Bafsa ba a Botšiša . . .

Na Modimo o tla kwa Dithapelo Tša-ka?

“Ke rapela ka selo se sengwe le se sengwe ka gobane Jehofa ke mogwera wa-ka, e bile ke a tseba gore o tla nthuša ge e ba ke e-na le bothata.”—Andrea.

ANDREA yo mofsa o kgonthišegile gore Modimo o kwa dithapelo tša gagwe. Eupša ga se bafsa ka moka bao ba nago le kgonthišego e bjalo. Ba bangwe ba ikwa ba le kgole kudu le Modimo gore ba ka mmatamela. Ba ka ba ba ipotšiša ge e ba Modimo a e-na le taba le bona ka mo go lekanego gore a ka dira gore thapelo ya bona e be bohlokwa.

Sephiri sa thapelo ke sefe? Ge re bea taba ka tsela e bonolo, ke go ba le bogwera bja kgonthe le Modimo. Mopsalme o rapetše ka gore: “Ba ba tsebaxo leina la xaxo ba Xo holofetše.” (Psalme 9:10) Go thwe’ng ka wena? Na o tseba Modimo ka mo go lekanego kudu gore o ka mo holofela dithapelong tša gago? Pele o bala go tšwela pele, hle leka go araba dipotšišo tšeo di lego lepokising le le nago le sehlogo se se rego, “O Tseba Modimo Gabotse Gakaaka’ng?” O kgona go araba tše kae?

O TSEBA MODIMO GABOTSE GAKAAKA’NG? Dikarabo go letlakala 14.

1. Leina la Modimo ke mang, gomme le bolela’ng?

2. Ke dika dife tše nne tše dikgolo tša Modimo tšeo Beibele e di utollago?

3. Pontšho e kgolo ya lerato la Modimo la go rata batho ke efe?

4. Re ka thabela bjang bogwera le Modimo?

5. Ka tshwanelo, boemo bja rena bja kgopolo e swanetše go ba bofe ge re rapela?

Na o kgona go araba bonyenyane tše dingwe tša dipotšišo gona bjale gaešita le pele o bala sehlogo ka moka? Gona o šetše o tseba mo gontši ka Modimo go feta kamoo batho ba bantši ba mo tsebago ka gona. Lega go le bjalo, mo gongwe dikarabo tša gago di bontšha go nyakega ga go monya tsebo e oketšegilego ka yena, go mo tseba gabotse-botse. (Johane 17:3) O dutše o gopola seo, ela hloko dilo tše sego kae feela tšeo Beibele e re rutago tšona ka “Mokwi wa dithapêlô.”—Psalme 65:2.

Modimo ke Motho wa Kgonthe

Sa pele, Beibele e re thuša go lemoga gore Modimo ga se matla a itšego ao e sego motho. Ke motho yo a nago le leina, Jehofa. (Psalme 68:4) Ka Sehebere leina leo le bolela gore “Yo a Bakago go ba Gona.” A ka ba se sengwe le se sengwe seo a nyakago go ba sona e le gore a phethe morero wa gagwe. Matla a magolo ao e sego motho a ka se kgone go dira seo! Ka gona, ge o rapela, o ka kgonthišega gore ga o bolele le matla a boikgopolelo goba go bolela tše di tšewago ke moya. O bolela le  motho, yo a ka theetšago le go araba dithapelo tša gago.—Ba-Efeso 3:20.

Ke kamoo Diana yo mofsa a bolelago gore: “Ke tseba gore kae le kae moo ke lego gona, Jehofa o tla ntheetša.” Gore o be le kgodišego yeo, Modimo e swanetše go ba wa kgonthe go wena! Beibele e re: “E a batamêlaxo Modimo ó swanetše xo dumêla xore Modimo ó xôna.”—Ba-Hebere 11:6.

Mothopo wa Bohlale le Matla

Modimo a ka re thuša e le ka kgonthe ka gobane o na le matla a magolo ka go fetišiša. Matla ao ga se a lekanyetšwa bjalo ka ge go bontšhwa ke bogolo le go raragana ga legohle la kgonthe. Beibele e bolela gore Jehofa o tseba leina la naledi e nngwe le e nngwe—gaešita le ge go na le dimilione tše dikete tše di sa balegego tša tšona! Go feta moo, ke mothopo wa matla ka moka ao a lego ka dinaleding tšeo. (Jesaya 40:25, 26) Na seo ga se se se makatšago? Eupša le ge ditherešo tše di ka bonala e le tšeo di tlabago, Beibele e re “tše ke ditšhupo feela tša matla a gagwe”!—Jobo 26:14, Today’s English Version.

