Go Swarwa Gampe ga Motho—Na go tla ka gwa Fela?

Kopi ya March 8, 2000 ya tokollo ya Phafoga!, yeo e bolelago ka bothata bjo bo kwešago bohloko bja bokgoba bjoo ka manyami bo phegelelago dikarolong tša lefase, e ile ya newa Tona ya tša Botee bja tša Leago ya Motaliana, Livia Turco. Ka lengwalong leo le yago ofising ya lekala ya Dihlatse tša Jehofa kua Italy, o dumetše gore:

“Dibopego tša mehleng yeno tša bokgoba tšeo di kgomago kudu basadi le bana, di bopa boemo bja tšhoganyetšo bjo kotsi bjoo go bjona dimilione tša batho di sa dutšego di tlaišega maemong a sehlogo.” O phethile ka gore: “Lentšu le lengwe le le lengwe leo le hlabošwago ka pefelo malebana le boemo bjo bja kgonthe bjo bo sa amogelegego ke thušo e bohlokwa kudu gomme ge le fihlelela batho ka kakaretšo bjalo ka babadi ba [Phafoga!], ke leo le tlogago le kwagala kudu.”

Ka thušo ya kabo ya dikopi tše di fetago dimilione tše 20 tša tokollo e nngwe le e nngwe ya Phafoga! ka maleme a 82, babadi ba dimilione ga ba tsebišwe feela ka sebaki sa mathata a lehono, eupša gape ba newa le ditharollo tšeo di theilwego Beibeleng bakeng sa wona.

Lega go le bjalo, potšišo yeo e phegelelago ke e rego, Ge e ba ruri Modimo a le gona, ke ka baka la’ng a dumelela go tlaišega go šoro ga batho bao ba se nago molato? Ba bantši ba ipotšiša gore, ‘Nka rata bjang Mmopi yoo bohlale bja gagwe bo lego pepeneneng go dimakatšo tša tlholo, eupša e le yo go bonalago a sa bontšhe kwelobohloko go batho lehono?’ Dipotšišo tše bjalo di arabja ka tsela e kgotsofatšago ka poroutšheng ya Na Modimo Ruri o na le Taba le Rena? O ka kgopela kopi ka go tlatša setlankana seo se sepelago le sehlogo se le go se romela atereseng e bontšhitšwego setlankaneng goba atereseng e swanetšego e lokeleditšwego go letlakala 5 la makasine wo.

□ Nthomeleng kopi ya poroutšha ya Na Modimo Ruri o na le Taba le Rena? Bontšha gore ka leleme lefe

□ Hle ikopanyeng le nna mabapi le thuto e sa lefelelwego ya legae ya Beibele.