Go Tloga Olympia go ya Sydney

BA BANTŠI ba tšea Dipapadi tša Olympic e le phadišano ya bohlokwa kudu lefaseng ya tša mabelo. The World Book Encyclopedia e bolela gore: “Ga go na tiragalo e nngwe ya dipapadi yeo e tanyago šedi e kaakaa. Dimilione tše sego kae tša batho di ba gona dipapading, gomme dimilione tše makgolo lefaseng ka bophara di di bogela thelebišeneng.”

Histori e Kopana

Dipapadi tša Olympic di thomile nywageng e dikete e fetilego. Ba-Gerika ba bogologolo ka ge ba be ba dumela gore diatleletiki di be di thabiša meoya ya bahu, ba ile ba swara menyanya ya setšhaba yeo e bego e tswakanya bodumedi le dipapadi. Tše di be di akaretša dipapadi tša Isthmus, tša Nemea, tša Olympic le tša Pythia. Go tše, di-Olympic di be di swarwa ka tlhompho e kgolo, ka gobane di be di godiša Zeus yo ba-Gerika ba bego ba mo tšea e le kgoši ya medimo.

Go ya ka bohlatse bjo bo lego gona di-Olympic tša pele di be di bontšha tiragalo e tee feela, lebelo la maoto. Eupša ge nako e dutše e tšwela pele di ile tša akaretša diphadišano tše dingwe, tše bjalo ka lebelo la karikana le diteko tše šoro tša kgotlelelo. Baeng ba ile ba kgeregela tiragalong yeo go tšwa dinageng tša kgole le kgaufsi. Bakeng sa go kgonthišetša tšhireletšego ya bona, go ile gwa hlongwa kwano ya go kgaotša go lwa yeo e iletšago ntwa bobedi ka pele le ka morago ga dipapadi.

Ge Roma e thoma go buša, di-Olympic di ile tša thoma go boela morago. Ka kgonthe, ba-Roma ba bantši ba ile ba lebelela diatleletiki ka tekanyo e itšego ya lenyatšo. Yo a bego a ikgethile e be e le Mmušiši Nero. O ile a tsenela dipapadi ka 67 C.E. gomme a thopa phadišanong e nngwe le e nngwe yeo a ilego a tšea karolo go yona. Go bonagala eka batšea-karolo ba bangwe ba be ba tseba gore ke eng seo se ba loketšego! Lega go le bjalo, ka 394 C.E., di-Olympic di ile tša emišwa.

Go Tsošološwa ga Di-Olympic

Nywaga-kgolo e 15 ka morago, seo go epa ga baepi ba marope ba Jeremane go se utolotšego moeding wa Olympia ya bogologolo se ile sa tliša kgahlego e tsošološitšwego dipapading. Ka gona, Baron Pierre de Coubertin yo e lego monna wa mo-Fora wa nywaga e 29, o ile a šišinya taba ya go tsošološa phadišano. Ka gona, ka 1896 Dipapadi tša Olympic tša mehleng yeno tša mathomo di ile tša swarelwa Athene. Ga e sa le go tloga ngwageng woo, di-Olympic di be di dutše di swarwa ka morago ga nywaga e mengwe le e mengwe e mene, ka ntle le maemong a sa tlwaelegago a sewelo.

Lehono ba bantši ba letela dipapadi ka mahlo a mahwibidu. Ngwageng wo, di tla ba gona kua Sydney, Australia, go tloga ka September 15 go ya go October 1. Go tla akaretšwa dipapadi tše 28, diphadišano tše 292 le diboka tše 635 tšeo di nago le bo-radiatleletiki ba fetago 10 300 bao ba tšeago karolo.

Lega go le bjalo, nywageng ya morago bjale di-Olympic di dikologilwe ke ngangišano. Batho ba bantši ba bolela gape gore maikemišetšo a Olympic a mathateng. Go lebelela ka kua ga seo se bonwago go tla ipontšha e le bobedi mo go utollago le mo go hlobaetšago.

[Mothopo wa Seswantšho go letlakala 19]

Scala/Art Resource, NY