Nagana gape ka bohlale bja Jehofa bjo bo sa lekanywego. Beibele e re dikgopolo tša gagwe ‘di a iša.’ (Psalme 92:5) O dirile batho, ka baka leo o re kwešiša gakaone go feta kamoo rena re ikwešišago ka gona. (Psalme 100:3) Ka ge a bile gona “[go tloga ka] mehla e se naxo mathômô, e se naxo mafêlô,” o na le phihlelo e sa lekanywego. (Psalme 90:1, 2) Ga go na selo seo a sa se kwešišego.—Jesaya 40:13, 14.

Jehofa o diriša bjang matla ao ka moka le bohlale? Dikoronika tša Bobedi 16:9 e re: “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” Ge e le gabotse ga go na bothata bjo o ka bago le bjona bjoo Modimo a ka se kgonego go bo rarolla goba go go thuša go lebeletšana le bjona. Kayla yo mofsa o gopola gore: “Morago bjale, ge nna le lapa lešo re be re le mathateng, ke ile ka rapela Jehofa gomme ka ikwa gore o re thušitše go kgotlelela maemo, mathata le maikwelo ao ka ntle le moo ke bego nka se kgone go a rwala.” Ge o boledišana le Modimo, o ya go mothopo wa bohlale. Ga go selo se sekaone seo o ka se dirago go feta seo!

Modimo wa Toka le Lerato

Eupša o tseba bjang gore Modimo o nyaka go go thuša? Ka gobane Jehofa a kgethile gore a tsebje e sego ka matla a gagwe a magolo goba ka bohlale bja gagwe bjo bo išago, goba gaešita le ka toka ya gagwe yeo e sa šišinyegego. Go e na le moo, Jehofa o tsebja kudu-kudu ka seka sa gagwe sa lerato. Johane wa Pele 4:8 e re: “Modimo ké Yêna leratô.” (Mongwalo o sekamego ke wa rena.) Le gona lerato leo le legolo le dira gore thapelo e be le mošito. Ponagatšo e kgolo ya lerato la gagwe e bile go nea ga gagwe Morwa wa gagwe e le sehlabelo sa topollo e le gore re tle re thabele bophelo bjo bo sa felego.—Johane 3:16; 1 Johane 4:9, 10.

Ka ge Modimo e le lerato, le ka mohla ga se wa swanela go boifa gore o tla go hlokomologa goba a go swara ka tsela e sa swanelago. Doiteronomio 32:4 e re: “’Tsela tša’xwe tšohle di lokile.” Lerato leo Modimo a go ratago ka lona le go kgonthišetša gore o go theetša ka kelohloko. Se se dira gore re ikwe re lokologile go ka mo utollela dikgopolo tša rena tša ka sephiring le maikwelo.—Ba-Filipi 4:6, 7.

 Bogwera le Modimo

Ge e le gabotse, Jehofa o re laletša gore re bolele le yena. Ga a nyake gore e be o šele go rena. Ka mo go fapanego, go theoša le histori ya motho, Jehofa o laleditše batho gore e be bagwera ba gagwe. Gare ga bao ba ilego ba thabela bogwera le Modimo, bao ba bego ba kgahliša pelo ya gagwe e be e le banna le basadi, bafsa le ba godilego. Ba be ba akaretša batho ba bjalo ka Aborahama, Kgoši Dafida le Maria mmago Jesu.—Jesaya 41:8; Luka 1:26-38; Ditiro 13:22.

Le wena o ka ba yo mongwe wa bagwera ba Jehofa. Go ba gona, bogwera bjo bo bjalo ga bo bolele gore o swanetše go lebelela Modimo e le modingwana yo o boledišanago le yena ge feela o e-na le seo o se nyakago goba o e-na le bothata. Dithapelo tša rena ga se tša swanela go dikologa feela dinyakweng tša rena ka noši. Ge e ba re nyaka bogwera bja Modimo, re swanetše go kgahlegela thato ya gagwe—e sego ya rena feela—le gona ge e le gabotse re swanetše go dira thato ya Modimo. (Mateo 7:21) Ka gona, Jesu o ile a ruta barutiwa ba gagwe gore ba thee dithapelo tša bona dilong tšeo di lego bohlokwa go Modimo. O itše: “Lena, xe Le rapêla, Le re: Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:9, 10) Dithapelo tša rena gape di swanetše go tlala ka tumišo le go leboga Modimo!—Psalme 56:12; 150:6.

