Ge Mathata a Hlobaetšago a tša Maphelo a go Aparela

“Ke be ke ikwa eka ke bethilwe ka noto e kgolo e boima.”—John ka morago ga gore a tsebe gore o na le bolwetši bjo bo golofatšago.

“Ke be ke boifa.”—Beth ka morago ga go lemoga bogolo bja mathata a gagwe a hlobaetšago a tša maphelo.

GO TSEBA gore o na le bolwetši bjo šoro le bjo bo golofatšago goba gore dikgobalo tše di bakilwego ke kotsi di tla go tlogela o golofaletše sa ruri, ke e nngwe ya diphihlelo tše kwešago bohloko kudu tša bophelo. Go sa šetšwe gore o kwa ditaba tša bolwetši bja gago ka ofising e homotšego ya ngaka goba o begelwa ka go lebanya ka ga boemo bja gago bja go golofala ka phapošing ya leema-ema ya balwetši ba tšhoganyetšo, go bonala o ikhwetša o le boemong bja go se dumele. Ga se dilo tše dintši bophelong tšeo di go lokišeletšago go lebeletšana ka katlego le maikwelo a matla kudu ao a go aparelago ge o tshwenywa ke mathata a hlobaetšago le ao a senyago a tša maphelo.

Bakeng sa go kgoboketša tsebišo yeo e ka thušago bao boemo bja bona bja tša maphelo bo sa tšwago go thoma go fokola o šoro, Phafoga! e boledišane le batho ba mmalwa dinageng tša go fapa-fapana bao ba ilego ba lebeletšana ka katlego le bolwetši bjo šoro bjo bo golofatšago ka nywaga e mentši. Ba ile ba kgopelwa gore ba nee ditlhaloso tša bona dipotšišong tše bjalo ka tše rego: Ke maikwelo afe ao le ilego la ba le wona? Ke eng seo se le thušitšego go kgotlelela mathata le go hwetša boitseparelo bja lena gape? Ke megato efe yeo le ilego la e gata bakeng sa go hwetša taolo e itšego gape maphelong a lena? Tsebo ya go tšwa boitemogelong yeo e tšwago dipoledišanong tše gotee le dikutollo tše dingwe tša banyakišiši bao ba ithutago ka ditla-morago tša malwetši a nako e telele, di newa bakeng sa go thuša bao ba lebeletšanego le mathata a hlobaetšago a tša maphelo gona bjale. *

[Mongwalo wa ka tlase]