Go Fediša Ditiragalo tša ka Mehla tša Lehloyo

“Ratang manaba a lena.”—MATEO 5:44.

BAETAPELE ba ditšhaba tše pedi tšeo di hloyanego ba ile ba tšwetša pele dipoledišano tše di tseneletšego tša khutšo ka matšatši a mmalwa. Mopresidente wa naga e nngwe e nago le tutuetšo e matla le diintaseteri o be a le gona dipoledišanong, a diriša tutuetšo ya gagwe e kgolo le bokgoni bja ditherišano go leka go boelanya baetapele bao ba babedi. Eupša ditla-morago tša maiteko ao a bohloko e ile ya fo ba tlalelo e kgolo. Dibekeng tše sego kae feela, ditšhaba tše pedi di be di tsenetše seo makasine wa Newsweek o se biditšego “bošoro bjo bobe magareng ga tšona nywaga-someng e mebedi.”

Lefaseng ka bophara, lehloyo magareng ga merafe e sa swanego le dihlopha tša ditšhaba le gana go fela go sa šetšwe maiteko a mabotse a baetapele ba ditšhaba. Ditiragalo tša ka mehla tša lehloyo di tšwetšwa pele go feta le ge e le neng ke go hloka tsebo, kgethollo le phatlalatšo ya maaka. Eupša, le ge baetapele ba mehleng yeno ba sa atlege go hwetša tharollo e mpsha le mekgwa e mefsa, ba palelwa ke go bona gore tharollo e botse ke ya kgale—selo sa kgale se bjalo ka Thuto ya Thabeng. Nakong ya thuto yeo, Jesu Kriste o ile a kgothaletša batheetši ba gagwe go ikokobeletša ditsela tša Modimo. Boemong bjoo o ile a bolela mantšu ao a tsopotšwego ka mo godimo, a rego, “Ratang manaba a lena.” Kgothatšo yeo ga se feela tharollo e botse bothateng bja lehloyo le kgethologanyo, eupša ke tharollo e nnoši e šomago!

Babelaedi ba hlokomologa kgopolo ya go rata ga motho manaba a gagwe e le bjalo ka kgopolo e sa holego selo le e sa šomego. Lega go le bjalo, ge e ba batho ba ka kgona go ithuta go hloya, na ga se mo go kwagalago go nagana gore ba ka ithuta gape go se be le lehloyo? Ka gona, mantšu a Jesu a na le kholofelo ya kgonthe bakeng sa batho. A bontšha gore go a kgonega go phaela ka thoko gaešita le bonaba bjo bo tšerego nako e telele.

Nagana ka boemo mehleng ya Jesu a le ka gare ga batheetši ba gagwe ba ba-Juda. Go be go sa ba nyake gore ba ye kgole gore ba hwetše manaba. Madira a ba-Roma a ile a tšwela pele go buša tikologong, a gateletša ba-Juda ka metšhelo, boradia bja dipolitiki, go swarwa gampe le go dirišwa gampe. (Mateo 5:39-42) Lega go le bjalo, ba bangwe ba be ba tloga ba ka lebelela ba-Juda-gotee le bona bjalo ka manaba ka baka la go se dumelelane mo go nyenyane mo go tlogetšwego go sa rarollwa gomme go dumeletšwe gore go gole. (Mateo 5:21-24) Na Jesu ruri o be a lebeletše gore batheetši ba gagwe ba rate batho bao ba ba kgopišitšego le go ba kweša bohloko?

