Go Hlahlobišiša Moriri wa Gago

PUKU e nngwe ya ditšhupetšo e bolela gore “nywageng e mengwe le e mengwe le setlogong, moriri o utolla se sengwe ka motho.” Ka gona, ga se mo go makatšago gore batho ba bantši ba kgahlegela ka phišego go boloka meriri ya bona e phetše gabotse e bile e kgahliša.

Phafoga! e botšišitše babeakanyi ba meriri ba bane bao ba nago le boitemogelo dipotšišo tše dingwe tše tlwaelegilego tša mabapi le peakanyo le tlhokomelo ya moriri. Seo se lemogwago ke gore moriri wa gago o na le go gontši go feta kamoo o bonalago ka gona.

Go Mela le go Hlobega ga Moriri

Potš: Moriri o dirilwe ka eng?

Kar: Moriri o na le keratin, proteine ya fibre. Moriri o mongwe le o mongwe o mela go tšwa lešobaneng leo le lego legateng leo le bitšwago follicle. Ka tlase ga follicle e nngwe le e nngwe go na le papilla, yeo e nago le kabo e humilego ya madi. Papilla e tšweletša disele tša moriri tšeo di golago ka godimo ga follicle gomme tša tia gore e be moriri.

Potš: Ka kakaretšo go dumelwa gore moriri o gola ka lebelo ge o kotwa. Na se ke therešo?

Kar: Aowa. Batho ba bangwe ba nagana gore moriri o fepša ke mmele go swana le ka tsela yeo makala a sehlare a fepšago ka gona ke kutu. Eupša gatee-tee ge moriri o mela go tšwa  letlalong la hlogo, ke selo seo se hwilego. Ka gona, go fokotša moriri ga go kgome go gola ga wona.

Potš: Ke ka baka la’ng moriri o fetoga o mošweu?

Kar: Karolo ya ka gare ya moriri e na le sefa-mmala seo se neago moriri mmala wa wona. Ge disele tša sefa-mmala di e-hwa, moriri o fetoga o mošweu; ke karolo ya mosepelo wa go tšofala. Go šweufala ga moriri ga pele ga nako go ka bakwa ke leabela goba bolwetši. Lega go le bjalo, ke maaka gore moriri o ka fetoga o mošweu ka bošego bjo tee. Sefa-mmala se ba ka tlase ga letlalo la hlogo. Ka gona, go nyakega nako gore moriri o mošweu o mele (mo e ka bago disenthimithara tše 1,25 ka kgwedi) gomme o bonale hlogong.

Potš: Mabaka a go hlobega ga moriri ke afe?

Kar: Go hlobega ga moriri ke karolo ya modikologo wa tlhago wa moriri. Ka kakaretšo, yo mongwe le yo mongwe o hlobega meriri e akanyetšwago go 50 go ya go 80 letšatši le lengwe le le lengwe. Eupša mokgwa wa banna wa go ba le lefatla,  o na le motheo wa leabela gomme o bonala o bakwa ke go se itekanele ga dihomoune mo go feleletšago ka go hlobegela sa ruri ga moriri. Go hlobega mo go sa tlwaelegago ga moriri go bitšwa lefatla. *

Potš: Ba bangwe ba bolela gore moriri ke seipone sa boemo bja motho bja tša maphelo. Na o lemogile se?

Kar: Ee. Madi a fepa moriri ka tlase ga letlalo la hlogo. Ka gona, moriri wo o phetšego gabotse o ka bontšha phepo e botse ya kabo ya madi. Lega go le bjalo, motho yo a jago ka tsela e fokolago goba a dirišago dino-tagi ka mo go feteletšego, a ka hwetša gore moriri wa gagwe o thoma go se sa tia le go kgaoga gabonolo ka ge kabo ya gagwe ya madi e sa kgone go fepa moriri wa gagwe gabotse. Go hlobega goba go kgaoga gabonolo ga moriri e ka ba gaešita le seka sa kapejana sa bolwetši goba boimana.

Go Boloka Letlalo la Gago la Hlogo le Moriri di Phetše Gabotse

Potš: Hlalosa kamoo moriri le letlalo la hlogo di ka hlapšago ka gona ka disepe tša moriri.

