O a Amogelwa Kopanong ya Selete ya “Barutiši ba Lentšu la Modimo”!

BA DIMILIONE BA TLA BA GONA mafelong a makgolo go dikologa lefase. Go rulagantšwe dikopano tše 50 Afrika Borwa e nnoši. Ya pele e tla swarwa ka November 23-25, gomme ya mafelelo e tla ba ka January 4-6, 2002. Mohlomongwe e nngwe ya dipokano tše tša matšatši a mararo—e lego Labohlano go fihla ka Sontaga—e tla swarelwa motseng wa kgaufsi le mo o dulago gona.

Mafelong a mantši, lenaneo le tla thoma letšatšing le lengwe le le lengwe ka mmino ka 9:30 a.m. Polelo ya kamogelo ka Labohlano e tla latelwa ke dipolelo tše di nago le dihlogo tša Beibele tše di rego, “Go Ruta ka Mmušo go Enywa Dienywa tše Dibotse,” “Go Tutuetšwa ke ‘Matete a Modimo’” le “Hwetša Lethabo go Lokeng ga Jehofa.” Lenaneo la mesong le tla phetha ka polelo ya thwadi e rego, “Go Hlangwa ka mo go Feletšego re le Barutiši ba Lentšu la Modimo.”

Polelo ya mathomo ya thapama e rego, “Go Hlwekišwa re le Batho ba Mediro e Mebotse,” e tla latelwa ke tšhiedišano ya dikarolo tše tharo e rego “Go Ithuta Mola re Dutše re Ruta ba Bangwe.” Ye e tla gatelela bohlokwa bja go diriša seo motho a se rutago ge go tliwa tabeng ya boitshwaro, thuto ya motho ka noši ya Beibele le go nyakega ga go ganetša maiteko a Diabolo a go re aroša. Go tla latela polelo e rego, “Hlaswa Leuba la Lefase la Diswantšho Tšeo di Kgothaletšago Bootswa.” Ke moka lenaneo la letšatši le tla phetha ka polelo ya go ahla-ahlwa ga Jesaya kgaolo 60 e rego, “Jehofa o Thakgafatša Batho ba Gagwe ka Seetša.”

Dipolelo tša Mokibelo tše di rego, “Go Hwetša Tapologo ka Tlase ga Joko ya Kriste,” “Ekiša Morutiši yo Mogolo” le “Na o Ikemišeditše go Hlankela ba Bangwe?” di tla gatelela go nyakega ga go latela mohlala wa Kriste. Tšhiedišano ya diiri tše pedi yeo e nago le sehlogo se se rego, “Badiredi Bao Batho ba Bangwe ba Fetogago Badumedi ka Bona” le “Holwa ke Thuto ya Pušo ya Modimo ka Botlalo” le tšona di tla neelwa ka Mokibelo. Tšhiedišano ya mesong e tla nea ditšhišinyo tša go dira barutiwa, gomme ya thapama e tla gatelela ditsela tšeo ka tšona re ka holegago ka mo go tletšego thutong ya Beibele le go beng gona dibokeng tša Bokriste. Lenaneo la mesong le tla phetha ka polelo ya kolobetšo yeo ka morago ga yona go tla bago le sebaka sa go kolobetšwa ga bao ba swanelegago. Ba bantši ba tla fišegela go kwa polelo ya go phetha ka Mokibelo thapama e rego, “Ditokišetšo tše Difsa Bakeng sa Tšwelopele ya Rena ya Moya.”

Lenaneo la Sontaga mesong le tla akaretša tšhiedišano ya dikarolo tše tharo tšeo di ahla-ahlago puku ya Maleaki le go bontšha kamoo e šomago gabotse ka gona maemong a mehleng ya rena. Ye e tla latelwa ke terama ya moaparo o feletšego yeo e lego mabapi le borabele bja Kora, Dathane le Abirama malebana le matla a Moše a taolo ao a neilwego ke Modimo. Ka morago ga moo, polelo e tla gatelela molaetša woo o fetišeditšwego ke terama. Lenaneo la thapama le tla ba le polelo ya phatlalatša e nago le sehlogo se se rego, “Ke Bomang Bao ba Rutago Ditšhaba ka Moka Therešo?”

Ka kgonthe o tla humišwa moyeng ke go ba gona matšatšing ka moka a mararo. Bakeng sa lefelo la kgaufsi le mo o dulago gona, e-ya Holong ya Mmušo ya Dihlatse tša Jehofa ya lefelong la geno goba o ngwalele bagatiši ba makasine wo.