Tlhakodišo e Makatšago

Ka mongwaledi wa Phafoga! kua BENIN

“BANNA bao ba bararo ba a phela feela ka gobane Dihlatse tša Jehofa di ba phološitše!” Tšeo e bile ditaba tšeo di ilego tša phatlalala kudu bjalo ka mollo wa tlhaga motseng ka moka wa Calavi, nageng ya Afrika Bodikela ya Benin, ka Laboraro, April 19, 2000. Banna ba bararo e be e le bomang, gomme Dihlatse tša Jehofa di be di akaretšwa bjang go hlakodišweng ga bona?

Mo e ka bago ka 6:30 a.m., Philippe Elegbe le Roger Kounougbe ba be ba itokišetša go yo šoma lefelong la kopano la Dihlatse tša Jehofa leo le agilwego go bapa le ofisi ya lekala ya Mokgatlo wa Watch Tower ya Benin. Mantšiboeng ao, ba makgolo ba be ba tla bokana moo bakeng sa Segopotšo sa ngwaga le ngwaga sa lehu la Jesu Kriste. * Gatee-tee, lešata leo le thibago ditsebe le ile la senya go homola mo go fodilego ga mesong. Kapejana, Philippe le Roger ba ile ba lemoga gore go diregile kotsi tseleng e kgolo.

Ka metsotswana e sego kae ka morago ba ile ba kwa motho a goeletša a re: “Bathuši ba-ka ba bararo ba pipilwe ke mekotlana ya samente!” Philippe le Roger ba ile ba kitimela tseleng e kgolo. Moo ba ile ba bona lori ya ditone tše 20 e robetše ka lehlakore. Bontši bja mekotlana e tletšego samente e be e kgothogile go tšwa loring.

Josué Didolanvi yo le yena e bego e le mošomi lefelong la kopano, o be a šetše a le moo, a goga monna go mo ntšha magareng ga hlogwana ya lori le mekotlana ya samente. Mootledi yo a bego a intšhitše ka hlogwaneng ya lori, o be a le boemong bja go tšhoša. Lega go le bjalo, o ile a rapa matla bakeng sa go goeletša ka gore: “Go sa dutše go e-na le batho ba babedi ka tlase ga mekotlana ya samente!” Babogedi ba bangwe ba ile ba thoma go tloša mekotlana, eupša ba ile ba kgaotša kapejana ka baka la phišo e kgolo. Disamente di be di sa tšwa diontong tša moo di tšweletšwago gona!

Tlhakodišong

Philippe, Roger le Josué ba ile ba thoma go šoma ka thata ba thuba thaba ya mekotlana ya samente gomme ba e tloša ka o tee ka o tee. Diatla tša bona di ile tša kwešwa bohloko ke phišo gotee le boima bja mekotlana ya dikhilograma tše 50. Seo se ilego sa befiša ditaba le go feta, samente se be se tšhologa go tšwa mekotlaneng e gagogilego, sa ntšha menwana ya bona maphone le go dira gore go hema go be thata. Ka morago Josué o ile a re: “Diatla tša-ka di be di fiša, kudu-kudu menwana ya-ka. Eupša ke ile ka tšwela pele ke nagana gore go sa dutše go e-na le sebaka sa go phološa le ge e le mang yo a ka bego a sa le ka tlase moo.”

Ka morago ga go tloša mo e ka bago mekotlana e 40, banna ba ba bararo ba ile ba bona legogwa la lehlaka. Ba maketše kudu, ba ile ba hwetša banna ba babedi moo—gona ka tlase ga legogwa. Ba be ba phela! Ge kotsi e be e direga, banna ba ba be ba le ka morago ga lori ba robetše godimo ga legogwa leo le bego le khupeditše mekotlana ya samente. Ge ba be ba e-wa loring, legogwa le ile la ba apeša gomme la ba šireletša phišong e tšhumago ya mekotlana ya samente yeo e bego e ba pipile.

Nakong ya tlhakodišo le ka morago ga yona, lešaba le legolo la babogedi le ile la bokana. Ka moka ba be ba kgotsa gore Philippe, Roger le Josué ba kgonne go tloša thaba ya ditone tše pedi ya mekotlana ya samente kapejana e bile ba le ka tlase ga maemo a bjalo a šoro. Gape ba be ba tlabilwe ke gore banna ba ba bararo ba be ba bile ba ile bokgoleng bjo bjalo bja gore ba thuše batho bao gaešita le go ba tseba ba bego ba sa ba tsebe. Go se go ye kae yo mongwe le yo mongwe Calavi o be a bonala a tseba ka ditiro tša bona tša go ba bagale.

[Mongwalo wa ka tlase]

[Seswantšho go letlakala 18]

Roger o swere legogwa la lehlaka ka morago ga tlhakodišo