Na Ditoro ke Melaetša e Tšwago go Modimo?
Pono ya Beibele
Na Ditoro ke Melaetša e Tšwago go Modimo?
GO BEGWA gore, kgopolo ya mohlami Elias Howe ya go hlama motšhene wa go roka e be e theilwe torong. Mohlami wa mmino Mozart o boletše gore bontši bja dihlogo tša mmino wa gagwe di be di mo tlela ditorong. Ka mo go swanago, rakhemisi Friedrich August Kekule von Stradonitz o ile a nagana gore o utolotše sebopego sa molekule wa benzene torong. Ditiragalo tše bjalo ga se tšeo di sa tlwaelegago. Go theoša le histori, ditšo tše dintši di ile tša tswalanya ditoro le mehlolo. Tše dingwe di dumela gore dilo tše di diregago ditorong le tša ge o tsogile ke tša kgonthe ka go lekana.
Beibele e na le ditiragalo tše mmalwa tšeo go tšona ditoro di hlalositšwego e le mothopo o bohlokwa wa tsebišo—sebopego sa go boledišana le Modimo. (Baahlodi 7:13, 14; 1 Dikxoši 3:5) Ka mohlala, Modimo o ile a boledišana le Aborahama, Jakobo le Josefa ditorong. (Genesi 28:10-19; 31:10-13; 37:5-11) Kgoši ya Babele Nebukadinetsara o ile a hwetša ditoro tša boporofeta tše di bego di e-tšwa go Modimo. (Daniele 2:1, 28-45) Ka gona, na mohlomongwe go na le lebaka le le kwagalago la go dumela gore gaešita le lehono ditoro tše dingwe ke melaetša e tšwago go Modimo?
Ditoro tše di Tšwago go Modimo
Ka Beibeleng, ditoro tše di buduletšwego ke Modimo ka mehla di be di tutuetšwa ke mabaka a itšego. Ka kgonthe, ka dinako tše dingwe molori o be a ka se ke a kwešiša kapejana seo se bolelwago ke toro. Lega go le bjalo, mabakeng a mantši “Moutolodi wa diphihlô” ka boyena o be a nea tlhaloso e le gore go se be le pelaelo ge e le ka seo se bolelwago ke toro. (Daniele 2:28, 29; Amosi 3:7) Ditoro tše di tšwago go Modimo di be di se na go se kwagale moo gantši go hlaolago ditoro tše di tlwaelegilego.
Ka dinako tše dingwe, ditoro di be di dirišwa ke Modimo bakeng sa go šireletša batho ba bego ba kgatha tema ya bohlokwa go phethagatšweng ga merero ya gagwe. Baamogedi ba ditoro tše bjalo ga go nape go bolela gore e be e le bahlanka ba Modimo. Ka mohlala, balepi ba dinaledi bao ba ilego ba etela ngwana yo monyenyane Jesu, ga se ba ka ba boela go yo bona Mateo 2:7-12) Se se ile sa nea tatago Jesu wa mogodiši e lego Josefa nako e lekanego bakeng sa go tšhabela Egipita le lapa la gagwe ka go arabela tlhahlong yeo le yena a e hweditšego ka toro. Se se ile sa phološa bophelo bja Jesu yo e bego e sa le yo monyenyane.—Mateo 2:13-15.
mmolai Heroda go etša ge a be a kgopetše. Ka baka la’ng? Ba be ba hweditše temošo ka toro. (Nywaga-kgolo pejana, farao wa mo-Egipita o ile a lora diako tše di šupago tše nonnego tša korong le dikgomo tše di šupago tša mebele e kgahlišago tšeo di bego di fapana le diako tše di šupago tše tshesane tša korong le dikgomo tše di otilego tše šupago. Ka thušo ya Modimo, Josefa o ile a hlatholla ditoro ka mo go nepagetšego: Egipita e be e tla thabela nywaga e šupago ya mohora o mogolo yeo e bego e tla latelwa ke nywaga e šupago ya tlala. Go tseba se e sa le pele go ile gwa nea ba-Egipita sebaka sa go rulaganya le go boloka dijo. Se se ile sa itlhatsela e le se se šomago go phološeng ditlogolwana tša Aborahama le go di tliša Egipita.—Genesi, kgaolo 41; 45:5-8.