Kar: Phihlelo e bontšhitše gore bontši bja batho bao ba nago le bothata bja letlalo leo le omelelago la hlogo, ba hlapa hlogo ka disepe tša moriri gantši kudu. Go ba gona, makhura ao a lego hlogong ya gago a tanya ditšhila le ditšhila tša letlalo gomme a ka tswalela mašobana a makhura ao a išago go di-follicle. Ka gona go hlapa ka mehla ka disepe tša go hlapa moriri go bohlokwa. Eupša makhura a a tlhago gape a šireletša letlalo la gago malebana le ditwatši tše kotsi gomme a tlotša seletefatši se se nyakegago. Ka go hlapa gantši kudu ka disepe tša moriri, o amoga letlalo la gago la hlogo legapi le le šireletšago gomme o hlola mathata a swanago le letlalo le le omelelago la hlogo. Ditsebi tše dintši di eletša go hlapa ka disepe tša moriri neng le neng ge letlalo la motho la hlogo goba moriri di šilafetše. Batho bao ba nago le meriri ya makhura ba swanetše go hlapa gantši kudu go feta bao ba nago le moriri wa magareng goba o omilego.

Ge o hlapa ka disepe tša moriri, fogohla letlalo la gago la hlogo. Se se tloša disele tše di hwilego letlalong la hlogo gomme sa godiša modikologo o swanetšego wa madi ao a fepago moriri wa gago. Gopola go tšokotša ka mo go tseneletšego! Ge e ba o se wa tšokotša diatla tša gago ka morago ga go di hlapa ka sesepe, letlalo la gago le tla omelela gomme la palega. Ka mo go swanago, ge e ba disepe tša moriri di se tša tšokotšwa ka tshwanelo, letlalo la hlogo le ka omelela le go palega.

Potš: Letlalo leo le omeletšego la hlogo le ka hlokomelwa bjang?

Kar: E-nwa meetse a mantši gomme o je dijo tša phepo. Se se nea letlalo la gago meetse gomme se fepa kabo ya madi. Diriša disepe tša moriri tše bonolo gomme o fogohle letlalo la gago ka mehla. Batho ba bangwe gape ba diriša didirišwa tšeo di sa tlošwego ka go tšokotšwa le ditlolo bakeng sa go letefatša letlalo la hlogo.

Go Beakanya Moriri wa Gago

Potš: Ke eng seo motho a swanetšego go se gopola ge a etela mmeakanyi wa meriri?

Kar: Ge e ba o nyaka go fetola peakanyo ya gago ya moriri, e-tla le seswantšho sa peakanyo ya moriri yeo o e nyakago mohlomongwe le peakanyo yeo o sa e nyakego. Hlalosa ka go se dika-dike dikganyogo tša gago le tekanyo ya nako yeo o ikemišeditšego go e diriša bakeng sa go hlokomela moriri letšatši le lengwe le le lengwe, ka ge mmeakanyo e mengwe ya meriri e nyaka tlhokomelo e kgolo go feta e mengwe. Gopola gore gantši go tšea maeto a mabedi goba a mararo gore mmeakanyi wa meriri a tsebe moriri wa gago le go thoma poledišano e botse le wena. Ka gona, o se ke wa ngala gomme wa fetoša mmeakanyi wa gago wa moriri kapejana!

Seo Moriri wa Gago o se Utollago

Go hlokomela moriri le go o beakanya ke dibopego tša go itlhalosa. Moriri o ile wa kotwa, wa godišwa, wa otlollwa, wa garwa, wa tlotšwa ka mebala le go beakanywa ka mekgwa e fapa-fapanego bakeng sa go swanela mekgwa ya morago-rago, ditumelo tša bodumedi gaešita le dikgopolo tša setlogo le dipolitiki. Hlahlobišiša moriri wa gago. O utolla eng ka wena? Moriri wo o phetšego gabotse wo o beakantšwego ka tsela e kgahlišago, o swanela mong wa wona gomme o retwa ke ba bangwe.

[Mongwalo wa ka tlase]

[Diswantšho go letlakala 26]

Go ja dijo tše di nago le phepo le go nwa meetse a mantši go ka thuša go alafa legata leo le omeletšego

[Seswantšho go letlakala 26]

Go hlapa moriri gantši ka disepe tša moriri go ka amoga letlalo la gago makhura a šireletšago

[Seswantšho go letlakala 26]

Go šweufala ga moriri ke mosepelo wa tlhago wa go tšofala