Seo se Bolelwago ke “Lerato”

Sa pele, lemoga gore ge a be a bolela ka “lerato” Jesu o be a se a gopola ka mohuta wa maikwelo ao a ka bago gona magareng ga bagwera ba kgaufsi. Lentšu la Segerika leo le dirišitšwego go Mateo 5:44 bakeng sa lerato, le tšwa go lentšu a·gaʹpe. Lentšu le le na le seo se bolelwago ke lerato leo le hlahlwago ke molao wa motheo. Ga se gore le swanetše go akaretša maikwelo a borutho. Ka ge le hlahlwa ke molao wa motheo wa go loka, lerato le bjalo le tutuetša motho go tsoma dikgahlego tša ba bangwe go sa šetšwe boitshwaro bja bona. Ka gona, lerato A·gaʹpe le ka fediša bonaba bja motho ka noši. Go e na le go kganyogela mašole a Roma ao a bego a mo kokotetše  koteng bobe, Jesu ka boyena o ile a bontšha lerato le le bjalo nakong ya ge a be a rapela ka gore: “Tata! Ba lebalêlê, xobane xa ba tsebe se ba se diraxo!”—Luka 23:34.

Na ke mo go kwagalago go letela gore lefase le tla amogela le go latela dithuto tša Jesu ka tekanyo e kgolo le gore batho ba tla thoma go ratana? Aowa, ka gobane Beibele e bontšha gore lefase le, le tla tšwela pele le nwelela ka mo go feletšego kotsing. Timotheo wa bobedi 3:13 e boletše e sa le pele gore: “Batho ba babe le baaroši, bobe bya bôná bo tlo fêla bò xola bò e-ya.” Lega go le bjalo, batho ba ka fediša ditiragalo tša ka mehla tša lehloyo ka go thoma go rutwa ka mo go tseneletšego ka melao ya motheo ya go loka ka thuto ya Beibele. Pego e bontšha gabotse gore ba bantši ba ile ba ithuta go ganetša lefula la lehloyo leo le sepelago go ba dikologa. Ela hloko dipego tše sego kae tša kgonthe.

Go Ithuta go ba le Lerato

Ge José a be a e-na le nywaga e 13, o ile a akaretšwa dintweng tša botšhošetši e le setho sa sehlopha sa batšhošetši. * O be a rutilwe go hloya batho bao ba gononelwago gore ba ikarabela ka go hloka toka mo go mo dikologilego mo a ilego a go bona. Ge nkabe go be go kgonega, maikemišetšo a gagwe e be e le go ba fediša. Ge José a bona ba bantši ba bagwera ba gagwe ba e-hwa, o ile a thoma go tlala maikwelo a bonaba le go itefeletša. Ge a be a dutše a dira digranata, o be a ipotšiša gore, ‘Ke ka baka la’ng go e-na le tlaišego e kaakaa? Ge e ba Modimo a le gona, na ga a lemoge?’ Dinakong tše dintši o be a lla, a gakanegile le go gateletšega.

Mafelelong José o ile a ikopanya le phuthego ya lefelong leo ya Dihlatse tša Jehofa. Sebokeng sa gagwe sa mathomo sa phuthego, o ile a lemoga kapejana tikologo e nago le lerato moo. Yo mongwe le yo mongwe o be a mo dumediša ka borutho le ka bogwera. Ka morago, polelo yeo e bego e na le sehlogo se se rego, “Ke ka Baka La’ng Modimo a Dumelela Bokgopo?” e ile ya nea dikarabo dipotšišong tšona tšela a bego a ipotšiša tšona. *

Ge nako e dutše e e-ya, tsebo e oketšegilego e tšwago Beibeleng e ile ya tutueletša José go dira  diphetogo bophelong bja gagwe le mokgweng wa gagwe wa go nagana. O ile a thoma go ithuta gore “’e a sa ratexo ngwan’abô, ó dula è le wa lehung. Mang le mang e a hloilexo . . . ké mmolai, xomme . . . xa xo mmolai e a naxo le bophelô byo bo sa felexo byo bo kaxo dula è le bya xaxwe.”—1 Johane 3:14, 15.

