Bafsa ba a Botšiša. . .

Ke ka Baka La’ng Tate a re Tlogetše?

“Le ka mohla ke be ke tloga ke sa kwešiše lebaka leo tate a tlogilego. Sohle seo ke bego ke se tseba e be e le seo mma a mpoditšego sona.”—James. *

GE TATE a phutha-phutha seo e lego sa gagwe gomme a tloga gae, gantši o tlogela boemo bjo bo gakantšhago bja bohloko le go kgopišega. James wa nywaga e 14 yo a tsopotšwego ka mo godimo o re: “Ke be ke tloga ke ferekane ge mma le tate ba be ba arogana.” Le gona, ge tate a tloga ka ntle le go nea tlhaloso e itšego ke moka a palelwa ke go boloka kgokagano, bana ba gagwe ba ka katana le maikwelo a molato, go furalelwa le go kgopišega nywageng e tlago go latela. *

Ge e ba tatago a tlogile, o ka ba o lemoga lebaka ka mo go kwešago bohloko. Mofsa yo a bitšwago Michael o re: “Tate o ile a tloga ka baka la mosadi yo mongwe. Ke ile ka mmona a e-na le yena ka letšatši le lengwe, gomme seo sa mpefediša o šoro. Ke ile ka ikwa gore tate o be a re radiile.” Lega go le bjalo, mabakeng a mangwe go tloga e ka ba kimollo. Melissa yo tatagwe e lego molemaledi wa bjala o re: “Ge e ba a be a ka dula gae, go be go tla ba thata kudu go rena.”

Lega go le bjalo, mabakeng a mantši bana ga ba tsebe lebaka leo ka lona tatago bona a tlogilego gomme se se ka dira gore go se be gona ga gagwe go bonale go le bohloko le go feta. Ke therešo gore o ka ba o be o tseba gore batswadi ba gago ba na le mathata, eupša le ka mohla ga se wa ka wa lora gore ba tla arogana. Robert o gopola gore: “Nakong ya ge tate a be a tloga, ruri ke be ke sa kwešiše se sengwe le se sengwe seo se bego se direga. Sohle seo ke bego ke se tseba e be e le gore dilo di be di senyegile o šoro ka gobane batswadi ba-ka ba be ba dula ba fapana ka mantšu ka mehla.”

Ke ka baka la’ng bo-tate ba bangwe ba tloga gae? Ge e ba tatago a tlogile, na o swanetše go tšea seo e le go furalelwa ga gago? Ke ka baka la’ng batswadi ba gago ba dika-dika go go botša ka mo go tletšego mabapi le seo? Na ga ba go kolote tlhaloso?

Lebaka Leo ka Lona ba Dika-dikago go Bolela

Mabaka ao a tutuetšago go tloga ga tate ga a thabiše le gatee. Gantši lebaka ke bohlotlolo—boitshwaro bjo bo fošagetšego bjoo gantši bo bego bo utetšwe lapa. Ge mosadi a utolla phošo e bjalo, a ka dira phetho ya go hlala monna wa gagwe. A ka ba a mo kgopela gore a tloge ka setu pele go kgopelwa mangwalo a tlhalo. Bana ba ka no se lemoge ka mo go feletšego lebaka leo ka lona se se diregago.

 Ka gona, leka go kwešiša lebaka leo mmago a ka dika-dikago go utolla ka go lebanya seo se diregilego. Ka mohlala, a ka nagana gore go utolla boitshwaro le ge e le bofe bjo bo fošagetšego bja tatago go be go tla fo godiša manyami. Gape, lemoga kamoo e swanetšego go ba e le mo go kwešago bohloko go mosadi go utolla gore monna wa gagwe ga se a botega. (Maleaki 2:13, 14) Ka gona, ge e ba bohlotlolo e le lona lebaka la go arogana ga batswadi ba gago, gona o se ke wa makala ge mmago a hwetša taba e le e kwešago bohloko kudu go ka boledišana ka yona.