Lega go le bjalo, le ka mohla ga se ra swanela go nagana gore dinyakwa tša rena goba tšeo re tshwenyegago ka tšona ke tše dinyenyane kudu go ka di rapelela. Steve o re: “Gaešita le ge ke leka go ba yo a bulegilego go yena, ka dinako tše dingwe ke nagana gore ga se ka swanela go tshwenya Modimo ka dilo tše dingwe tše tlwaelegilego.” Nako le nako ge o thoma go nagana ka tsela yeo, leka go gopola seo Jesu a se rutilego barutiwa ba gagwe: “A dithaxa tše thlano xa di rekwe ka peni tše pedi? Le xe xo le byalo xa xo le e tee ya tšôna e lebalwaxo ke Modimo. . . . Ké xôna se boifeng; Le feta dithaxa tše ntši.” (Luka 12:6, 7) Na seo ga se se kgothatšago?

Ka gona, go bonolo go kwešiša gore ge o dutše o tseba ka Jehofa kutšwanyana, ke moo o tlago go tutueletšega go mmatamela ka thapelo e bile ke moo o tlago go ba le kgodišego ya gore Jehofa a ka go thuša e bile o tla go thuša. Ka gona, boemo bja gago bja kgopolo e swanetše go ba bofe ge o batamela Modimo ka thapelo? O swanetše go ba yo a hlomphago, yo a ikokobeditšego le yo a hlokago boithati. Na o nagana gore molaodi le ge e le ofe yo a phagamego mo lefaseng o be a tla go theetša ge e ba o kgopela ka mokgwa wa boikgogomošo le wa go se hlomphe? Ka gona, ga se wa swanela go makatšwa ke gore Jehofa le yena o lebeletše gore o mo hlomphe le go hlompha ditekanyetšo tša gagwe pele a tla araba dithapelo tša gago.—Diema 15:29.

Bafsa ba dikete bao ba boifago Modimo ba ithutile go utollela Modimo se se lego ka dipelong tša bona. (Psalme 62:8) Brett o re: “Ge Jehofa a araba dithapelo tša-ka, go a nkgothatša gore o sa dutše a le gona e le mogwera wa-ka.” Go thwe’ng ka wena? O ka kgona bjang go thabela bogwera bjo bo swanago le Modimo? Bafsa ba babedi ba Bakriste ba neile ditlhaloso tše di latelago:

Rachel: “Gore ke be kgaufsi le Jehofa, ke kwa go nyakega ga go ithuta Lentšu la gagwe ka mo go tseneletšego, gomme ke leka go hlagolela go hlologela thuto e bjalo.”—1 Petro 2:2.

Jenny: “Ke dumela gore ge o swarega kutšwanyana tirelong ya gagwe, ke moo o ikwago o le kgaufsi kudu le Jehofa.”—Jakobo 4:8.

Na o kile wa ipotšiša gabotse kamoo thapelo e holago kudu ka gona e le ka kgonthe? Mofsa yo mongwe wa Mokriste o re: “Ke be ke tla ikwa ke le kgaufsi le Modimo ge nkabe a tla bolela le nna goba a nthomela molaetša.” Ka ge Jehofa a sa re arabe ka go hlaboša lentšu ge re rapela, ge e le gabotse thapelo e ka re thuša bjang? Se se tla ahla-ahlwa tokollong ye e tlago.

[Lepokisi go letlakala 14]

Dikarabo tša dipotšišo tšeo di lego go letlakala 12

1. Jehofa. Le bolela gore “Yo a Bakago go ba Gona.”

2. Lerato, matla, toka le bohlale.

3. O ile a roma Morwa wa gagwe yo a tswetšwego a nnoši Jesu, gore a re hwele.

4. Ka go se tshwenyege feela ka dinyakwa tša rena ka noši, eupša le ka go kgahlegela thato ya Modimo le go e dira.

5. Re swanetše go ikokobetša, re bontšhe tlhompho le go hloka boithati.

[Diswantšho go letlakala 13]

Go ithuta Beibele le go ithuta go tšwa tlholong go tla go thuša go tseba Modimo gakaone