. Go fo swana le mang le mang, di swanetše go šoma ka thata go latela keletšo ya moapostola Paulo wa Mokriste e rego: “Le bê ba ba apotšexo motho e motála le ditirô tša xaxwe. Le bê ba ba aperexo motho e mofsa.” (Ba-Kolose 3:9, 10) Lega go le bjalo, di dumela ka mo go tiilego gore go latela melao ya motheo ya Beibele go ka thuša batho go ‘nyaka molao ba o kganyelele.’—1 Petro 3:11.

Ka mo go nyamišago, di-Olympic—go sa šetšwe maikemišetšo a tšona a phagamego—di tšweleditše dika tšeo di sa rategego go ba bantši. Go fapana le seo, Lentšu la Modimo le matla le tlišetša batho dilo tše kaone kudu, le godiša botho le khutšo ya ditšhaba-tšhaba.

[Diswantšho go letlakala 24]

Di-Olympic di godiša phadišano

[Mothopo]

Aus dem Fundus der MÜNCHNER OLYMPIAPARK GMBH, München

[Diswantšho go letlakala 25]

Beibele e godiša khutšo