Pono e Thabišago go sa Šetšwe Malwetši

KA GE GO ANEGA KONSTANTIN MOROZOV

Ge ke be ke belegwa ka July 20, 1936, go be go se na marapo ao a bopegilego mmeleng wa-ka ge e se feela legata le mokokotlo. Marapo a-ka ka moka a mmele a be a bopilwe ke lehihiri le le sesane leo go tia ga lona go bego go swana le lehihiri la tsebe ya motho yo mogolo. Ke be ke e-na le boima bja ka tlase ga seripa sa khilograma. Ditšhupetšo di nnoši tša bophelo tšeo di bego di bonagala e be e le go thebetha mo go fokolago ga pelo, go hema mo go fokolago le boitšhišinyo bjo sego nene.

KE BE ke le wa bošupa wa bana ba senyane ka lapeng leo le bego le dula motsaneng wa Sara, kua Ul’yanovsk Oblast mpeng ya Russia. Ge ke be ke e-na le dibeke tše tharo, batswadi ba-ka ba ile ba nkiša kerekeng bakeng sa go kolobetšwa. Kapejana moruti o ile a ntšhašetša ka meetse gomme a botša batswadi ba-ka gore ba nkiše gae kapejana ka mo go ka kgonegago ka ge a be a boletše gore ke tla hwa diiring tše sego kae.

Ka January 1937, batswadi ba-ka ba ile ba nkiša motseng wa Kazan’, mošate wa repabliki ya Russia ya Tatarstan bakeng sa go nkiša go ditsebi tše dingwe. Ka nako yeo ke be ke kgona gore “Mama,” “Papa” le “Babushka” (Makgolo) gomme ke be ke tseba maina a banabešo. Ka morago ga ge dingaka di ntlhahlobile, di ile tša botša batswadi ba-ka gore ke tla hwa lebakeng la ngwaga. Di ile tša šišinya gore ke bolawe gomme ke bolokwe ka lepotlelong la folaseka gore ke be sebontšhwa seo se tlago go ba thušo e bonalago bakeng sa barutwana ba tša kalafo. Ke leboga gakaakang batswadi ba-ka ba ba rategago bao ba ilego ba gana ka mo go feletšego!

Bjana bja go Tlaišega

Go fihla bokgoleng bjo nka gopolago, mmele wa-ka o be o dutše o tlaišwa ke mahlaba ka mo go sa kgaotšego. Lega go le bjalo, gaešita le ge ke be ke sa le ngwana, ke ile ka katanela go kgomarela boemo bjo bo nepagetšego bja kgopolo gomme ka leka go sega ka mehla le go thabela bophelo. Ye ke tshekamelo yeo ke ilego ka e kgomarela. Marapo a-ka a mmele a ile a tielela ganyenyane-ganyenyane gomme ke ile ka kgona go dula le go abula ganyenyane. Ga se ka gola bjalo ka bana bao ba phetšego gabotse gomme ke be ke golofetše o šoro. Eupša ke be ke le morutwana yo a kgonago gomme ge ke e-na le nywaga e mehlano, ke be ke kgona go bala le go ngwala.

Ka May 1941, mma o ile a nkiša kerekeng ka lekga la bobedi. Go be go na le batho ba mmalwa moo gomme ka moka ba be ba khuname ka matolo ba rapela. Mohlokomedi wa mosadi o ile a tla go mma bakeng sa go botšiša lebaka leo ka lona a sa khunamago fase. Ge mma a mmontšhitše nna, o ile a ya go boledišana le moruti. Ge a boa, mohlokomedi o ile a re felegetša mojako gomme a šišinya gore mma a ntlogele ka ntle ga mojako gomme a tsene ka gare a nnoši. O be a dumela gore  ka baka la dibe tša batswadi ba-ka, ke be ke ba neilwe ke “yo a sa hlwekago.” Mma o ile a boela gae a sekišitše megokgo. Ke ile ka nagana ka se ka lebaka le letelele. Ke be ke ipotšiša gore, ‘Ke mang yo “yo a sa hlwekago”?’

Ka 1948, ge ke e-na le nywaga e 12, mma o ile a nkiša motsaneng wa Merenki ka Repabliking ya Chuvash, mo e ka bago dikhilomithara tše 80 go tloga legaeng la rena. Go be go na le lefelo la methopo ya tlhago moo, gomme mma o be a holofela gore ke be ke tla alafša ke meetse. Gare ga maemo a mangwe ao moruti a ilego a a bea bakeng sa go alafša ga-ka e be e le gore ga se ka swanela go ja lebaka la matšatši a mararo. Gape ke be ke swanetše go hwetša Selalelo ka kerekeng. Gaešita le ge ke be ke sa bote kereke kudu, ke ile ka dumelelana le dinyakwa. Go nna leeto e be e le le letelele le le thata, eupša ke ile ka kgotlelela, ka leka go lebiša tlhokomelo ya-ka botseng bja ponagalo ya naga.

