Bophelo bjo Bobotse Bakeng sa Bohle—Bo Kgaufsi!

MAKASINE wa ditaba wa Jeremane wa Focus o bega gore: “Kgopolo ya go se babje gape le ka mohla . . . e tumile mo nakong ye.” Lega go le bjalo, kgopolo ye ga se e mpsha. Ge bophelo bja motho bo be bo thoma, Mmopi ga se a ka a rera gore batho ba babje ka mo go feletšego. Morero wa gagwe bakeng sa batho e be e se feela “tekanyo e amogelegago ya bophelo bjo bobotse bakeng sa batho ka moka ba lefaseng.” (Mongwalo o sekamego ke wa rena.) Mmopi wa rena o be a rerile boemo bjo bo phethagetšego bja tša maphelo bakeng sa bohle!

Ka gona, ke ka baka la’ng ka moka re tlaišwa ke bolwetši? Beibele e re botša gore Jehofa Modimo o bopile batswadi ba batho ka moka e lego Adama le Efa ba phethagetše. Gatee-tee ka morago ga ge a feditše tlholo ya gagwe, “Modimo [o ile] a lebêlêla tšohle tše a di dirilexo, a bôna e le tše botse kudu.” Mmopi wa rena yo lerato le ka mohla ga se a ka a rera gore bophelo bja batho bo tlaišwe ke bolwetši le lehu. Eupša ge Adama le Efa ba be ba kgetha go lahla tsela ya bophelo yeo ba e kgethetšwego, ba ile ba wela sebeng. Mafelelo a sebe sa Adama e bile lehu leo le ilego la fetišetšwa bathong ka moka.—Genesi 1:31; Ba-Roma 5:12.

Jehofa ga se a ka a fo lahla batho. Le gona ga se a ka a lahla morero wa gagwe wa mathomo ka bona le ka lefase. Ka Beibeleng ka moka, o tsebagatša morero wa gagwe wa go bušetša batho ba kwago boemong bja mathomong bja bophelo bjo bobotse. Ge Jesu Kriste, Morwa wa Modimo a be a le mo lefaseng, o ile a bontšha matla a Modimo a go fodiša malwetši. Ka mohlala, Jesu o ile a fodiša bofofu, lephera, bofoa, bolwetši bja go kokomoga mmele bja mamokebe, dithunthwane le go repha ditho.—Mateo 4:23, 24; Luka 5:12, 13; 7:22; 14:1-4; Johane 9:1-7.

Modimo kgaufsinyane o tla hlahla Kgoši ya gagwe e lego Mesia, Jesu Kriste go tšea taolo ya ditaba tša lefase la batho. Ka tlase ga pušo ya gagwe, boporofeta bja Jesaya bjo bo rego: “Mo xo ba ba axilexo fá xo ka se bê le e a rexo: Ke a babya! xobane ba dutšexo fá ba lebaletšwe melato” bo tla phethagala. (Jesaya 33:24) Se se tla direga bjang?

Re lemoga gore moporofeta o ngwala ka batho bao ba tlago go ba “ba lebaletšwe melato.” Ka  gona, sebaki sa mathomo sa bolwetši—sebe sa motho sa leabela—se tla tlošwa. Bjang? Mohola wa sehlabelo sa topollo sa Jesu o tla dirišwa go batho bao ba kwago, ka go rialo sa tloša sebaki sa bolwetši le lehu. Maemo a paradeise a tla thabelwa dikhutlong ka moka tša lefase. Moapostola wa Mokriste Johane o ngwadile gore: “Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” Seo se kgaufsi le go direga!—Kutollo 21:3, 4; Mateo, kgaolo 24; 2 Timotheo 3:1-5.

Go Kgomarela Teka-tekano

Ge e le mo nakong ye, bolwetši ke tsela ya bophelo ya batho ba dimilione. Ka gona, ke ga tlhago go batho go tshwenyega ka bophelo bja bona bjo bobotse le ka bophelo bjo bobotse bja baratiwa ba bona.

Bakriste lehono ba leboga kudu maiteko a modiro wa tša kalafo. Ba gata megato e kwagalago gore ba dule ba phetše gabotse mmeleng. Lega go le bjalo, kholofetšo ya Beibele ya bokamoso bjo bo se nago bolwetši e re thuša go kgomarela teka-tekano ya rena tabeng ye. Go fihlela ge Kgoši yeo e lego Mesia e tšea taolo ya ditaba tša batho, boemo bjo bo phethagetšego bja tša maphelo bo tloga bo sa kgonege. Go etša ge re bone, gaešita le dikutollo tše makatšago ga se tša dira gore ba tša kalafo ba kgone go kga apola e bose kudu yeo e lego maleke-lekeng a sehlare—bophelo bjo bobotse bakeng sa bohle.

Pakane ya “tekanyo e amogelegago ya bophelo bjo bobotse bakeng sa batho ka moka ba lefaseng” e tla fihlelelwa kgaufsinyane. Eupša e sego ka UN goba Mokgatlo wa Lefase wa tša Maphelo goba babeakanyi ba tikologo, goba bampshafatši ba tša leago goba dingaka. Modiro woo o boloketšwe Jesu Kriste. E tla ba lethabo le legolo gakaakang ge batho mafelelong ba tla be ba “hunollwa bohlankeng bya thsenyêxô, [le go ba] le tokoloxô ya xe bana ba Modimo bà e-ya letaxong”!—Ba-Roma 8:21.

[Diswantšho go letlakala 10]

Go tla ba le bophelo bjo bobotse bakeng sa batho bohle lefaseng le lefsa la Modimo