Pono ya Beibele

Na Bakriste ba Swanetše go ya Dibokeng tša Phuthego?

“KE BE ke fela ke e-ya kerekeng, eupša ga ke sa hlwa ke e-ya.” “Ke nagana gore o ka rapela Modimo kae le kae, e sego ka kerekeng feela.” “Ke dumela go Modimo le Beibele, eupša ga ke dumele gore go bohlokwa go ya kerekeng.” Na o kile wa kwa dipolelo tše di swanago le tše? Batho ba bantši lehono ba bolela dilo tše bjalo, kudu-kudu dinageng tša ka Bodikela. Batho bao ba bego ba fela ba e-ya kerekeng ga ba sa hlwa ba nagana gore go bohlokwa go dira bjalo. Beibele e re’ng mabapi le go ya kerekeng?

Mantšu “kereke” le “dikereke” a tšwelela ka makga a fetago 110 ka go King James Version. Diphetolelo tše dingwe le tšona di diriša mantšu a. Lentšu la Segerika leo le fetoletšwego e le “kereke” ge e le gabotse le bolela “pitšo,” goba ka mantšu a mangwe, go kgobokana ga batho. Ka mohlala, Ditiro 7:38, ka go King James Version e bolela ka Moše a le ‘ka kerekeng lešokeng,’ ke gore, ka gare ga setšhaba seo se bego se kgobokane sa Isiraele. Lefelong le lengwe Mangwalo a bolela gore ‘tlaišego e šoro e ile ya tsogela kereke,’ a šupa go sehlopha sa Bakriste kua Jerusalema. (Ditiro 8:1, The Jerusalem Bible) Ka lengwalong le lengwe la gagwe, Paulo o dumediša ‘kereke ya mo lapeng la [Filemone],’ e lego phuthego ya lefelong leo yeo e bego e kopanela moo.—Filemone 2, Revised Standard Version.

Go molaleng gore lentšu “kereke” bjalo ka ge le dirišitšwe ka Beibeleng, ga le šupe lefelo la borapedi, eupša go e na le moo le šupa sehlopha sa barapedi. A dumela se, Clement wa Alexandria, morutiši wa bodumedi wa lekgolo la bobedi la nywaga, o ngwadile gore: “Ga se lefelo eupša ke phuthego ya bakgethwa yeo ke e bitšago Kereke.” Go sa dutše go le bjalo, na Bakriste ba swanetše go ba gona lefelong le itšego goba moagong  e le gore borapedi bja bona bo amogelege go Modimo?

Borapedi Setšhabeng sa Isiraele

Molao wa Moše o be o nyaka gore banna ka moka ba ba-Juda ba ye lefelong le itšego bakeng sa menyanya e meraro ya ngwaga le ngwaga. Basadi ba bantši le bana le bona ba be ba e-ba gona. (Doiteronomio 16:16; Luka 2:41-44) Ka dinako tše dingwe, baperisita le ba-Lefi ba be ba ruta diphuthegong, ba bala Molaong wa Modimo. Ba be ba ‘bala ka go hlalosa le ka go hlatholla, batho ba ba ba hlaologanya tše di balwago.’ (Nehemia 8:8, PK) Bakeng sa nywaga ya Sabatha, taelo ya Modimo e be e itše: “O phuthêlê sethšaba mmôxô, banna le basadi le bana, le ba ba diiletšexo dikxorong tša xeno, O ba balêlê ba kwê, ba ithutê, xomme ba boifê Morêna Modimo wa lena, ba hlôkômêle se se bolêlwaxo ke molaô wó, ba dirê ka wôna.”—Doiteronomio 31:12.