Kereke e be e tletše ka batho. Ge mma a be a mpelege a phatša lešabeng, mokgekolo o ile a mpha seripana sa lelekere. Ke ile ka le tšea gomme ka le tsentšha ka potleng ya-ka. Ge nako ya-ka ya gore ke amogele Selalelo e fihla, mokgekolo o ile a goeletša ka gore: “Tate, o se ke wa mo nea Selalelo! O sa tšwa go ja seripana sa lelekere!” Ke ile ka hlalosa gore seripana sa lelekere se be se le ka potleng ya-ka, eupša moruti o ile a goeletša ka gore: “Wena selo se makatšago sa maroga le lenyatšo! O sa bolela maaka gape? Mo tlošeng ka kerekeng!” Lega go le bjalo, letšatšing leo le latelago, moruti yo mongwe o ile a dira tirelo ya Selalelo gomme a ntlhapiša ka meetse a “mohlolo.” Lega go le bjalo, ga se gwa ba le mohlolo. Malwetši a-ka a ile a dula a le gona.

Tšeo di Fihleletšwego ka Bohlale

Gaešita le ge ke be ke golofetše o šoro mmeleng, nakong ya bofsa bja-ka ke ile ka phegelela dipakane tše dintši tša thuto le bohlale. Ka 1956 ke ile ka tlatša Komsomol (Kgwerano ya Bafsa ya Bokomanisi) gomme ge nako e dutše e e-ya, ke ile ka ruta bafsa histori ya Komsomol. Ke be ke le setho sa Khomišene ya Legae le Setšo legaeng la bao ba golofetšego gomme ke ile ka šoma moo gape ke le molaodi le mogaši wa radio.

Go oketša moo, ke be ke le rabokgobapuku wa bokgobapuku bja go šuthišwa bja dipuku tše di gatišitšwego bakeng sa difofu, gomme ke ile ka kgethelwa go ba setho ka Khomišeneng ya Boahlodi bakeng sa Ntwa Kgahlanong le go Diriša Dino tše di Tagago Gampe. Gape ke ile ka tšea karolo sehlopheng sa bokgabo bja go itekela, go opela le go bapala diletšo tše di fapa-fapanego tša mmino.

Legaeng la Bao ba Golofetšego

Ka 1957, ge ke e-na le nywaga e 21, malwetši a-ka a mmele a ile a nkgapeletša go ya legaeng la bao ba golofetšego. Lega go le bjalo, ke be ke sa ikemišetša go lesetša. Ka October 1963, ke ile ka sepela bakeng sa Prosthetic Science Research Institute ya Moscow. Mafelelong moo ke ile ka buiwa ka makga a 18 bakeng sa go otlollwa maoto.

Sa pele, maoto a-ka a ile a otlollwa. Ke moka ka morago ga matšatši a seswai, go bua go ile gwa dirwa. Go latela seo, samente se ile sa tsenywa maotong a-ka bakeng sa go a boloka a otlologile go fihlela go bua mo go latelago. Mooki o be a lla ge a be a bona kamoo ke bego ke tlaišega kudu ka gona.

Lebakeng la dikgwedi tše nne tše di latetšego, ke ile ka ithuta go sepela ka mahlotlo. Nka kgona go ikemiša ka mahlotlo go fihlela ke e ba kgaufsi le botelele bja disenthimithara tše 110. Ke be ke imela bonyenyane ka godimo ga dikhilograma tše 25. Gatee-tee ge ke šetše ke kgona go sepela ka mahlotlo, ke ile ka boela legaeng la bao ba golofetšego ka 1964. Ka manyami, marapo a-ka ao a fokolago a maoto a be a ka se kgone go kgotlelela ka tlase ga boima bja mmele wa-ka gomme kapejana ke ile ka gapeletšega gape go sepela-sepela ka go abula goba ka thušo ya setulo sa digole. Setulo sa digole ke sedirišwa sa-ka se segolo sa go sepela go fihlela le lehono.

Ga se ka hlwa ke sa ya kerekeng gape. Polelo ya gore ke belegwe ke “yo a sa hlwekago” e ile ya tšwela pele e ferekanya moya wa-ka kudu. Ke be ke rata tate le mma kudu-kudu gomme e le feela gore nka se amogele gore bona le Modimo ba na le molato bakeng sa boemo bja-ka. Ke ile ka leka go boloka pono e thabišago go sa šetšwe bomadimabe. Ke be ke nyaka go direla ba bangwe botse, gomme go feta tšohle ke ipontšhe ka noši gore ke be ke kgona go dira bjalo.

