Bafsa ba a Botšiša . . .

Na ke Swanetše go Botša Motho yo Mongwe Gore ke Gateletšegile?

“Ge ke ikwa ke gateletšegile, mathomong ke kgetha go se bolele ka seo ka gobane batho ba ka nagana gore ke ngwana yo go lego thata go dirišana le yena. Eupša ka nako yeo ke lemoge gore ke nyaka go boledišana le yo mongwe e le gore ke hwetše thušo e itšego.”—Alejandro wa nywaga e 13.

“Ge ke ikwa ke gateletšegile, ga ke retologele go bagwera ba-ka ka gobane ga ke nagane gore ba ka nthuša. Ba tla fo dira metlae ka nna.”—Arturo wa nywaga e 13.

MO E nyakilego go ba yo mongwe le yo mongwe o ba le manyami ka dinako tše dingwe. * Lega go le bjalo, ka gobane o sa le mofsa e bile ga o na phihlelo e lekanego, o ka ikwa gabonolo o imetšwe ke dikgateletšo tša bophelo. Tšeo di nyakwago ke batswadi ba gago, bagwera le barutiši; diphetogo tša mmele le tša maikwelo tša lebaka la go khukhuša; goba maikwelo a go ikwa o palelwa ka baka la diphošo tše itšego tše nyenyane—dilo tše ka moka di ka go tlogela o ikwa o imetšwe e bile o nyamile.

Ge seo se direga, ke mo go holago go ba le motho yo mongwe yo o ka mo ntšhetšago sa mafahleng. Beatriz wa nywaga e 17 o re: “Ge nka se boledišane le motho yo mongwe ka mathata a-ka, ke nagana gore ke tla galefa o šoro.” Lega go le bjalo, ke mo go nyamišago gore bafsa ba bantši ga ba bolele ka mathata a bona—gomme gantši ba ikhwetša ba sobelela ka mo go tseneletšego manyaming. Moprofesara go tša Thuto ya tša Kalafo wa Madrid, e lego María de Jesús Mardomingo, o bolela gore bafsa bao ba fihlago ntlheng ya go leka go ipolaya, ke bao gantši ba lewago ke bodutu kudu. Bontši bja bafsa bao ba phologilego maiteko a go ipolaya ba boletše gore ga se ba ka ba kgona go hwetša le ge e ka ba o tee wa batho ba godilego yo ba bego ba ka boledišana le yena le yo ba bego ba ka mo ntšhetša sa mafahleng.

Go thwe’ng ka wena? Na o na le motho yo mongwe yo o ka boledišanago le yena ge o ikwa o nyamile? Ge e ba go se bjalo, o tla retologela go mang?

Boledišana le Batswadi ba Gago

Alejandro yo a tsopotšwego mathomong, o hlalosa seo a se dirago ge a ikwa gateletšegile: “Ke ya go mma ka gobane ga e sa le ke belegwa, o bile thekgo go nna gomme o nnea kholofelo. Gape ke retologela go tate ka gobane o bile le diphihlelo tše swanago le tša-ka. Ge ke ikwa ke sa thaba gomme ke sa botše motho yo mongwe, gona ke  ikwa ke sa thaba ka mo go feteletšego.” Rodolfo wa nywaga e 11 o gopola gore: “Ka dinako tše dingwe morutiši o be a tla nnyenyefatša le go nkomanya, ka gona ke be ke ikwa ke nyamile kudu. Ke be ke tla ya ntlwaneng ya boithomelo gore ke lle. Ke moka ka morago, ke be ke boledišana le mma gomme a nthuša go rarolla bothata bja-ka. Ge e ba ke be nka se boledišane le yena, ke be ke tla ikwa ke nyamile le go feta.”

