Pono ya Beibele

Na ke Phošo go Lla ge Motho a Hwile?

“BANA BEŠO! XA KE RATE XE LE HLÔKA TSEBÔ TABENG YA BA BA ITHÔBALETŠEXO, XORE LE SE KÊ LA HLOKOFALA BO-KA BA BANGWÊ BAO BA HLÔKAXO KHOLOFÊLÔ.”—1 BA-THESALONIKA 4:13.

BEIBELE e nea kholofelo bakeng sa bao ba hwilego. Go tsoša batho mo go dirilwego ke Jesu gotee le dithuto tša gagwe di šupa nakong yeo bahu ba tlago go bušetšwa bophelong. (Mateo 22:23-33; Mareka 5:35, 36, 41, 42; Luka 7:12-16) Kholofelo ye e swanetše go re kgoma bjang? Mantšu a moapostola Paulo ao a tsopotšwego ka mo godimo, a bontšha gore kholofelo ye e ka itlhatsela e le e homotšago ge yo o mo ratago a e-hwa.

Ge e ba o ile wa lahlegelwa ke yo o mo ratago lehung, ga go pelaelo gore o ile wa kwa bohloko maikwelong mo go sepedišanago le mahlomola a bjalo. Theresa yo monna wa gagwe wa nywaga e 42 a ilego a hwa gatee-tee ka morago ga go buiwa pelo, o re: “E be e le mo go tšhošago! Maikwelo a-ka a mathomo e bile a go tšhoga ka mo go feletšego. Ke moka go ile gwa latela bohloko bjo bogolo bjo bo ilego bja befela pele ge nako e dutše e feta. Ke be ke lla kudu.” Na karabelo e bjalo e bontšha go hloka tumelo kholofetšong ya Jehofa ya go tsoša bahu? Na mantšu a Paulo a bontšha gore go lla ke phošo?

Mehlala ya Bao ba Ilego ba Lla ka Beibeleng

Re hwetša karabo dipotšišong tšeo ka go hlahloba mehlala ya bao ba ilego ba lla ka Beibeleng. Dipegong tše dintši lehu la setho sa kgaufsi sa lapa le sepedišana le nako ya go lla. (Genesi 27:41; 50:7-10; Psalme 35:14) Maikwelo ao a sepedišanago le go lla mo gantši ke ao a bego a tseneletše kudu.

Ela hloko kamoo banna ba bangwe ba tumelo ba ilego ba lla ka gona ka baka la lehu la moratiwa. Ka mohlala, Aborahama o be a e-na le tumelo e tiilego ya gore Modimo a ka tsoša bahu. (Ba-Hebere 11:19) Gaešita le ge a be a e-na le kgodišego ye, ge mosadi wa gagwe a be a e-hwa o ile “a tla a mo [Sara] hlokofalêla a mo llêla.” (Genesi 23:1, 2) Ge barwa ba Jakobo ba be ba mmotša maaka gore morwa wa gagwe wa mmamoratwa e lego Josefa o hwile, Jakobo o ile “a xaxoxanya diaparo tša xaxwe, . . . a mo llêla a r’yalo.” (Genesi 37:34, 35) Ke ka baka leo nywaga e mentši ka morago, go gopola ga gagwe lehu la morwa wa gagwe yo a rategago go bego go sa dutše go imetše Jakobo gakaakaa! (Genesi 42:36-38) Kgoši Dafida le yena o ile a lla phatlalatša le gona o šoro  lehung la barwa ba gagwe ba babedi e lego Amoni le Abesalomo. Gaešita le ge bobedi bja bona ba ile ba bakela Dafida le lapa la gagwe kgateletšo, e be e sa dutše e le barwa ba gagwe, gomme mahu a bona a ile a mo tlišetša manyami a magolo.—2 Samuele 13:28-39; 18:33.

Ka dinako tše dingwe, setšhaba ka moka sa Isiraele se ile sa lla, go swana le ge se ile sa dira ka lehu la Moše. Doiteronomio 34:8 e re botša gore ba-Isiraele ba ile ba mo llela ka matšatši a 30.