Go thwe’ng ka tatago? Ke mo go kwešišegago gore ge e ba e bile yo a sa botegelego mmago, ga go bonale a ka boledišana le wena ka yona. Banna ba bangwe ba ikwa ba le molato kudu ka boitshwaro bja bona bjo bo fošagetšego moo e lego gore ba palelwa ke go itebanya gaešita le bana ba bona! Lega go le bjalo, bo-tate ba bantši ba tšwela pele go rata bana ba bona le go ka leka go tsošološa kgokagano le bona go sa šetšwe boitshwaro bja bona bjo bo hlabišago dihlong.

Mabakeng a mangwe tate o tloga ka baka la boitshwaro bjo bo fošagetšego bja mosadi gomme a dira maiteko ka moka gore a kgomarele go ba kgaufsi le bana ba gagwe. Lega go le bjalo, maemong a mangwe go arogana ga se ka baka la bohlotlolo le gatee, eupša ke seremo sa nywaga ya ngangišano lenyalong. * (Diema 18:24) Ka ge se gantši se direga ka sephiring, o ka no se tsebe seo ntwa e lego mabapi le sona.

Beibele e bolela go Diema 25:9 gore: “Taba ya xaxo, yôna e sekišanê le wa xeno; xe e le dithopa tša e mongwê, O se di utollê.” Ka dinako tše dingwe diphapano tša lenyalo di akaretša ditaba tša motho ka noši tša ka thopeng. Go sa šetšwe gore o dumela se goba go se bjalo, mohlomongwe go kaone gore o se ke wa kwa mabapi le dilo tše bjalo. Ka ntle le moo, go utolla “dithopa” gantši go dira gore boemo bjo bobe bo mpefalele pele. O ka ikwa o sekametše go thekgeng yo mongwe—e lego feela go katološa karogano ka lapeng leno. Ka gona, mafelelong o ka ba boemong bjo bobotse ge e ba batswadi ba gago ba uta ditaba ka botlalo tša diphapano tša bona.

Lwantšha Sekgopi ka go Hwetša Temogo

Lega go le bjalo, go thata go se ikwe o befetšwe e bile o kgopišegile ge tatago a tlogile gae gomme o ka se kgone go araba potšišo ya gore, Ka baka la’ng? Lega go le bjalo, go Diema 19:11 (PK) Beibele e re: “Tlhaologanyo e diegiša motho [ga se gore e fediša] go befelwa.” Le gona ga go nyakege gore o tsebe ditaba ka moka ka botlalo gore o be le temogo.

Ka mohlala, Beibele e re thuša go bona gore batswadi ba rena ga se ba phethagala. E re: “Ba dirile dibe bohle, ba hlaya letaxô la Modimo.” (Ba-Roma 3:23) Go amogela therešo ye e kwešago bohloko go ka go thuša go lebelela diphošo tša batswadi ba gago ka pono e nepagetšego. Ka mohlala, ge e ba tatago a hlompholotše dikeno tša gagwe tša lenyalo, seo ke phošo e kgolo—yeo a ikarabelago pele ga Modimo ka yona. (Ba-Hebere 13:4) Eupša se ga se gore se bolela gore o go lahlile goba gore ga a go rate.

Balekane ka moka ba lenyalo ba welwa ke “tlaišego nameng.” (1 Ba-Korinthe 7:28, NW) Le ge go se na lebaka la go iphahlelela bakeng sa go dira ga bona bjalo, banna le basadi ba bangwe ba ineela go direng phošo ka tlase ga dikgateletšo tša bophelo lefaseng le le le dubegilego. Robert o gopola gore: “Tate o be a re nyakela tše kaone. O ile a hudušetša lapa lefelong leo go lona a bego a nagana gore a ka hwetša mekgwa e kaone ya go iphediša e le gore re ka ba le ntlo e botse gomme lapa le be le thabe.” Eupša maiteko a tatagwe ao a nago le maikemišetšo a mabotse a go hweletša lapa la gagwe bophelo bjo bokaone kapejana a ile a folotša. Robert o hlalosa gore: “Tate o ile a nyefiša go ya dibokeng tša Bokriste. Ka morago o ile a lahlegelwa  ke mošomo wa gagwe. Ka morago ga lebaka le itšego o ile a thoma go goboša mma le kgaetšedi ya-ka.” Go se go ye kae dilo di ile tša senyega go fihla bokgoleng bjoo tatagwe le mmagwe ba ilego ba hlalana.

