O a Belaela Eupša o sa Dutše a Tsoma

MONNA yo a boletšego gore o ile a kolobetšwa e le mo-Roma Katholika, o ile a kgopela ka lengwalong le le yago ofising ya lekala ya Dihlatse tša Jehofa kua Slovenia, gore: “Hle nthomeleng kopi ya poroutšha ya Ke Eng Seo Modimo a se Nyakago go Rena? Ke tla thabela gape tsebišo e itšego ya kamoo nka hwetšago makasine wa Phafoga! ka mehla legaeng la-ka.”

Monna o hlalositše gore: “Hle le se nkweleng thoko. Ke fo ba ke le motho wa go belaela ge go tliwa tabeng ya bodumedi, eupša ka kakaretšo ke ile ka makala ge ke bala Phafoga! ka ge le gatee e be e sa gatelele dipono tša yona ka mo go feteletšego eupša e hlalosa dilo ka tsela ya go lebanya le ka mokgwa wa go ruta.” Ke moka o ile a šupa go makasine o mongwe o tumilego kudu wa bodumedi gomme a bolela gore o tloga o timetša batho e le ka kgonthe.

Monna o ile a hlalosa lebaka leo ka lona a sego a tlatša setlankana se se lego ka morago ga Phafoga! bakeng sa go kgopela poroutšha ya Seo Modimo a se Nyakago eupša go e-na le moo a kgethile go ngwala lengwalo la motho ka noši. O itše: “Ke be ke sa nyake go senya makasine wa Phafoga! Ke be ke nyaka go o boloka o feletše!”

Poroutšha ya matlakala a 32 ya Ke Eng Seo Modimo a se Nyakago go Rena? e hupere dithuto tše 16. Go tšona go hlaloswa dithuto tša motheo tša Beibele gomme gwa newa tsebišo e tšwago Beibeleng go bontšha seo re swanetšego go se dira gore re amogelwe ke Modimo. Ge e ba le wena o tla rata go kgopela kopi ya poroutšha ye, tlatša setlankana seo se sepelago le sehlogo se gomme o se romele atereseng e bontšhitšwego setlankaneng goba atereseng e swanetšego e lokeleditšwego go letlakala 5 la makasine wo.

□ Hle nthomeleng kopi ya poroutšha ya Ke Eng Seo Modimo a se Nyakago go Rena?

Bontšha gore ka leleme lefe

□ Hle ikopanyeng le nna mabapi le thuto e sa lefelelwego ya legae ya Beibele.

[Seswantšho go letlakala 32]

Dikopi tše dimilione tše 113 ka maleme a 240