 Go Phela Bophelo bja go Ikemela

Ka 1970 ke ile ka nyala Lidia yo a bego a hwile ditho ganyenyane ga e sa le go tloga bjaneng. Re ile ra reka ngwako o monyenyane wo re ilego ra dula ka go wona ka nywaga e 15. Nakong yeo bobedi bja rena re ile ra šoma bakeng sa go iphediša. Ke ile ka ithuta go lokiša dišupanako le maano a go lokiša dilo tše dingwe tše dinyenyane.

Ke ile ka šomiša mpša e tlwaeditšwego ka nakwana bakeng sa go phetha ditirelo tše mmalwa tše bohlokwa. Ge e le gabotse, nna le yo a ilego a tlwaetša mpša re ile ra loga maano a go e direla teigi e kgethegilego. Ke be ke na le dimpša tše pedi—e nngwe leina la yona e be e le Vulkan gomme e nngwe e le Palma. Palma e bile mogwera yo a botegago ka nywaga e mentši. Lebenkeleng e be e nthwalela dijo. Selo setee seo e bego e sa se rate e be e le go ema mothalading ge re lefa. E be e swara sekhwama sa-ka ka meno a yona gomme e be e e-na le huku e nyenyane sekgapeng sa yona bakeng sa mokotla wa-ka wa go ya lebenkeleng.

Ka 1973 mma o ile a babja o šoro. Ka ge ke be ke dula ke le ka gae ka mehla, nna le mosadi wa-ka re ile ra phetha ka go mo tliša bakeng sa go dula le rena. Ka nako yeo tate le banabešo ba bahlano ba be ba hwile gomme banabešo ba bangwe ba bararo ba be ba dula dikarolong tše dingwe tša Russia. Ge mma a be a dula le rena, ke ile ka leka go mo direla sohle seo nka se kgonago. Mafelelong o ile a hwa a e-na le nywaga e 85.

Ka 1978 ke ile ka ikemišetša go itlhamela koloi. Ka morago ga go šoma ka maitekelo a fapa-fapanego a dikoloi, ke ile ka feleletša ka yeo e swanetšego. Mohlahlobi wa Dikoloi wa Mmušo wa lefelong o ile a ntumelela go dira teko ya go otlela le go ngwadiša koloi ya-ka. Ke ile ka e rea leina la Osa (Mantlakane). Nna le mosadi wa-ka re ile ra e direla koloyana e nyenyane yeo e ka rwalago boima bja go fihla go dikhilograma tše 300. Bobedi bja rena re be re kgona go sepela ka yona le go rwala dilo gotee le rena. Koloi ye yeo e nago le motšhene wa go e sepetša e ile ya re thuša go fihla ka 1985.

Mo e ka bago ka nako yona ye leihlo la-ka la ka lehlakoreng la ntsogošo le ile la foufala gomme pono ya leihlo la-ka la ka lehlakoreng la go ja e ile ya senyega. Ka morago Lidia o ile a swarwa ke bolwetši bja pelo. Ka baka la mafokodi a rena, re ile ra gapeletšega go hudugela legaeng la batho bao ba golofetšego motseng wa Dimitrovgrad ka May ya 1985.

Lebaka Leo Bophelo Bja-ka e Lego bjo bo Thabišago Gabjale

Selemong sa 1990, Dihlatse tša Jehofa di ile tša etela legae la rena la bao ba golofetšego. Ke ile ka hwetša seo di bego di se ruta e le seo se kgahlišago kudu. Di ile tša mpontšha ditemana ka Ebangeding ya Johane tšeo di lego mabapi le motho yo a tswetšwego e le sefofu. Mabapi le yena Jesu o itše: “Xa xo a senya yêna, le xe e le batswadi ba xaxwe.” (Johane 9:1-3) Ke ile ka hlalosetšwa gore re abetše sebe le malwetši go rakgolo wa rena Adama.—Ba-Roma 5:12.

Lega go le bjalo, sa bohlokwa kudu ke gore ke ile ka thabišwa ke therešo ya gore mafelelong Modimo o tla fodiša bohle bao ba tlago go hwetša bophelo ka tlase ga pušo ya Mmušo wa Morwa wa gagwe Jesu Kriste, ge Paradeise e tla ba e tsošološitšwe mo lefaseng. (Psalme 37:11, 29; Luka 23:43; Kutollo 21:3, 4) Megokgo ya lethabo e ile  ya elela sefahlegong sa-ka, gomme ke ile ka heba-hebetša ka gore: “Ke hweditše therešo, therešo, therešo!” Ke ile ka ithuta Beibele le Dihlatse tša Jehofa lebaka la ngwaga, gomme ka 1991 ke ile ka kolobetšwa meetseng e le leswao la boineelo bja-ka go Jehofa Modimo.