Kgoši Nebukadinetsara wa Babele ka mo go swanago o ile a lora. Toro yeo a e lorilego e bolelela pele go tsoga le go wa ga mebušo ya ka moso ya lefase yeo e bego e tla ba le mafelelo a lebanyago go batho ba Modimo. (Daniele 2:31-43) Ka morago, o ile a lora toro e nngwe yeo e bego e bolelela pele go welwa ga gagwe ka noši ke bogafsi le go boela sekeng mo go bego go tla latela. Toro ye ya boporofeta e be e e-na le phethagalo e kgolo kudu, e šupa go go hlongweng ga Mmušo wa Mesia, woo ka wona Modimo a tlago go phethagatša thato ya gagwe.—Daniele 4:10-37.
Go Thwe’ng ka Lehono?
Ee, Modimo o ile a boledišana le batho ba bangwe ka ditoro. Eupša Beibele e bontšha gore se e be e le selo sa sewelo kudu. Ditoro ga se ya ka ya ba sebopego sa motheo sa go boledišana le Modimo le ka mohla. Go be go e-na le bahlanka ba bantši ba botegago ba Modimo bao le ka mohla ba sa kago ba amogela melaetša e tšwago go Modimo ka ditoro. Go diriša ga Modimo ditoro bakeng sa go boledišana le motho go ka swantšhwa le go aroganya ga Gagwe Lewatle le Lehwibidu. Re tseba gore o dirile seo gatee, eupša seo ge e le gabotse ga se tsela ya gagwe e tlwaelegilego ya go dirišana le batho ba gagwe.—Ekisodo 14:21.
Moapostola Paulo o ile a dumela gore mehleng ya gagwe moya wa Modimo o be o šoma go bahlanka ba gagwe ka ditsela tše dintši tše di makatšago. Paulo o itše: “E mongwê ó fiwa polêlô e bohlale ke Môya. E mongwê ó fiwa polêlô ya tsebô ke wôna Môya woo. E mongwê xapê ó fiwa tumêlô à na le Môya woo; e mongwê ó fiwa dineô tša xo fodiša ka wôna Môya woo. E mongwê ó fiwa xo kxôna mehlôlô; e mongwê ó fiwa boporofeta; e mongwê ó fiwa maleme a mehuta-huta; e mongwê a tla a fiwa thlathollô ya maleme ao.” (1 Ba-Korinthe 12:8-10) Gaešita le ge ditoro tše di buduletšwego ke Modimo di se tša bolelwa ka go lebanya, go bonala Bakriste ba mmalwa ba ile ba amogela ditoro tše di buduletšwego ke Modimo e le e nngwe ya dineo tša moya ka go phethagatša Joele 2:28.—Ditiro 16:9, 10.
Lega go le bjalo, moapostola o boletše mabapi le dineo tše tšeo di kgethegilego gore: “Xe e le diporofetô, tšôna di tlo fêla; le ôna maleme a tlo xóma; le tsebô e tlo fela.” (1 Ba-Korinthe 13:8) Ka baka leo, gare ga dineo tše di bego di tla “fela,” go be go akaretšwa le dibopego tše di fapa-fapanego tša go boledišana le Modimo. Ka morago ga lehu la baapostola, Modimo o ile a kgaotša go nea dineo tše tšeo di kgethegilego go bahlanka ba gagwe.
Lehono ditsebi di sa dutše di leka go kwešiša mosepelo wa go lora le ge e ba go e-na le mohola wa kgonthe. Beibele ga e hlabiše seetša ditabeng tše bjalo. Lega go le bjalo, go bao ba phegelelago go tsoma go boledišana le Modimo ditorong tša bona, Beibele e ba nea temošo. Go Sakaria 10:2, e re: “Didupe . . . di bolela tša dilôrô tša xo fora.” Modimo gape o lemoša malebana le go tsoma dipheku. (Doiteronomio 18:10-12) Seetšeng sa ditemošo tše, Bakriste lehono ga ba lebelele go amogela tlhahlo ya Modimo ditorong tša bona. Go e na le moo, ba lebelela ditoro e fo ba selo se sengwe seo se diregago ge motho a robetše.