Go Lwantšhana Ga-ka le Bolwetši bjo bo Fokodišago

Ka ge go anega Tanya Salay

Go fihla nywageng e sego kae e fetilego, ke be ke le mma yo mafolofolo kudu le modiredi wa nako e tletšego toropong e nyenyane ya Luverne, Alabama. Bophelo mo ke bja khutšo le bjo bo nanyago. Selo se sengwe le se sengwe se be se bonala se sepela gabotse go nna le go monna wa-ka Duke le morwa wa-ka yo monyenyane, Daniel. Ke moka go buiwa go bonolo go ile gwa lebiša phetogong e kgolo mokgweng wa rena wa bophelo.

MATHATA a rena a thomile ka 1992 ge ke be ke buiwa bakeng sa go ntšhwa popelo. Kapejana ka morago ga moo, ke ile ka thoma go ba le sehlabi se bohloko seo se sa kgaotšego le go hlapologa kgafetša-kgafetša (makga a 50 go ya go a 60 ka letšatši). Setsebi sa-ka sa malwetši a basadi mafelelong se ile sa ntirela thulaganyo le setsebi sa tša go hlapologa bakeng sa go leka go hlatha sebaki sa bothata.

Ke ile ka ya sepetlele bakeng sa diteko tše itšego. Ketelong ya-ka ya mathomo, setsebi sa tša go hlapologa se ile sa hlahloba bothata bja-ka—e be e le  bolwetši bja interstitial cystitis (IC), goba go ruruga mo go fokodišago ga sebudula. Go be go se bonolo go dira tlhahlobo ka gobane dika tša IC di swana le tša mathata a mangwe a tshepedišo ya mohlapologo. Go feta moo, ga go na le teko e lebanyago bakeng sa go hlaola IC. Ka gona, dingaka di swanetše go kgonthiša gore ga se maemo a mangwe pele di amogela gore bolwetši ke bja IC.

Ngaka ya rena e boletše ka go lebanya gore ka ge go alafa go be go ka se thuše, sephetho sa mafelelo e tla ba go ntšhwa ga sebudula! O ile a bolela gore go be go na le dikalafo tše dingwe eupša tšeo ka moka ga tšona ga se tša ka tša atlega. Go ba gona, seo e be e le masetla-pelo go rena. Ke be ke phetše gabotse kudu go ba go fihla nakong ye. Bjalo ka Dihlatse tša Jehofa, nna le Duke re bile bodireding bja nako e tletšego ka nywaga e mmalwa, gomme bjale ke be ke boditšwe gore sebudula sa-ka se swanetše go tlošwa. Ke thabetše gore ke bile le thekgo e botse go tšwa go monna wa-ka.

Re ile ra dira phetho ya go tsoma setsebi se sengwe sa tša go hlapologa. Re ile ra leka dingaka tše mmalwa. Ka bomadimabe, ka nako yona yeo, dingaka tše dintši di be di tseba mo gonyenyane kudu ka IC. Gape, ditsebi tše dintši tša tša go hlapologa di na le dikgopolo tša tšona mabapi le IC, ka gona kalafo yeo e laelwago e fapana go ya ka dingaka. Makasine o mongwe wa tša kalafo o bolela gore: “Bolwetši bo na le tshekamelo ya go ba bokoka.” O mongwe o re: “Bo-rathutamahlale ga se ba hlwa ba hwetša sehlare bakeng sa IC, le gona ba ka se kgone go bolelela-pele gore ke mang yo a tlago go arabela gabotse kalafong efe. . . . Ka ge dingaka di sa tsebe seo se bakago IC, dikalafo di reretšwe go okobatša dika tša bolwetši.”

Ke be ke le bohlokong bjo bogolo ka go ba le dihlabi le go hlapologa kgafetša-kgafetša, moo ke bego ke ikemišeditše go leka feela se sengwe le se sengwe seo dingaka di se šišintšego. Ke ile ka leka mo e ka bago ka godimo ga dikalafo tše fapa-fapanego tše 40 gotee le mešunkwane, meento, go thiba megalatšhika, tlhabelo ya epidural le ya spinal le transcutaneous electrical nerve stimulation (TENS), moo mothebetho wa mohlagase wo o sego bogale o tsenago mmeleng lebaka la metsotso goba diiri. Ke ile ka dira nyakišišo kudu ka mo ke bego nka kgona ka gona, yeo bonyenyane e nthušitšego go kwešiša ganyenyane ka seo se bego se direga.