Gaešita le ge ke ile ka hlagolela kganyogo e matla ya go hlankela Jehofa le go bolela ka merero ya gagwe e kgahlišago, ke ile ka lebeletšana le mapheko a mantši. Nakong e fetilego, go be go sa nyakege kudu gore ke tloge lefelong le go ya go le lengwe, eupša ga bjale go nyakega gore ke tšwele ka ntle bakeng sa go abelana tumelo ya-ka le ba bangwe. Tšhemo ya-ka ya mathomo ya boboledi e be e le legae la rena la bao ba golofetšego, moo go bego go dula batho ba ka godimo ga 300. E le gore ke tle ke kopane le batho ba bantši ka mo go ka kgonegago ka gona, ke ile ka kgopela go abelwa go šoma ka phapošing ya ditaba tša lapa.

Mesong e mengwe le e mengwe ke be ke dula lefelong la-ka la mošomo gomme ke hlokomele dikabelo tša-ka. Ge ke dutše ke tšwela pele le mošomo wa-ka, ke dirile bagwera ba bantši ba bafsa bao ke bago le dipoledišano tše kgahlišago le bona ka dihlogo tša Beibele. Bontši bja bona ba ile ba amogela dipuku le dimakasine tšeo di ilego tša ba thuša go kwešiša Beibele. Baeti ba be ba tlwaetše gore ke ba balele go tšwa Beibeleng le dikgatišong tšeo di theilwego Beibeleng. Ka nako ya matena, gantši go ba le batho ba bantši kudu ka phapošing yeo nna le mosadi wa-ka re dulago go yona moo ka dinako tše dingwe go se nago yo mongwe yo a ka tsenago.

Banabešo le dikgaetšedi ba Bakriste ba phuthegong ya Dihlatse tša Jehofa ba ile ba nthuša kudu modirong wa boboledi. Ba ntlišetša dipuku tša Beibele gomme ba fetša nako ba dutše le nna le mosadi wa-ka. Gape ba nthuša ka go nkiša Holong ya Mmušo bakeng sa diboka tša phuthego. Hlatse e nngwe e ile ya reka sethuthuthu sa go ba le koloyana yeo e kgomagantšwego le sona ka morero wa go nnametša. Ba bangwe bao ba nago le dikoloi, ka lethabo ba tla go ntšea nakong ya dikgwedi tša go tonya tša marega.

Ka baka la tlhokomelo e bjalo e lerato, ke ile ka kgona go kopanela dikopanong tše dintši goba diboka tša thuto tša Dihlatse tša Jehofa. Kopano ya-ka ya mathomo e bile kopano e kgolo ya ditšhaba-tšhaba kua Moscow ka July 1993, moo tlhora ya ba bilego gona e bilego 23 743, go tšwa dinageng tše fetago tše 30. Go nna go ba gona pokanong yeo go be go bolela go sepela leeto la mo e nyakilego go ba dikhilomithara tše 1 000. Ga e sa le go tloga nakong yeo go ya pele, ga se ka ka ka foša kopano ya batho ba Jehofa.

Balaodi ba legae la rena la bao ba golofetšego ba ntlhompha ka mo go tseneletšego, e lego seo ke se lebogago kudu. Mosadi wa-ka, Lidia, yo ke phetšego ka go dumelelana le yena lebaka la nywaga e 30, le yena o a nthekga le go nthuša gaešita le ge a se na dipono tše swanago le tša-ka tša bodumedi. Eupša sa bohlokwa kudu, Jehofa o nthekga ka letsogo la gagwe le matla gomme o ntšhegofatša ka ditšhegofatšo tša gagwe tše dikgolo. E sego kgale kudu ka September 1, 1997, ke ile ka kgethwa go ba mmulamadibogo bjalo ka ge badiredi ba nako e tletšego ba Dihlatse tša Jehofa ba bitšwa bjalo.

Go bile le makga a mmalwa bophelong bja-ka moo pelo ya-ka e ka bego e ile ya ema gomme nkabe ke ile ka hwa. Ke thabile kudu gakaakang ga bjale gore seo ga se sa direga le gore ke ile ka tseba le go rata Mothopo wa bophelo, Jehofa Modimo! Ke nyaka go tšwela pele go mo hlankela gotee le banabešo ba moya le dikgaetšedi lefaseng ka bophara ge feela pelo ya-ka e sa tšwela pele e thebetha.

[Seswantšho go letlakala 30]

Ke e-na le mosadi wa-ka, Lidia

[Seswantšho go letlakala 31]

Go ruta morutwana legaeng la rena la bao ba golofetšego