Ke feela tempeleng kua Jerusalema moo motho a bego a ka neela dihlabelo go Modimo le go hwetša tlhahlo go tšwa go baperisita. (Doiteronomio 12:5-7; 2 Koronika 7:12) Ge nako e dutše e e-ya, nywako e mengwe ya borapedi e ile ya hlongwa kua Isiraele—disinagoge. A e be e le mafelo a go balwa ga Mangwalo le go rapela. Lega go le bjalo, tempele ya kua Jerusalema e be e le lefelo la motheo la borapedi. Se se bontšhwa ke seo mongwadi wa Beibele Luka a se begago. O bolela ka mosadi wa motšofadi yo a bitšwago Anna yo a bego “à sa tloxe Ntlong-kxêthwa, à dirêla Modimo ka xo ikôna le ka xo rapêla Modimo bošexo le mosexare.” (Luka 2:36, 37) Go kopanela borapeding bja therešo gotee le ba bangwe bao ba ineetšego e be e le selo sa bohlokwa kudu bophelong bja Anna. Ba-Juda ba bangwe bao ba boifago Modimo ba ile ba latela tsela e swanago.

Borapedi bja Therešo ka Morago ga Lehu la Kriste

Ka morago ga lehu la Jesu, balatedi ba gagwe ba be ba se sa hlwa ba le ka tlase ga Molao wa Moše le gona go be go sa nyakege gore ba rapele ka tempeleng. (Ba-Galatia 3:23-25) Lega go le bjalo, ba ile ba tšwela pele ba kopana gotee bakeng sa go rapela le go ithuta Lentšu la Modimo. Ba be ba se na meago e hlomilwego, go e na le moo ba be ba šomiša magae a batho le mafelo a batho bohle. (Ditiro 2:1, 2; 12:12; 19:9; Ba-Roma 16:4, 5) Di sa latele ditirelo le mekgabišo e feteletšego ya meetlo, diboka tšeo tša Bokriste tša lekgolong la pele la nywaga di be di le bonolo ka tsela e lapološago.

Gare ga boitshwaro bjo bo nyamišago bja Mmušo wa Roma, melao ya motheo ya Beibele yeo e bego e rutwa dibokeng tšeo e be e phadima bjalo ka ditaamane. Ba bangwe bao e sego badumedi bao ba bego ba e ba gona ka lekga la pele ba be ba fo kgotsa ka gore: “Ruri, Modimo ó na le lena.” (1 Ba-Korinthe 14:24, 25) Ee, ruri Modimo o be a le gare ga bona. “Diphuthêxô [“dikereke,” RS, JB] tša tiišwa tumelong, badumedi ba fêla ba ata ka mehla.”—Ditiro 16:5.

Na Mokriste ka nako yeo o be a ka amogelwa ke Modimo ka go rapela ka ditempeleng tša boheitene goba a nnoši? Beibele e nea tlhahlo e kwagalago tabeng ye: Barapedi ba ba amogelwago ba swanetše go ba karolo ya kereke ya therešo feela, goba phuthego, “sehlopha se tee” sa barapedi ba kgonthe. Ba e be e le barutiwa ba Jesu, bao ba tsebjago e le Bakriste.—Ba-Efeso 4:4, 5; Ditiro 11:26.

Go Thwe’ng ka Lehono?

Go e na le go re kgothaletša go rapela ka kerekeng, Beibele e re kgothaletša go rapela le kereke, ‘phuthego ya Modimo e a phelago,’ batho bao ba “[rapelago] ka môya le ka xo rereša.” (1 Timotheo 3:15; Johane 4:24) Diboka tša bodumedi tšeo di amogelwago ke Modimo di swanetše go ruta batho “xo swara ka tsela e kxêthwa ya borapedi.” (2 Petro 3:11) Di swanetše go thuša bao ba lego gona go ba Bakriste bao ba godilego, bao ba ka kgonago go “kxetholoxanya botse le bobe.”—Ba-Hebere 5:14.

Dihlatse tša Jehofa di katanela go latela mohlala wa Bakriste ba lekgolong la pele la nywaga. Diphuthego tša ka godimo ga tše 91 400 lefaseng ka bophara di bokana ka mehla bakeng sa go ithuta Beibele le go kgothatšana, di dira bjalo ka Diholong tša Mmušo, magaeng a batho le mafelong a mangwe. Se se dumelelana le mantšu a moapostola Paulo a rego: “A re hlokomelaneng gore re tutueletšane leratong le medirong e mebotse, re se tlogele go bokana ga rena gotee.”—Ba-Hebere 10:24, 25, NW.