Na o ile wa nagana ka go ba le poledišano ya go ntšhetšana sa mafahleng le batswadi ba gago? Mohlomongwe o nagana gore go ka se kgonege gore ba kwešiše mathata a gago. Eupša na ruri go bjalo? Ba ka no se kwešiše ka botlalo dikgateletšo ka moka tšeo bafsa ba lebeletšanago le tšona lefaseng la mehleng yeno; lega go le bjalo, na ga se therešo gore mohlomongwe ba go tseba gakaone go feta kamoo motho le ge e le ofe lefaseng a go tsebago ka gona? Alejandro o re: “Ka dinako tše dingwe ga go bonolo go batswadi ba-ka go nkwela bohloko gotee le go kwešiša kamoo ge e le gabotse ke ikwago ka gona.” Lega go le bjalo, o dumela gore: “Ke a tseba gore nka retologela go bona.” Gantši bafsa ba a makala ge ba hwetša kamoo ge e le gabotse batswadi ba bona ba kwešišago mathata a bona gabotse ka gona! Ka ge ba godile e bile ba na le phihlelo e kgolwanyane, gantši ba ka nea keletšo e šomago—se ke sa therešo kudu-kudu ge e ba ba e-na le phihlelo ya go diriša melao ya motheo ya Beibele.

Beatriz yo a tsopotšwego pejana, o re: “Ge ke boledišana le batswadi ba-ka, ke hwetša kgothatšo le ditharollo tše di šomago bakeng sa mathata a-ka.” Ka gona, ka lebaka le le kwalago Beibele e nea keletšo ye bakeng sa bafsa: “Ngwan’a-ka! Boloka ditaêlô tša tat’axo, O se lahlê ‘thutô tša mm’axo. Kwaa tat’axo, yêna motswadi wa xaxo; ‘me mm’axo xe a kxekotše, O se kê wa mo nyatša.”—Diema 6:20; 23:22.

Ke therešo gore go thata go ntšhetša batswadi ba gago sa mafahleng ge e ba o na le tswalano e fokolago le bona. Go ya ka Dr. Catalina González Forteza, nyakišišo yeo e dirilwego gare ga barutwana ba sekolo se se phagamego e bontšhitše gore bao ba boletšego gore ba ile ba leka go fediša maphelo a bona, ba be ba na le maikwelo a go se itlhomphe le tswalano e fokolago le batswadi ba bona. Ka mo go fapanego, bafsa bao ba phemago kgopolo e bjalo ya go ikgobatša ka kakaretšo ke “bao ba thabelago tswalano e botse le mma le tate ba bona.”

Ka gona, šomela go hlagolela tswalano e botse le batswadi ba gago ka bohlale. Itlwaetše go boledišana le bona ka mehla. Ba botše seo se diregago bophelong bja gago. Ba botšiše dipotšišo. Dipoledišano tše bjalo tšeo di thabišago di ka dira gore go be bonolo go ba batamela ge o e-na le bothata bjo bogolo.

Go Boledišana le Mogwera

Eupša na go be go ka se be bonolo gore o ye go thaka ka mathata a gago? Go ba gona, ke mo gobotse go ba le bagwera bao o ka ba botago. Diema 18:24 e re “xo na le moratwa-mmotexi [“mogwera,” NW] mo-phala-ngwana weno.” Eupša le ge dithaka di ka go bontšha kwelobohloko le thekgo, di ka se go nee keletšo e botse ka mehla. Go feta moo, ga se ka mehla di nago le phihlelo ya bophelo go feta kamoo o nago le yona. Na o gopola Rehabeama? E be e le kgoši mehleng ya Beibele. Go e na le gore a amogele keletšo ya banna ba bagolo bao ba nago le phihlelo, o ile a theetša dithaka tša gagwe. Mafelelo e bile afe? Masetla-pelo! Rehabeama o ile a lahlegelwa bobedi ke thekgo ya bontši bja setšhaba sa gagwe gotee le go amogelwa ke Modimo.—1 Dikxoši 12:8-19.

Bothata bjo bongwe bja go ntšhetša bagwera sa mafahleng e ka ba taba ya go boloka sephiri. Arturo yo a tsopotšwego mathomong o re: “Bontši bja bašemane bao ke ba tsebago ba boledišana le bagwera ba bona ge ba ikwa ba nyamile. Eupša ka morago, bagwera ba bona ba utolla se sengwe le se sengwe go ba bangwe gomme ba dire metlae ka bona.” Gabriela wa nywaga e 13 o bile le phihlelo e swanago. O re: “Ka letšatši le lengwe ke ile ka hwetša gore mogwera wa-ka o be a bolela ditaba tša-ka tša motho ka noši go mogwera wa gagwe, ka gona ke ile ka se sa hlwa ke sa mo ntšhetša sa mafahleng le ka mohla. Ee, ke boledišana  le dithaka tša-ka, eupša ke leka gore ke se di botše dilo tšeo di ka nkgomago gampe ge e ba di di botša ba bangwe.” Ka gona ge o tsoma thušo, ke gabohlokwa go hwetša motho yo mongwe yo ‘a sa utollego dithopa tša yo mongwe.’ (Diema 25:9) Motho yo bjalo ke mo go swanetšego gore e be motho yo mongwe yo a godilego go go feta.

