Pono ya Bebele

Na Lenyalo e Swanetše go ba Tlemo ya Bophelo ka Moka?

GE E le gabotse, ke ka baka la’ng go botšišwa potšišo yeo? Ge re tsopola dikeno tša lenyalo tša ka Bodikela, na lenyalo ga se “la menateng le mahlokong” le “go fihla re aroganywa ke lehu”? Ee, dikeno tša lenyalo gantši di bontšha gore monyadi le monyadiwa ba tsena tlemong ya bophelo ka moka. Eupša ba bantši ga ba sa hlwa ba itebelela ba tlangwa ke dikholofetšo tšeo tše dikgolo. Banyalani ba arogana ka dipalo tše di boifišago—ba bangwe ka morago ga dikgwedi tše sego kae mola ba bangwe e le ka morago ga nywaga-some. Ke ka baka la’ng tlhompho ya go hlompha lenyalo e fokotšega? Beibele e nea karabo.

Hle hlahloba 2 Timotheo 3:1-3, gomme o e bapiše le seo o se bonago lefaseng lehono. Ka bokopana, ditemana tšeo di re: “Tseba xore mehleng ya bofêlô xo tlo tla mabaka a mathata. Batho e tlo ba ba xo ithata, ba mexabaru . . . ba xo se leboxe, ba xo se ile selô. E tlo ba ba-hlala-leratô, babata-sekxoro, . . . ba ba sa tsebexo xo ithswara.” Boporofeta bjoo ke bjo bo tlabago ka go nepagala ga bjona. Boemo bjoo bja kgopolo bo sentše le go fokodiša ditswalano tša lenyalo lefaseng ka bophara, mo go hlatselwago ke ditekanyo tša godimo tša tlhalo.

Ka kgonthe, batho ba bantši ba lahlegetšwe ke tlhompho ya go hlompha lenyalo. Ka baka la se, re ka botšiša gore: Na lenyalo le swanetše go tšeelwa godimo? Na go na le selo se bjalo ka go kgethega ga lenyalo? Bakriste ba swanetše go lebelela bjang lenyalo? Ke thušo efe yeo Beibele e e neago banyalani lehono?

Na Pono ya Modimo e Fetogile?

Mathomong, Modimo ga se a bolela ka ditlemo tša lenyalo e le tša lebakanyana. Go tlemaganya ga gagwe monna wa mathomo le mosadi go laodišwa go Genesi 2:21-24, gomme moo ga se gwa bolelwa ka kgetho ya go hlala goba go arogana. Go e na le moo, Gen 2 temana 24 e re: “Ka baka leo monna ó tlo tloxêla tata’xwê le mma’xwê, a xomarêla mosadi wa xaxwe; xomme ba tlo ba nama e tee.” Ke eng seo se bolelwago ke lengwalo leo?

Nagana ka mmele wa motho, kamoo ditlhalenama tša wona tše di fapa-fapanego di  logagantšwego gotee ka ntle le moroko le kamoo marapo a kopanago malokololong a tiilego le ao a sa gohlanego. A botee bjo bo kaakang! A go swarelela mo go kaakang! Eupša go ba bohloko gakaaka’ng ge mmele wo wa moswana-noši o gobatšwa o šoro! Ka gona, go Genesi 2:24, polelwana “nama e tee” e gatelela go kopana le go ba ga nako e telele ga tlemo ya lenyalo. Gape e nea temošo e kwagalago ya bohloko bjo bogolo ge e ba tlemo yeo e ka senywa.

Gaešita le ge ditshekamelo tša phetogo tšeo di bilego gona nywageng e dikete e fetilego di ile tša bopa le go bopa lefsa dipono tša batho, Modimo o sa dutše a lebelela lenyalo e le tlemo ya bophelo ka moka. Mo e ka bago nywaga e 2 400 e fetilego, banna ba bangwe ba ba-Juda ba ile ba tlogela basadi ba bona ba pele gomme ba nyala basadi ba bafsa. Modimo o ile a sola tiro ye, a bolela ka moporofeta wa gagwe Maleaki gore: “Itoteng kxopolô! ’Me wêna O se hlalê mosadi e O mo tšerexo Lè sa le bafsa. Xobane Morèna Modimo wa Isiraele O re: Thlalô ke e hloile.”—Maleaki 2:15, 16.

