Botšhošetši—Bo tla Fela Kgaufsinyane!

PESE kua Jerusalema, moago wa mmušo kua Oklahoma City, goba moago wa bodulo kua Moscow, ka moka e ka ba bahlaselwa ba botšhošetši. Gaešita le ge batšhošetši mohlomongwe ba rata go fetišetša molaetša o matla go bo-radipolitiki, baetapele ba madira goba baetapele ba tša boiphedišo gantši go bonala go se na kgokagano magareng ga merero ya bona le ya bahlaselwa ba bona. Mabakeng a mantši bao ka kgonthe e lego bahlaselwa ke batho feela bao ba tlwaelegilego—batho bao ba sa kgokaganego le gatee le boikemišetšo bja phatlalatša bja batšhošetši. Ka gona ke ka baka la’ng bafišegela-thoko ba thekga ditiro tša botšhošetši?

Ke ka Baka La’ng go E-na le Botšhošetši?

Botšhošetši bo a rulaganywa, bja rerwa e sa le pele le go balelwa. Mafelelo a šoro a mahu le dikgobalo ga se wona maikemišetšo a magolo. Tšhollo e bjalo ya madi ke mokgwa wa go fihlelela maikemišetšo a botšhošetši, karolo ya tikologo e tšhošago le e boifišago yeo motšhošetši a kganyogago go e tšweletša e le gore a nyenyefatše taolo le go tuma bakeng sa mabaka a gagwe a kgethegilego. Ela hloko tše dingwe tša dibaki tšeo di tutueletšago ditiro tše šoro tša botšhošetši.

Lehloyo. Molaodi wa U.S. Federal Bureau of Investigation Louis J. Freeh, o boletše gore: “Botšhošetši . . . bo hlohleletšwa ke lehloyo. Bao ba bolokago lehloyo le bjalo, ba phela lefaseng leo le tutueditšwego ke go hloka kgotlelelo, leo le sekametšego maano-mabeng le leo le bopilwego ke go se šetše.”

Kgatelelo. Stephen Bowman o ngwadile ka pukung ya gagwe ya When the Eagle Screams gore: “Ka kgonthe, go na le baetapele ba dihlopha le ba dinaga bao dipakane tša bona tša bošilo e lego go senya ditlogo tše dingwe. Eupša gape go molaleng gore sebaki se sengwe sa botšhošetši se tšweletšwa ke go itlhoboga.”

Kgakanego. Morulaganyi wa puku yeo e bitšwago Urban Terrorism o bolela gore: “Mabakeng a mantši . . . tutuetšo ya motheo ya motšhošetši ke kgakanego ya kgonthe yeo go bonalago e bakwa ke matla a tša bopolitiki, tša leago le a tša boiphedišo.”

Go hloka toka. Michael Shimoff o bolela ka taodišong ya gagwe ya “Sebaki sa Kgonthe sa Botšhošetši” gore: “Botšhošetši ke seka sa bothata, e sego sebaki sa kgonthe.” O tšwela pele ka gore: “Pakane ya rena ya nako e telele e swanetše go ba go tloša dibaki tša motheo tša tšhošetšo ya tša leago le ya tša bopolitiki. . . . Ge re dutše re lwantšhana le botšhošetši, re swanetše go ba le maiteko a swanago a mafolofolo a go godiša tokologo, seriti, toka le go ba bohlokwa ga motho. Ke feela ge maiteko ao a mafolofolo a šoma moo re tlago go kgona go fediša ditshepedišo tša rena tša botšhošetši bjo bo hlaselago le bjo bo ganetšanago.”

Dibaki le histori ya botšhošetši di bontšhitše go rereša ga polelo ya Beibele e rego: “Motho o bušitše motho gore a mo gobatše.” (Mmoledi 8:9, NW) Beibele gape e boletše e sa le pele ka dibopego tšeo di bakago botšhošetši. E re: “Mehleng ya bofêlô xo tlo tla mabaka a mathata. Batho e tlo ba ba xo ithata, . . . e tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló; E tlo ba baeki, baipuši, baikxanthši.”—2 Timotheo 3:1-4.

Therešo ke gore maiteko a batho a go lwantšha botšhošetši, go sa šetšwe gore ke ao a tutuetšwago ke potego gakaakang, a ka se kgone go fediša dibaki tša bjona ka katlego. Beibele e bolela ka go  nepa gore: “Motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” (Jeremia 10:23) Lega go le bjalo, le ge tharollo bothateng bja botšhošetši e le ka godimo ga matla a batho, ka kgonthe ga e ka godimo ga matla a Modimo.

Tharollo

Bao ba fošeditšwego goba ba gateletšwego le bao ba ikwago ba gakanegile ba ka hwetša khomotšo kholofetšong e kgonthišeditšwego ya Beibele e rego: “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”—Diema 2:21, 22.

Kholofetšo ye ya Modimo e tla phethagatšwa kgaufsinyane. Mmuši wa gagwe, yoo e lego Kgoši e bušago Jesu Kriste, o tla dira seo. Boporofeta bja Beibele bo bolela mabapi le Kriste gore: “A ka se ahlole ka mo mahlô ’axwe a bônaxo; a ka se ripe taba ka mo ’tsêbê tš’axwe di kwilexo. Ó tlo ahlolêla babôtlana ka xo se hlaole motho, bahlaki ó tlo ba êmêla ka xo loka.”—Jesaya 11:3, 4.

Ee, kgaufsinyane Morwa wa Modimo Jesu Kriste o tla tloša go hloka toka gohle gotee le bao ba ikarabelago bakeng sa gona. Tshepedišong e mpsha ya Modimo ya go loka, botšhošetši le bosenyi bja mehuta ka moka e tla ba dilo tša nakong e fetilego. Ke moka yo mongwe le yo mongwe o tla phela ka polokego mo lefaseng, a lokologile go boifeng kotsi le ge e le efe.—Kutollo 21:3, 4.

[Seswantšho go letlakala 20]

Beibele e holofetša gore kgaufsinyane Modimo o tla tloša kgatelelo ka moka le go hloka toka