Go Kgotlelela ka Lethabo Lefaseng la Leema-ema

Batho Ba Bantši Ba Kgotlelela Dikgateletšo Tša Bophelo, Eupša Ke Ba Sego Kae Bao Ba Kgotlelelago Ka Lethabo. Seo Se Nyaka Mohuta O Kgethegilego Wa Bohlale.

KA GO lemoga se, puku ya The 24-Hour Society e re: “Re swanetše go hlagolela bohlale bakeng sa go šireletša dinyakwa le tlhago ya motho mo lefaseng la thekinolotši leo re le bopilego.”

Ka mo go thabišago, bohlale bjo bo šomago bo dutše bo hwetšagala ka pukung yeo e abilwego kudu lefaseng—Lentšu la Modimo, Beibele. E buduletšwe ke Yo a kwešišago dinyakwa le tlhago ya motho ka mo go phethagetšego, Beibele e hupere melao ya motheo yeo e lekilwego le ya therešo. Go diriša melao ye ya motheo go ka go thuša go hwetša taolo e oketšegilego bophelong bja gago, gwa  go nea bonyenyane tekanyo ya lethabo ge o dutše o kgotlelela lefase la lehono la leema-ema.—Jesaya 48:18; 2 Timotheo 3:16.

Melao ye ya motheo e bolela ka mafelo a mararo a motheo. Sa pele, e šupa moo o ka fokotšago gona ka bohlale. Sa bobedi, e ka go thuša go rulaganya dilo tše di tlago pele ka bohlale. Sa boraro, e nea pono ya moya ka bophelo yeo e phagametšego kudu pono yeo e lego ya lefase ka mo go feletšego. Anke ga bjale re ahla-ahleng mafelo a a mararo.

Boloka Bophelo bo le Bonolo bo sa Hlaka-hlakana

Akanya o e-ya go kampa matšatši a sego kae. O nyaka go iketla, ka gona o tšea tente e kgolo le dilo ka moka tše di gopolegago. O tšea gape le koloyana yeo e tletšego phahlo, ditlabakelo tša go apea, setšidifatši, generator ya go rwalega, mabone, TV le dilo tše dingwe tše dintši go akaretša le dijo. Lega le bjalo, go beakanya dilo tše ka moka go go tšea diiri tše dintši! Ke moka, mafelelong a maikhutšo a gago a makopana o tšea nako e nngwe e ntši o phutha gape—re se sa bolela ka go beakanya selo se sengwe le se sengwe ka gae. Ge o lebelela morago, o lemoga gore ga se wa ba le nako e lekanego bakeng sa go thabela go kampa! O ipotšiša ge e ba go be go swanelwa ke boiteko ka moka.

Go dimilione tša batho lehono, bophelo ka bobjona bo swana le leeto leo la go kampa. Ba fetša tekanyo e feteletšego ya nako ba kgobela le go phegelela dilo tše di sa felego tše di bonagalago tšeo lefase le ka re dirago gore re dumele gore re a di nyaka e le gore re thabe. Ka mo go fapanego, Jesu Kriste o itše: “Bophelô bya motho xa bo tšwe lehumong le xo tše a di ruilexo.” (Luka 12:15) Ee, boemo bja bophelo ga bo lekanywe ka lehumo la dilo tše di bonagalago. Ge e le gabotse, lehumo gantši le tlaleletša dikgateletšong tša bophelo le dipelaelong. Mmoledi 5:11 (PK), e re: “Go hora ga mohumi go mo hlokiša boroko.”

Ka gona, lebeledišiša ka kelohloko thoto e nngwe le e nngwe ya gago, gomme o ipotšiše gore, ‘Na se se tloga se nyakega e le ka kgonthe goba e fo ba motlalo? Na e tlaleletša boemong bjo bobotse bja bophelo bja-ka, goba e utswa nako e bohlokwa?’ Matseno a puku ya Why Am I So Tired? yeo e ngwadilwego ke Leonie McMahom, e bolela gore: “Go hwetša ditlabakelo tše di fapa-fapanego, tšeo di reretšwego go fediša tapišego  modirong wa ka ntlong, go feleletša ka go dira gore mosadi wa lapa a šome mošomo wa boiphedišo e le gore a di reke le go di lefelela gore di lokišwe.”

Ge o nolofatša bophelo bja gago, o bula nako e ntši bakeng sa lapa la gago, bagwera le wena ka noši. Nako e bjalo e bohlokwa bakeng sa lethabo la gago. O se ke wa ba bjalo ka bao ba lemogago maloba e šetše e le maabane bophelong gore bagwera le lapa ke ba bohlokwa kudu-kudu—le go ba ba kgahlišago—go feta tšhelete le ditlabakelo tša sebjale-bjale. Ke batho feela bao ba ka go ratago. Diakhaonto tša panka, mangwalo a panka a di-stock, di-computer, dithelebišene le dilwana-lwana tše dingwe, gaešita le ge di ka ba le sebaka sa tšona, ke legapi la ka ntle la bophelo e sego pelo ya bjona. Bao ba etišago dilo tše bjalo pele ba tšeela maphelo a bona tlase gomme mafelelong e ba bao ba sa kgotsofalago goba gaešita le go ba ba kwelego bohloko.—1 Timotheo 6:6-10.

Laola Nako Gomme o Rulaganye Dilo Tšeo di Tlago Pele

Maemong a mangwe go laola nako go swana le go lekanyetša thulaganyo ya tša ditšhelete. Ge e ba o nyaka go ba le dilo tše dintši ka diiri tše di lekanyeditšwego tšeo o nago le tšona, ga o diriše nako ya gago ka bohlale. Mokgwa o bjalo wa bophelo ka mo go sa phemegego o lebiša pherekanong, kgateletšegong le go lapeng. Ka gona, ithute go rulaganya dilo tše di tlago pele.

