Bafsa ba a Botšiša . . .

Thapelo e ka Nthuša Bjang?

“Ke thapelo yeo e nthušitšego go tsenya bophelo bja-ka tseleng e lokilego.”—Brad. *

BAFSA ba bantši ba a rapela—mohlomongwe gaešita le go feta kamoo o naganago ka gona. Nyakišišo ya Gallup ya Bafsa ba nywaga e 13 go ya go e 17 kua United States e utolotše gore 56 lekgolong ya bona ba rapela pele ba e-ja dijo tša mantšiboa. Nyakišišo ya bafsa ba ba gotšego e bontšhitše gore 62 lekgolong ya bona ba rapela letšatši le lengwe le le lengwe.

Lega go le bjalo, go bafsa ba bantši thapelo e fo ba mokgwa o se nago mohola goba tlwaelo feela. Bafsa ba sego kae ba na le seo Beibele e se bitšago “tsebo e nepagetšego ya Modimo.” (Ba-Kolose 1:9, 10, NW) Ka go rialo, Modimo ga a kgathe tema e kgolo maphelong a bona. Nyakišišo e nngwe e ile ya botšiša bafsa ge e ba ba kile ba retologela go Modimo bakeng sa go kgopela thušo ge ba dira phetho e bohlokwa. Ngwanenyana yo mongwe o arabile ka gore: “Ke retologela go Modimo ka mehla ka thapelo bakeng sa gore a ntlhahle go kgetha ditsela tše di lokilego bophelong.” Lega go le bjalo o dumetše gore: “Ga ke gopole phetho e lokilego le ge e le efe gona bjale.” Ka gona, ga se mo go makatšago gore bafsa ba bantši ba hloka kholofelo ya gore thapelo e na le matla le ge e le afe goba gore e tla ba hola!

Lega go le bjalo, go swana le Brad yo a tsopotšwego mathomong, bafsa ba dikete ba ile ba lemoga ka bobona matla a thapelo. Le wena o ka lemoga seo! Sehlogo se se fetilego se ile sa bontšha lebaka leo ka lona re ka kgodišegago gore Modimo o tla kwa dithapelo tša rena. * Bjale potšišo ke gore, Thapelo e ka go thuša bjang? Sa pele, anke re ahla-ahleng kamoo Modimo a arabago dithapelo tša rena.

Kamoo Modimo a Arabago Dithapelo ka Gona

Mehleng ya Beibele, banna ba bangwe ba tumelo ba ile ba hwetša dikarabo tše lebanyago—gaešita le tša mehlolo—dithapelong tša bona. Ka mohlala, ge Kgoši Hiskia a be a lemoga gore o na le bolwetši bjo bošoro, o ile a lopa Modimo bakeng sa tlhakodišo. Modimo o ile a araba ka gore: “Thapêlò ya xaxo ke e kwile; mexôkxô ya xaxo ke e bone. Ke tlo Xo fodiša.” (2 Dikxoši 20:1-6) Banna le basadi ba bangwe bao ba boifago Modimo ka mo go swanago ba ile ba hlakodišwa ke Modimo.—1 Samuele 1:1-20; Daniele 10:2-12; Ditiro 4:24-31; 10:1-7.

Lega go le bjalo, tlhakodišo ya Modimo e be e se mokgwa wa ka mehla gaešita le mehleng ya  Beibele. Ka kakaretšo, Modimo o ile a araba dithapelo tša bahlanka ba gagwe e sego ka go nea tlhakodišo ya mohlolo, eupša ka go ba thuša gore ba “tlatšwê tsebô ya xo tseba thatô ya xaxwe, [ba] bê le bohlale ka moka le thlaoloxanyô ya Môya.” (Ba-Kolose 1:9, 10) Ee, Modimo o ile a thuša ka go matlafatša batho ba gagwe moyeng le boitshwarong—a ba nea bohlale le tsebo bakeng sa go dira diphetho tše bohlale. Ge Bakriste ba be ba le boemong bjo thata, Modimo ga se a fo tloša teko. Go e-na le moo, o ba nea “matla ao a fetišago a tlhago” e le gore ba ka e kgotlelela!—2 Ba-Korinthe 4:7, NW; 2 Timotheo 4:17.

Ka mo go swanago lehono, karabo thapelong ya gago ga se gore e tla akaretša selo se itšego se makatšago. Eupša bjalo ka ge a dirile nakong e fetilego, Modimo a ka go nea moya wa gagwe o mokgethwa le go go matlafaletša go swaragana le maemo le ge e le afe ao o lebanago le ona. (Ba-Galatia 5:22, 23) Go bontšha se, anke re lebeledišišeng ditsela tše nne tše kgethegilego tšeo ka tšona thapelo e ka go thušago.

E ka go Thuša go Direng Diphetho

Karen o be a beana mabaka le lesogana leo le bego le bonala le e-na le dipakane tše phagamego tša moya. O re: “O be a fela a mpotša ka mehla gore o nyaka go ba mogolo ka phuthegong.” Se ka moka se be se kwagala e le se sebotse. Eupša “o be a bolela kudu gape ka kgwebo yeo a bego a e thoma le dilo ka moka tšeo a tla kgonago go nthekela tšona. Ke ile ka thoma go belaela potego ya gagwe.” Karen o ile a rapela mabapi le se. “Ke ile ka kgopela Jehofa gore a mpule mahlo gomme a mpontšhe seo ke nyakago go se tseba ka yena.”