Mohlala wa mafelelo ke wa Jesu Kriste. Mogwera wa gagwe wa kgaufsi e lego Latsaro o ile a hwa. Gomme ge Jesu a be a bona kamoo dikgaetšedi tša Latsaro e lego Mareta le Maria le bagwera ba bona ba bego ba lla ka gona, o ile “a huduêxa moyeng, a hlokofala.” Gaešita le ge a be a tseba gore metsotsong e sego kae o be a tla bušetša mogwera wa gagwe bophelong, fela o be a sa dutše a “tšwa mexôkxô.” Jesu o be a rata bagwera ba gagwe ba rategago, Mareta le Maria. Ka gona o ile a kgomega ka mo go tseneletšego ge a be a bona go nyamišwa ga bona ke lehu la kgaetšedi ya bona.—Johane 11:33-36.

Aborahama, Jakobo, Dafida le Jesu, ka moka ga bona ba ile ba bontšha tumelo go Jehofa le dikholofetšong tša gagwe, lega go le bjalo ba ile ba nyama. Na go lla ga bona e be e le leswao la go fokola moyeng? Na manyami a bona e be e le sešupo sa go hloka tumelo tsogong? Ga go bjalo le gatee! Go lla ke karabelo ya tlhago ya go arabela lehung la moratiwa.

Lebaka Leo re Llago

E be e se morero wa Modimo le gatee gore batho ba hwe. Morero wa Jehofa wa mathomong bjalo ka ge o boletšwe go Adama le Efa, e be e le wa gore lefase le fetošwe paradeise e botse yeo e tletšego ka lapa le lerato le leo le thabilego. Lehu le be le tla tla feela ge e ba banyalani bao ba pele ba be ba ka kgetha go se kwe Jehofa. (Genesi 1:28; 2:17) Ka manyami, Adama le Efa ba ile ba se kwe, gomme ka baka la go se kwe, “lehu le aparetše batho bohle.” (Ba-Roma 5:12; 6:23) Ka gona, lehu ke lenaba le lešoro leo go sa kago gwa rerwa gore le be gona.—1 Ba-Korinthe 15:26.

Ka gona, ke mo go kwagalago gore tiragalo yeo e sego ya tlhago ya lehu la motho yo mongwe wa kgaufsi le baka bohloko bjo bo tseneletšego bja maikwelo bakeng sa bao le ba kgomago. Le tšweletša sekgoba se segolo bophelong bja bona. Theresa yo e lego mohlologadi yo go boletšwego ka yena ka mo godimo, o boletše mabapi le monna wa gagwe gore: “Ke kgodišegile gore ke tla mmona gape tsogong, eupša gona bjale ke mo hlologetše kudu. Se ke seo ruri se nkwešago bohloko kudu.” Go hwa ga motswadi go ka re gopotša ka go tlo hwa ga rena. Lehu la motho yo mofsa le re kweša bohloko kudu-kudu ka baka la mahlomola ao a welago bophelo bjo bo sa phelwago ka mo go tletšego.—Jesaya 38:10.

Ee, lehu ga se selo sa tlhago. Bohloko bjoo le bo tšweletšago bo swanetše go letelwa gomme Jehofa ga a lebelele go lla e le go hloka tumelo tsogong. Bjale ka ge go bonwe ka mehlala ya Aborahama, Jakobo, Dafida, setšhaba sa Isiraele le Jesu, go bontšha bohloko bja pelo phatlalatša ga se leswao la gore re fokola moyeng. *

Lega go le bjalo, le ge rena bjalo ka Bakriste ka ntle le pelaelo re nyama ka baka la lehu, ga re hlokofale “bo-ka ba bangwê bao ba hlôkaxo kholofêlô.” (1 Ba-Thesalonika 4:13) Ga re nyame ka mo go feteletšego ka gobane ga se ra gakanega ge e le ka boemo bja bahu. Re tseba gore ga ba bohlokong goba kgateletšong, eupša ba boemong bjo bjalo ka boroko bjo bogolo bja khutšo. (Mmoledi 9:5; Mareka 5:39; Johane 11:11-14) Gape re na le kholofelo e tletšego ya gore Jesu, “tsoxô le bophelô,” o tla phethagatša kholofetšo ya go buša “bohle ba ba lexo mabitleng.”—Johane 5:28, 29; 11:24, 25.

Ka gona, ge e ba ga bjale o nyamile, hwetša khomotšo tsebong ya go tseba gore Jehofa o kwešiša bohloko bja gago. Eka tsebo ye le kholofelo ya gago tsogong di ka fokotša manyami a gago gomme tša go thuša go lebeletšana le go lahlegelwa ga gago.

[Mongwalo wa ka tlase]