Ga se ya Bafsa Feela

Jolanta wa nywaga e 25 o ile a hlalosa ka lengwalong le le yago ofising ya bolaodi ya Dihlatse tša Jehofa kua Poland gore o be a gateletšegile. O na le bofokodi bjo itšego mmeleng bjo bo mo šitišago go sepela, gomme lebakeng la dikgwedi tše tshela feela, bobedi mmagwe le makgolo’agwe ba ile ba hwa. Eupša ka nako yeo o ile a thoma go bala puku ya Dipotšišo tša Bafsa le Dikarabo tše Šomago. O ngwadile gore:

“Ke be ke dumela gore puku ye ke e holago bakeng sa bafsa e sego nna. Ke be ke fošitše gakaakang! Ka go ithuta dikgaolo 12 go ya go 16 tša puku, ke ile ka hwetša dikarabo tše di kwagalago dipotšišong tša-ka: ‘Ke ka baka la’ng ke ikwa ke gateletšegile gakaakaa e bile ke lewa ke bodutu?’ ‘Ke ka baka la’ng ke sa ithate?’ le ‘Ke ka baka la’ng ke ile ka hlokofala gakaakaa ka morago ga mahu a ba leloko ba-ka bao ke ba ratago?’”

O tšwetše pele ka gore: “Ke ile ka kgahlišwa ke dintlha tše pedi go letlakala 130: ‘Go tseba gore go nyama ga gago ke ga tlhago ke thušo e kgolo bakeng sa go thuša go lebeletšana le gona. Eupša go tšwela pele o gana therešo go tla fo dira gore manyami a tšwele pele ka nako e telele.’ Go bala mantšu a go ile gwa matlafatša go swarelela ga-ka kholofelong ya go bona bao ba robetšego lehung, e lego seo se ilego sa tlaleletša go ba le morero mo go tseneletšego bophelong bja-ka.”

Ge e ba o tla rata go fenya maikwelo a gago a kgateletšego gomme wa tlaleletša morero bophelong bja gago, re nagana gore le wena o tla holwa ke puku ya Dipotšišo tša Bafsa le Dikarabo tše Šomago. Bakeng sa go kgopela kopi, tlatša le go romela setlankana se se sepelago le sehlogo se atereseng yeo e bontšhitšwego setlankaneng goba atereseng e swanetšego e lokeleditšwego go letlakala 5 la makasine wo.

□ Hle nthomeleng puku ya Dipotšišo tša Bafsa le Dikarabo tše Šomago.

Bontšha gore ka leleme lefe.

□ Hle ikopanyeng le nna mabapi le thuto ya legae ya Beibele yeo e sa lefelelwego.