Lega go le bjalo, go kgaola ditlemo le bagwera ba gagwe ba batšhošetši go ile gwa itlhatsela e le tlhohlo. Nako le nako ge a be a e-ya Holong ya Mmušo ya Dihlatse tša Jehofa o be a šalwa morago. Ba bangwe ba bao e kilego ya ba bagwera ba gagwe ba be ba bile ba e-ba gona dibokeng tše dingwe e le gore ba kwešiše seo se tlišitšego phetogo e bjalo go José. Ka morago ge ba kgotsofetše gore ga se moeki goba gore ga a kotsi go bona, ba ile ba kgaogana le yena. Ge a e-na le nywaga e 17, José o ile a kolobetšwa e le yo mongwe wa Dihlatse tša Jehofa. Kapejana o ile a thoma go dira boboledi ka nako e tletšego. Go e-na le go rera go bolaya batho, mo nakong ye o ba tlišetša molaetša wa lerato le kholofelo!

Go Roba Mapheko a Bomorafe

Na ditho tša dihlopha tša merafo di ka roba mapheko a lehloyo leo le ba arogantšego? Nagana ka sehlopha seo se bolelago se-Amharic sa Dihlatse tša Jehofa kua London, Engelane. Sehlopha se se bopša ke batho ba ka bago 35—ba 20 ba bona ke ma-Ethiopia gomme ba 15 ke ma-Eritrea. Ba rapela gotee ka khutšo le ka kwano go sa šetšwe taba ya gore Afrika, ma-Eritrea le ma-Ethiopia ba lwele ntwa ya kgapha-madi morago bjale.

Hlatse e nngwe ya mo-Ethiopia e ile ya botšwa ke lapa la gabo yona gore: ‘Le ka mohla o se ke wa bota ma-Eritrea!’ Eupša mo nakong ye, ga a bote feela Bakriste-gotee le yena ba ma-Eritrea, eupša o ba bitša ngwanešo le kgaetšedi! Gaešita le ge ma-Eritrea a, ge e le gabotse a bolela leleme la se-Tigrinya, a ile a kgetha go ithuta se-Amharic—leleme la banababo bona ba ma-Ethiopia—e le gore ba ka ithuta Beibele gotee le bona. A bohlatse bjo bo kgahlišago gakaakang bja matla a lerato la go boifa Modimo e le “tlêmô ya botlalô”!—Ba-Kolose 3:14.

Go Lebala tša Kgale

Eupša go thwe’ng ge e ba motho e bile mohlaselwa wa tshwaro-mpe? Na ga se ga tlhago go boloka bonaba malebana le mohlokofatši wa motho? Nagana ka Manfred e lego Hlatse e tšwago Jeremane. O ile a fetša nywaga e tshela ya bophelo bja gagwe a le ka kgolegong ya Bokomanisi e le feela ka gobane e be e le yo mongwe wa Dihlatse tša Jehofa. Na o kile a ikwa a hloile bagateledi ba gagwe goba go ba le kganyogo ya go itefeletša? O  arabile ka gore: “Aowa.” Go ya ka kuranta ya Jeremane ya Saarbrücker Zeitung, Manfred o hlalositše gore: “Go hloka toka le go itefeletša . . . go boloka ditiragalo tša lehloyo di tšwela pele mo e lego gore nako le nako di lebiša go hlokeng toka mo go fsa.” Manfred o ile a diriša ka mo go kwagalago mantšu a Beibele a rego: “Le se kê la lefetša motho bobe ka bobe. . . . Xe xo kxônêxa ka thokô ya lena, Le phedišanê xa-botse le batho ka moka.”—Ba-Roma 12:17, 18.

Lefase Leo le se Nago Lehloyo!

Dihlatse tša Jehofa ga di ipolele gore di phethagetše tabeng ye. Gantši di hweditše gore go beela ka thoko bonaba bja kgale le lehloyo ga go bonolo. Go nyakega boiteko bjo mafolofolo le bjo bo tšwelago pele go diriša melao ya motheo ya Beibele bophelong bja motho. Eupša ka kakaretšo, Dihlatse tša Jehofa ke mohlala o phelago wa matla a Beibele a go fediša ditiragalo tša ka mehla tša lehloyo. Ka lenaneo la dithuto tša magae tša Beibele, Dihlatse di thuša batho ba dikete ngwaga o mongwe le o mongwe go itokolla ditlemong tša bomorafe le kgethologanyo. * (Bona lepokisi le le rego, “Keletšo ya Beibele e Thuša go Fediša Lehloyo.”) Katlego yeo ke hlasenyana feela ya ditla-morago tša lenaneo la lefase ka moka la thuto leo kgaufsinyane le tlago go thuša go fediša lehloyo le dibaki tša lona ka mo go feletšego. Lenaneo le la nakong e tlago la thuto le tla šoma ka tlase ga tlhokomelo ya Mmušo wa Modimo, goba mmušo wa lefase ka bophara. Jesu o re rutile go rapelela Mmušo woo Thapelong ya Morena ge a be a re: “Mmušô wa xaxo a o tlê.”—Mateo 6:9, 10.