Mo nakong ye, ke diriša methadone, e lego seokobatši sa bohloko, gotee le dikalafo tše dingwe tše tshela. Gape ke ya kliniking ya dihlabi ka mehla, moo ke hlabelwago epidural gotee le di-steroid bakeng sa go nthuša go kgotlelela bohloko. Bakeng sa go hlapologa kgafetša-kgafetša, ke ya sepetlele mo e ka bago dikgwedi tše dingwe le tše dingwe tše tharo goba tše nne bakeng sa tshepedišo yeo e bitšwago hydrodistension, yeo go yona seela se dirišwago go katološa sebudula go swana le palune. Ke be ke dirwa se mo e ka bago ka makga a sego kae. Go ba gona, e nnea kimologo mo e ka bago ka dikgwedi tše itšego. Ke ile ka tsena le go tšwa sepetlele mo e ka bago ka makga a fetago 30 nywageng e sego kae e fetilego.

Go thwe’ng ka kalafo ya mafelelo, go ntšhwa ga sebudula? Setsebi se sengwe se bolela gore: “Dingaka tše dintši di dika-dika go bua ka gobane ditla-morago ke tše sa kgonthišetšwago go balwetši ka go fapana—batho ba bangwe ba builwe gomme ba sa dutše ba na le dika tša bolwetši.” Ka gona, ga bjale ga ke nagane ka kgetho yeo.

Ka dinako tše dingwe, bohloko e ba bjo bošoro kudu le bjo bo tšwelago pele mo go ka bago bonolo go itlhoboga. Gaešita le kgopolo ya go ipolaya e be e kgabaganya monaganong wa-ka. Eupša ga se ka ka ka kgona go kgotlelela go nagana ka kgobošo yeo tsela e bjalo e bego e tla e tliša leineng la Jehofa. Ke kgona go bona bohlokwa bja thapelo le thuto ya motho ka noši gotee le go hlagolela tswalano ya kgaufsi le Jehofa, ka gobane ga o tsebe le ka mohla seo se ka diregago seo se tlago go fetoša bophelo bja gago. Tswalano ye ge e le gabotse e phološitše bophelo bja-ka nakong ya bolwetši bja-ka, ka ge ke tseba gore go sego bjalo nka be ke ipolaile.

Ge ke lebelela morago nywageng ye e senyane, ke bona kamoo bophelo bo ka fetogago ka lebelo ka gona. Ke leboga mantšu a Mmoledi 12:1, ao a rego: “Xopola Mmopi wa xaxo Ò sa le yo mofsa, xò sešo xwa fihla matšatši a mabe, xò sešo xwa tla nywaxa ye O tl’o xo re: Xa e na tše di nthabišaxo!” Ke leboga kudu gore ke thomile bodireding bja nako e tletšego ge ke e-na le nywaga e 15 le gore ke ile ka kgona go tšwela pele mo e nyakilego go ba nywaga e 20. Ka nako yeo, ke ile ka hlagolela tswalano ya kgaufsi le Jehofa.

Ke leboga Jehofa ka monna wa-ka le morwa wa-ka Daniel, bao e bilego ba thekgago kudu. Gape, ke mo go kgothatšago kudu ge bao ba lego ka phuthegong ba nteletša mogala goba ba e-tla go nketela. Go boima go nna go tšwela ntle marega ka gobane go tonya go dira gore go hunyela ga mešifa go mpefale. Ka gona, ke nea bohlatse ka mogala, e lego seo se bolokago kholofelo ya Paradeise e tiile le go ba ya kgonthe go nna. Ke lebeletše pele nakong ya ge bolwetši le tlaišego e tla ba e le dilo tša nakong e fetilego le tšeo di ka se kego tša gopolwa.—Jesaya 33:24.