Ka gona, ge e ba ka mabaka a itšego o sa kgone go hwetša thekgo ka gae, go lokile gore o hwetše mogwera yo o ka mo ntšhetšago sa mafahleng, eupša kgonthišetša gore o na le phihlelo bophelong le tsebo ya melao ya motheo ya Beibele. Ga go na pelaelo gore ka phuthegong ya lefelong la geno ya Dihlatse tša Jehofa go na le batho bao ba swanelago tlhaloso yeo. Liliana wa nywaga e 16 o re: “Ke ile ka ntšhetša ba bangwe ba dikgaetšedi tša-ka tša Bakriste sa mafahleng gomme se e bile seo se thušago kudu. Ka ge ba mpheta ka bogolo, dikeletšo tša bona ke tšeo di kwagalago. Ba fetogile bagwera ba-ka.”

Go thwe’ng ge e ba boemo bja gago bja moya le bjona bo thomile go fokola? Mohlomongwe o nyamile kudu mo e lego gore o thomile go hlokomologa thapelo goba mmalo wa Beibele. Go Jakobo 5:14, 15, Beibele e nea keletšo ye: “Xe e mongwê wa lena a babya, a bitšê baxolo ba phuthêxô, ba tlê ba mo rapêlêlê bà mo tlodišê makhura Leineng la Morêna. ‘Me thapêlô ya tumêlô e tlo phološa molwetši. Morêna ó tlo mo tsoša.” Phuthego ya lefelong la geno ya Dihlatse tša Jehofa e na le banna ba bagolo bao ba nago le phihlelo tabeng ya go thuša batho bao ba nyemilego moko goba bao ba babjago moyeng. Ikwe o lokologile go ka boledišana le bona. Beibele e re banna ba bjalo ba ka ba “bjalo ka tšhireletšo ge phefo e foka, le setšhabelo sa go tšhabela pula.”—Jesaya 32:2, PK.

“Mo xo Kaxo ba le tše le di Nyakaxo, le di Tlišê Pele xa Modimo”

Lega go le bjalo, mothopo o kaone-kaone wa thušo ke “Modimo wa khomotšô yohle.” (2 Ba-Korinthe 1:3) Ge o nyamile e bile o gateletšegile, latela keletšo ya Ba-Filipi 4:6, 7: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ‘kxopolô tša lena xo Kriste Jesu.” Jehofa o ikemišeditše go go theetša ka mehla. (Psalme 46:1; 77:1) Ka dinako tše dingwe thapelo ke sohle seo o se nyakago bakeng sa go imolla mogopolo wa gago.

Ge e ba o ikwa o nyamile goba o gateletšegile nako le nako, le ka mohla o se ke wa lebala gore bafsa ba bangwe ba bantši ba bile le maikwelo a swanago. Ge nako e dutše e e-ya, maikwelo ao gantši a tla fela. Eupša mo nakong ye, o se ke wa tlaišega o nnoši. Dira gore motho yo mongwe a tsebe gore o kwele bohloko. Diema 12:25 (PK) e re: “Manyami a pelo a imeletša motho fase; eupša lentšu la botho le thabiša pelo.” O ka hwetša bjang “lentšu [leo] la botho” la kgothatšo? Ka go botša motho yo mongwe—motho yo mongwe yo a nago le phihlelo, tsebo le bohlale bja go boifa Modimo bakeng sa go go nea khomotšo le thušo tšeo o di nyakago.

[Mongwalo wa ka tlase]

[Ntlhakgolo go letlakala 14]

“Ge ke boledišana le batswadi ba-ka, ke hwetša kgothatšo le ditharollo tše di šomago”

[Seswantšho go letlakala 15]

Batswadi bao ba boifago Modimo, e sego dithaka tša gago, ka mehla ba boemong bjo bobotse bakeng sa go go nea keletšo