Beibele e holofetša gore ka tlase ga tlhokomelo ya mmušo wo wa legodimong, “xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:9; 54:13) Ka nako yeo lefaseng ka moka go tla phethagala mantšu ao a tsopolwago gantši a moporofeta Jesaya a rego: “[Modimo] Ó tlo buša ba dithšaba, ó tlo ahlolêla ba merafo-rafo. Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” (Jesaya 2:4) Ka gona, Modimo ka boyena o tla fedišetša sa ruri ditiragalo tša ka mehla tše šoro tša lehloyo.

[Mengwalo ya ka tlase]

[Lepokisi go letlakala 11]

Keletšo Ya Beibele E Thuša Go Fediša Lehloyo

● “Dintwa le diphapang xare xa lena di tšwa kae? Mo di tšwaxo xôna šefa: A xa se dikxanyoxong tša lena di lošanaxo mo dithong tša lena?” (Jakobo 4:1) Diphapang le batho ba bangwe gantši di ka fedišwa ge e ba re ithuta go laola dikganyogo tša boithati.

● “Motho a se kê a šetša tša xo ikhola; a a šetšê tša xo hola ba bangwê.” (Ba-Filipi 2:4) Go etiša dikgahlego tša ba bangwe pele ga tša rena ke tsela e nngwe ya go fediša phapano e sa nyakegego.

● “Lesa xo xalefa, O ilê lehlôyô; xe O ka selekêxa O tlo bá wa senya.” (Psalme 37:8) Re ka kgona, e bile re swanetše go laola ditshekamelo tše di senyago.

● “Modimo . . . ké Yêna a dirilexo xore meloko ka moka ya batho e tšwê mading a o tee, e ênêlê lefase lohle.” (Ditiro 17:24, 26) Ke mo go se nago tlhaologanyo go ikwa o phagametše batho ba morafo o mongwe, ka ge ka moka ga rena re le ditho tša lapa letee la batho.

● “Le se kê la dira selô ka kxang le ka xo nyaka xo rêtwa. Sa lena a e bê xo ipoetša le xo phalana xo xodišaneng.” (Ba-Filipi 2:3) Ke bošilo go tšeela batho ba bangwe fase—ka ge batho ba bangwe gantši ba na le dika tše dibotse le bokgoni tšeo rena ka noši re se nago tšona. Ga go na morafo goba setšo seo se kgonago go itirela dilo ka moka tše dibotse ka noši.

● “Byale xe re sa na le lebaka, a re direng botse; re bo dirêlê batho bohle, xa-xolo re bo dirêlê batho ba-bô-rena ba tumêlô.” (Ba-Galatia 6:10) Go fo gata mogato wa pele ka go bontšha bogwera le go ba yo a thušago go ba bangwe, go sa šetšwe morafo wa bona goba setšo, go ka thuša kudu go bula mokero wa poledišano le go fediša go se kwešišane.

[Diswantšho go letlakala 8, 9]

Dihlatse tša ma-Ethiopia le ma-Eritrea di rapela gotee ka khutšo

[Seswantšho go letlakala 10]

Manfred, mophologi wa kgolego ya Bokomanisi, o ile a gana go ineela lehloyong

[Seswantšho go letlakala 10]

Beibele e ka thuša bakeng sa go roba mapheko ao a aroganyago batho