Robert a ka ba a ile a metšwa ke bohloko ka baka la diphošo tša tatagwe. Eupša go ba le temogo ka boemo bja tatagwe go ile gwa fokotša pefelo ya gagwe. Gaešita le ge go phumega ga lenyalo la batswadi ba gagwe e be e le mo go nyamišago, fela go rutile Robert selo se sengwe se bohlokwa. Robert o re: “Ge ke thoma lapa, dilo tša moya di swanetše go tla pele.”

Michael yo go boletšwego ka yena pejana, le yena o ile a swanelwa ke go lwantšha maikwelo a bohloko. O dumela gore: “Ke be ke nyaka go kweša tate bohloko ka baka la seo a re dirilego sona.” Eupša o ile a kgomarela tswalano le tatagwe. Ge nako e dutše e feta, Michael o ile a ba a tlogela pefelo ya gagwe gomme a tšwela pele le bophelo bja gagwe.

Le wena o ka nyaka go leka go kgomarela tswalano le tatago e le e tlwaelegilego ge boemo bo dumela. Ke therešo gore a ka ba a kwešitše wena le mmago bohloko. Eupša mohlomongwe ga o tsebe ditaba ka botlalo. Gaešita le ge o tseba gore o na le molato phošong, e sa dutše e le tatago. O tlamegile go mmontšha bonyenyane tekanyo e itšego ya tlhompho. (Ba-Efeso 6:1-3) Phema “pefelo, le bogale, le lešata, le thogako” ge o dirišana le yena. (Ba-Efeso 4:31, PK) Ge e ba go kgonega, o se tšee lehlakore mabapi le diphapano tša batswadi ba gago tša lenyalo. Ka go kgodiša bobedi batswadi ba gago gore o a ba rata, o ka kgona go thabela ditswalano tše dibotse le bona ka bobedi.

Ga se Molato wa Gago

Go bona tatago a tloga gae mo gongwe ke se sengwe sa dilo tše kwešago bohloko kudu tšeo o kilego wa ba le tšona. Eupša gaešita le ge o se wa ka wa hwetša mabaka ka moka a go tloga ga gagwe, ga go nyakege gore o nagane gore ke molato wa gago. Ke therešo gore go ka bonala eka ke go furalelwa ga gago. Eupša ke ka sewelo manyalo a phumegago ka baka la bana. Batswadi ba gago ba dirile keno pele ga Modimo gore ba tla dula gotee. Ke boikarabelo bja bona—e sego bja gago—go phela ka go dumelelana le yona.—Mmoledi 5:3-5.

Lega go le bjalo, ge e ba o ikwa o gakanegile, o le molato goba o ikarabela, ke ka baka la’ng o sa leke go botša batswadi ba gago? Ba ka fo bolela le wena ka bolokologi gomme ba go fa kgonthišetšo e nyakegago. James yo a tsopotšwego mathomong o dumela gore: “Ke be ke fela ke nagana gore ke tla bewa molato, go fihlela ge mma le tate ba mpea fase gomme ba boledišana le nna.” Nancy yo mofsa ka mo go swanago o ile a ikwa a le molato ge tatagwe le mmagwe ba be ba arogana. Ka morago ga go ba le dipoledišano tše dintšinyana le mmagwe, Nancy o ile a kgona go phetha ka gore: “Bana ga se ba swanela go ipona molato ka seo batswadi ba bona ba se dirago.” Ee, go tlogelela gore batswadi ba gago ba ‘rwale morwalo wa bona ka noši’ wa boikarabelo go ka go thibela gore o ikwe o imetšwe kudu maikwelong. (Ba-Galatia 6:5, bapiša le NW.) Eupša o ka lebeletšana bjang le boemo ka katlego mola e le gore gona bjale o phela lapeng leo le se nago tate? Sehlogo sa nakong e tlago lelokelelong le se tla nea dikarabo.

[Mengwalo ya ka tlase]

[Seswantšho go letlakala 15]

O se ke wa ipea molato bakeng sa mathata a batswadi ba gago a lenyalo