Mosepelo wa Leema-ema wa Lefase le

Na Mosepelo Wa Bophelo O Atiša Go Go Fenya Ka Dinako Tše Dingwe? Na O Go Tlogela O Ferekane, O Lapile E Bile O Tloga O Se Sa Kgona Go Lebeletšana Le Wona Ka Katlego? Ge E Ba Go Le Bjalo, Ga O Noši.

BATHO ba dimilione, kudu-kudu metseng e megolo, ba hwetša gore bophelo e thoma go ba mosepelo o gakantšhago le wo o lapišago. Se se bjalo kudu-kudu dinageng tša ka Bodikela. Sebokeng sa morago bjale sa bodumedi kua United States, seboledi se ile sa kgopela batheetši ba sona gore ba emiše matsogo ge e ba ba ikwa ba lapa nako le nako. Kapejana, matsogo a mantši a ile a ya godimo.

Puku ya Why Am I So Tired? e re: “Bophelo bja mehleng yeno bo tletše ka kgateletšego e sa kago e e-ba gona go fihla ga bjale—go kitimela difofane, dipakane tša nako tšeo di swanetšego go fihlelelwa, bana bao ba swanetšego go išwa le go yo tšewa dikolong tša bo-mapimpana ka nako e beilwego—lelokelelo ga le fele.” Ga go makatše gore go lapa go hlalositšwe e le lenaba la mehla ya rena. *

Nywageng e fetilego, bophelo bo be bo le bonolo gomme mosepelo wa bophelo o be o nanya. Batho ba be ba sekametše go phela kudu tumelelanong le medikologo ya tlhago—nako ya mosegare e be e le ya go šoma gomme nako ya bošego e be e le ya motho le lapa la gagwe le ya go robala. Lehono, go na le mabaka a mmalwa ao ka ona batho ba ikwago ba lapile ka mo go oketšegago le go nolega moko.

Gatee-tee, Matšatši e Šetše e le a Matelele

Lebaka le lengwe e ka ba gore batho ba robala ganyenyane. Le gona, e nngwe ya tlhabologo e lemogegago yeo e hlasetšego nako ya go robala, e bile go fihla ga mabone a mohlagase. Ka go kgwatha konopi, batho ba ka laola botelele bja “letšatši,” gomme batho kapejana ba thoma go robala mašego. Ka kgonthe, batho ba bantši ga ba na kgetho tabeng ye ka gobane difeketori di ile tša thoma go šoma diiri tše 24 ka letšatši gomme tirelo ya diintaseteri e ile ya oketša diiri  tša yona. Mongwadi yo mongwe o itše: “Go tšweletše lekoko la batho ba ba hlwago ba tsogile diiri tše masome-pedi-nne.”

Ditšwelopele tše dingwe tša tša thekinolotši tše bjalo ka radio, thelebišene le computer ya motho ka noši, le tšona di kgathile tema go amogeng batho boroko bjo bo nyakegago. Dinageng tše dintši, mananeo a thelebišene a roropa diiri tše 24 ka letšatši. Ga se mo go sa tlwaelegago bakeng sa barati ba dipaesekopo goba bathekgi ba dipapadi go atiša go robala mošomong le go lapa ka morago ga bošego bjo botelele bja go di bogela. Di-computer tša ka gae le ditloša-bodutu tše sa felego tšeo di di neago, le tšona di goketša ba dimilione go dula go fihla bošego kudu. Go ba gona, ditšweletšwa tše ga se tšeo di fošagetšego ka botšona; lega go le bjalo, di nea batho ba bangwe kgoketšo e oketšegilego ya go phaela ka thoko go nyakega ga go khutša.

Bophelo bo a Kitima

Ga se feela matšatši a rena ao a bago a matelele, eupša bophelo ka bobjona bo bonala bo sepela ka lebelo—le mo gape bo kitimišwa ke thekinolotši. Koloyana ya go gogwa ke dipere ya mo e ka bago ka tlase ga ngwaga-kgolo o fetilego, e fapane kudu-kudu le dikoloi tša lehono tše di kitimago kudu, ditimela tša lebelo la godimo le difofane tša jet. Ge e le gabotse, rakgwebo wa mehleng yeno, yo rakgolo wa gagwe mohlomongwe a bego a sepela ka maoto go ya mošomong goba a namela pere goba paesekele, a ka fofa go phatša Lewatle la Atlantic ka nako ya magareng ga dijo tša mosegare le tša mantšiboa!

Ofisi le yona e ile ya lebeletšana le diphetogo tše dikgolo ka mo go feletšego ka kgahlego ya go akgofiša le go tšweletša. Metšhene ya go tlanya le mekgwa e tlwaelegilego ya go amogela poso di tšeetšwe sebaka ke di-computer, metšhene ya fax le E-mail. Di-computer tša go šikarwa, megala ya cellular le di-pager, di bile di dirile gore phapano magareng ga legae le ofisi e se sa bonala gabotse.

Go ba gona, ga go le o tee wa rena yo a ka diegišago mosepelo wa go kitima wa lefase. Lega go le bjalo, motheong wa motho ka noši, re ka dira dipeakanyo tšeo di tlago go re kgontšha go phela bophelo bja go iketla le bja go leka-lekana. Eupša pele re ka ahla-ahla taba ye, anke re hlahlobeng a mangwe a mafelelo ao mosepelo wa lehono wa lebelo le legolo o ka bago le wona go rena re le motho ka o tee ka o tee le setšhabeng ka kakaretšo.

[Mongwalo wa ka tlase]