Ka godimo ga nywaga-kgolo e mene ka morago, Jesu o ile a tiišetša pono ya mathomong ya Modimo ka lenyalo ge a be a tsopola Genesi 2:24 gomme a laela gore: “Se Modimo a se tlêmaxantšexo, motho a se kê a se aroxanya.” (Mateo 19:5, 6) Nywaga ka morago, moapostola Paulo o ile a laela gore “mosadi a se kê a hlala monna” le gore “monna a se kê a hlala mosadi.” (1 Ba-Korinthe 7:10, 11) Mangwalo a a bolela ka mo go kwagalago pono ya Modimo ka lenyalo.

Na Beibele le ka mohla e dumelela go kgaotšwa ga lenyalo? Ee, lenyalo le fela ge yo mongwe wa balekane a e-hwa. (1 Ba-Korinthe 7:39) Bohlotlolo le bjona bo ka fediša lenyalo ge e ba molekane yo a se nago molato a kgetha seo. (Mateo 19:9) Ka ntle le moo, Beibele e kgothaletša banyalani go dula gotee.

Kamoo o ka Dirago Gore Lenyalo e be le le Swarelelago ka Gona

Modimo o nyaka gore lenyalo le swarelele, e sego e le ntwa ya go lwela go phologa, eupša e le leeto le le thabišago. O kganyoga gore monna le mosadi ba rarolle mathata a bona gomme ba thabele segwera sa yo mongwe le yo mongwe ka mo go tseneletšego. Lentšu la gagwe le nea tlhahlo bakeng sa lenyalo le le thabilego le leo le swarelelago. Hle ela hloko mangwalo a a latelago.

Ba-Efeso 4:26: “A letšatši le se dikêlê Lè sa xalefile.” * Monna yo mongwe yo a nyetšego le yo a thabilego o dumela gore lengwalo le le thušitše yena le mosadi wa gagwe go rarolla diphapano tša bona kapejana. O re: “Ge e ba o sa kgone go robala ka morago ga phapano, go na le selo se se fošagetšego. O ka se dumelele bothata go tšwela pele.” Ka dinako tše dingwe yena le mosadi wa gagwe ba ile ba boledišana ka mo go tseneletšego ka bothata go fihla bošego. Seo se ile sa thuša. O oketša ka gore: “Go diriša melao ya motheo ya Beibele go na le mafelelo a kgahlišago.” Ka go dira bjalo, monna yo le mosadi wa gagwe ba ile ba thabela lenyalo le le thabilego lebaka la nywaga e 42.

Ba-Kolose 3:13: “Le fêlê Lè rwalana; Le lebalêlanê [“ka bolokologi,” NW].” Monna yo mongwe o hlalosa kamoo yena le mosadi wa gagwe ba ilego ba diriša se: “Balekane ba lenyalo ba ka galefišana ka ntle le go dira e le ka kgonthe selo le ge e le sefe seo se fošagetšego, ka ge yo mongwe le yo mongwe a na le mafokodi le mekgwa yeo e tenago batho ba bangwe. Re rwalana ka go se dumelele dilo tše di re aroganya.” Ka ntle le pelaelo, pono ye e thušitše banyalani ba gakaakang lebakeng la nywaga e 54 yeo ba bego ba nyalane ka yona!

Go dirišwa ga melao ya motheo e bjalo ya Mangwalo go matlafatša tlemo yeo e tlemagantšego banna le basadi. Ka go rialo, manyalo a bona e ka ba a thabilego, a kgotsofatšago le a bophelo ka moka.

Ge e ba o tla rata go amogela tsebišo e oketšegilego goba o tla rata gore motho yo mongwe a go etele bakeng sa go tla go swara thuto e sa lefelelwego ya legae ya Beibele le wena, hle ngwalela go Watch Tower, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 5.

[Mongwalo wa ka tlase]