Leuba la Lefase ka Bophara la Lehloyo

GO NA le selo-tsoko seo se sa thibelegego—selo-tsoko seo se bitšwa lehloyo. Le gona le oketšega lefaseng ka bophara.

Profense ya kua Balkans e sa dutše e tlaišwa ke mafelelo a lesolo la morago bjale la go hlwekišwa ga morafo. Bonaba bjo bo tšerego nywaga-kgolo bo ile bja lebiša dipolaong tše dintši, go kata, go lelekwa, go tšhungwa le go thopša ga magae le metsana, go senywa ga dibjalo le maruo gotee le tlala. Dithuthupi tša go epelwa fase di sa dutše di atile.

Ka Bohlabela bja Timor, ka Borwa-bohlabela bja Asia, batho bao ba tšhogilego ba 700 000 ba ile ba swanelwa ke go tšhaba tšhošetšo ya dipolao, go bethwa, go thunya ka go se hlaole le go hudušwa ka kgapeletšo. Ba ile ba tlogelwa ba le tikologong ya mašope ke dihlopha tše sego molaong tša mašole. Yo mongwe wa bahlaselwa o llile ka gore: “Ke ikwa bjalo ka phoofolo e tsongwago.”

Kua Moscow, moago wa go ba le diphapoši o ile wa pšhatlaganywa ke mothuthupo o mogolo wa pomo ya botšhošetši. Ditopo tša batho ba 94 bao ba se nago molato—tšeo tše dingwe tša tšona e bego e le tša bana—di be di phatlaladitšwe gohle ke mothuthupo. Go ile gwa gobala batho ba fetago 150. Ka morago ga dipoelo tša letšhogo le bjalo, batho ba ile ba botšiša gore, ‘Go tla latela bomang?’

Kua Los Angeles, California, motho yo a hloilego merafo e mengwe o ile a itlhama le go thuntšha sehlopha sa bana ba sekolo sa bo-mapimpana ba ba-Juda gomme ka morago a thuntšha ra-poso wa mo-Philippine.

Lehloyo le ka hlaloswa ka mo go swanetšego e le leuba la lefase ka bophara. Mo e nyakilego e le letšatši le lengwe le le lengwe, dipego tša ditaba di utolla seo se diregago ge lehloyo la semorafe goba la bodumedi le kopana le go hloka molao. Re bona ditšhaba, metse le malapa di arogana. Re bona dinaga di tseneletše dipolaong tša kakaretšo tša molokwana-rite. Re bona ditiro tše di boifišago tše sehlogo di dirwa feela ka baka la gore batho ba bangwe e le “ba fapanego.”

Ge e ba selo-tsoko seo se bitšwago lehloyo se sa tlo tšwela pele go baka tšhitišo, re swanetše go kwešiša modu wa lehloyo le bjalo le lešoro. Na lehloyo le bjetšwe ka dikarolwaneng tša motho tša leabela? Na ke mokgwa wo o ithutwago? Na go a kgonega go fediša ditiro tša ka mehla tša lehloyo?

[Mothopo wa Seswantšho go letlakala 3]

Kemal Jufri/Sipa Press