Sa pele, hwetša gore ke dilo dife tšeo di lego bohlokwa gomme o fetše nako e  lekanego go tšona. Go Bakriste, dikgahlego tša moya di tla pele-pele ka mehla. (Mateo 6:31-34) Ge e ba ditaba tše bohlokwa di fetišwa ka lebelo goba di lokišwa ka mo go sa tsenelelago, gantši go latela mathata a magolo. Ka gona, o ka swanelwa ke go tloša selo se sengwe le se sengwe seo se jago nako eupša se se na mohola.

Ge o rulaganya dilo tše di tlago pele, naganišiša ka go nyaka ga gago go ba noši go se nene—nako bakeng sa go naganišiša mo go holago le go imatlafatša gape. Psychology Today e re: “Nako e bohlokwa ya go ba noši ke sematlafatši seo se nyakegago lefaseng la lehono leo le kitimago. . . . Nako ya go ba noši ke sebešeletši sa bophelo.” Batho bao ba swaregilego kudu go ka naganišiša, e ka ba bao ba sa tsepamago boemong bja bona bja kgopolo ka bophelo.

Boipoetšo le Boemo bja Moya

Boipoetšo le boemo bja moya ke a mabedi a matlotlo a kaone kudu ao o ka bago le ona ge go tliwa go pheleng bophelo bjo bo thabilego le bjo bo leka-lekanego. Boipoetšo bo bohlokwa ka gobane bo go thuša go phema go rwala morwalo o sa swanelago wa mošomo le boikarabelo. Ge e ba o ipoeditše, o tla tseba nako yeo o swanetšego go gana mošomo wa nako e oketšegilego goba mediro e mengwe yeo e ka šwahlelago selo se sengwe se bohlokwa kudu. Batho ba ipoeditšego ga ba tsebafele seo batho ba bangwe ba nago le sona goba seo ba se dirago; go e na le moo, ba sekametše go beng bao ba kgotsofetšego kudu. Le gona, boipoetšo bja kgonthe ke karolo ya boemo bja moya, senotlelo se sengwe se bohlokwa bakeng sa go hwetša taolo e oketšegilego maphelong a rena.—Mika 6:8; 1 Johane 2:15-17.

Boemo bja moya bjo bo theilwego tsebong e nepagetšego ya Beibele, bo go dira motho yo a lemogago le yo bohlale—motho yo a sa forwego ke ditlhaloso tša lefase ka katlego. O kwa keletšo e bohlale ya 1 Ba-Korinthe 7:31 e rego: “[Anke] ba ba phelaxo ka tša lefase ba etšê ba ba sa phelexo ka tšôna [ka mo go tletšego, NW], xobane sebopêxô sa lefase leno se a lôba [“fetoga,” NW].” Bakriste ba ‘phela ka tša lefase’ ge ba itlhokomela bona le malapa a bona ka dilo tše di bonagalago, eupša ga ba dumelele lefase le le ba metša. Ba a tseba gore ga le nee tšhireletšego ya kgonthe, gore kgaufsinyane le tla senywa ka mo go feletšego le gore katlego ya kgonthe—tšhireletšego le bophelo bjo bo sa felego lefaseng la paradeise—di ithekgile ka boemo bja motho le Modimo. (Psalme 1:1-3; 37:11, 29) Ka gona, e-kwa keletšo ya Jesu le go ikhola ka go ikgobelela ka bohlale ‘mahumo legodimong, mo go sa senyego tshwele le diji, mo go sa phulego mahodu a utswa.’—Mateo 6:20.

Phema Pelaelo Gomme o Hwetše Khutšo ya Kgonthe

Ge tshepedišo ye ya gona bjale ya dilo e batamela bofelong bja yona, dikgateletšo le dinyakwa nakong ya gago ka ntle le pelaelo di tla oketšega. Ka gona, ke gabohlokwa gakaakang gore o katanele go kwa keletšo ya Beibele e rego: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” Khutšo e bjalo ga e fihlelelwe ke motho le ge e le ofe yo a nago le pono yeo e lego ya lefase ka mo go feletšego yo a sa bonego bohlokwa bja thapelo.—Ba-Filipi 4:6, 7.

Le gona, Jehofa o tla go nea se se fetago kgole khutšo ya monagano. O tla go thuša go rwala morwalo wa gago wa boikarabelo letšatši le lengwe le le lengwe ge e ba o ‘lahlela dipelaelo tša gago ka moka godimo ga gagwe.’ (1 Petro 5:7; Psalme 68:19) Ka gona, ke gabohlale go theetša Modimo letšatši le lengwe le le lengwe ka go bala karolo ya Lentšu la gagwe. Ke mang mohlomongwe yo a ka go neago keletšo e kaone go feta Mmopi wa gago? (Psalme 119:99, 100, 105) Ee, phihlelo e bontšhitše gore bao ba tsenyago Modimo maphelong a bona ba thušwa kudu go kgotlelela ka lethabo lefaseng la lehono la leema-ema.—Diema 1:33; 3:5, 6.

[Ntlhakgolo go letlakala 23]

Rulaganya dilo tše di tlago pele, go akaretša le go kgotsofatša go nyaka ga gago go ba noši le boemo bja moya

[Seswantšho go letlakala 20, 21]

Na o ka nolofatša le go se hlaka-hlakanye bophelo bja gago?

[Seswantšho go letlakala 22]

Na o etiša pele batho goba dilwana-lwana?