Ka dinako tše dingwe, tiro feela ya go rapela ke e holago, ka ge e ka go thuša go ema le go naganišiša taba go ya ka pono ya Jehofa. Eupša Karen gape o be a nyaka keletšo e šomago. Na o be a tla hwetša karabo ya mohlolo? Ka gona, nagana ka pego ya Beibele ya mabapi le Kgoši Dafida. Ge a tsebile gore mogwera wa gagwe yo a mmotago Ahithofele o be a eletša morwa wa gagwe wa moeki e lego Abesalomo, Dafida o ile a rapela ka gore: “Morêna a k’O dirê xore keletšô ya Ahitofele e bê botlatla.” (2 Samuele 15:31) Eupša Dafida gape o ile a dira ka go dumelelana le thapelo ya gagwe. O ile a nea mogwera wa gagwe Husai thomo ye: “Xe O ka r’yalo O tlo kxôna xo loxolla manô a Ahitofele.” (2 Samuele 15:34) Ka tsela e swanago, Karen o ile a gata mogato ka go dumelelana le thapelo ya gagwe ka go boledišana le mogolo yo a gotšego wa Mokriste yo a bego a tseba lesogana la gagwe. Mogolo o ile a kgonthišetša poifo ya gagwe: Lesogana la gagwe le be le sa dire tšwelopele ya moya.

Karen o re: “Boemo bjoo bo ile bja mpontšha ka mo go feletšego matla a thapelo.” Ka manyami, lesogana la gagwe la kgale le ile la phegelela mahumo gomme la kgaotša go hlankela Modimo. Karen o re: “Ge nkabe ke nyalane le yena, nkabe ke tla tla dibokeng tša Bokriste ke nnoši.” Thapelo e thušitše Karen go dira phetho e botse.

E ka go Thuša go Laola Maikwelo a Gago

Beibele go Diema 29:11 e re: “Setlatla se thšolla tšohle tša pelong ya sôna; mohlale ó di bolokêla la ka mosô.” Bothata ke gore batho ba bantši lehono ba phela ka tlase ga kgateletšo e tseneletšego ya maikwelo gomme gantši ba palelwa ke go laola maikwelo a bona—ka dinako tše dingwe ka mafelelo a kotsi. Brian yo mofsa o a gopola: “Ke be ke e-na le mathata le mošomi-gotee le nna. Ka letšatši le lengwe o ile a ntšha thipa.” O be o tla dira’ng? Brian o ile a rapela. O re: “Jehofa o ile a nthuša gore ke dule ke thekgile ditho, gomme ke ile ka boledišana le mošomi-gotee le nna ka bothata. O ile a lahlela thipa fase gomme a sepela.” Go laola maikwelo a gagwe go ile gwa thuša Brian go phema go fehla kgalefo gomme se mohlomongwe se ile sa phološa bophelo bja gagwe.

Gantši o ka no se ikhwetše o šupilwe ka thipa. Eupša go tla ba le maemo a mantši bophelong bja gago moo o tlago go swanelwa ke go laola maikwelo a gago. Thapelo e ka go thuša go dula o thekgile ditho.

E ka go Thuša Dipelaelong

Barbara o gopola a “lekwa” nywageng e itšego e fetilego. O re: “Mošomo wa-ka, lapa, bagwera—go be go se seo se bego se bonagala se atlega. Ke be ke sa tsebe seo ke bego nka se dira.” Barbara o ile a rapelela thušo ka diphegelo. Eupša bothata bo ile bja tšwela pele. O re: “Ke be ke sa tsebe seo ke swanetšego go se kgopela go Jehofa. Mafelelong ke ile ka kgopela khutšo ya monagano. Ke ile ka mo kgopela bošego bjo bongwe le bjo bongwe gore a nthuše gore ke se ke ka belaela selo.”

Thapelo yeo e ile ya mo thuša bjang? O re: “Matšatši  a sego kae ka morago, ke ile ka lemoga gore gaešita le ge mathata a-ka a se a fela, ke be ke se sa hlwa ke tshwenyegile ka wona le ka mohla.” Beibele e holofetša gore: “Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”—Ba-Filipi 4:6, 7.

E ka go Thuša go Batamela Kgaufsi le Modimo

Nagana ka mohlala wa mofsa yo a bitšwago Paul. O re: “Ke be ke sa tšwa go hudugela go metswalo ya-ka. Bošegong bjo bongwe ke ile ka ikhwetša ka gare ga kgateletšego e feteletšego. Ke be ke sa tšwa go aloga sekolong se se phagamego gomme ke hlologetše bagwera ba-ka ka moka. Bošegong bjoo, mahlo a-ka a be a ela megokgo ge ke dutše ke nagana ka dinako tše thabišago tšeo re di thabetšego gotee.” Ke’ng seo Paul a bego a ka se dira? Ka lekga la mathomo, o ile a rapela ka go se kgaotše. O re: “Ke ile ka bula pelo ya-ka gomme ka kgopela matla le khutšo ya monagano go Jehofa.”

Mafelelo e bile afe? Paul o gopola gore: “Mesong e latelago, ke ile ka tsoga ke ikwa ke imologile go feta le ge e le neng bophelong bja-ka. Ke ile ka tloga boemong bja kgakanego bja monagano go ya go hwetšeng ‘khutšo ya Modimo ye e fetago tlhaologanyo yohle.’” Ga bjale ka ge pelo ya gagwe e be e kokobetše, Paul o ile a lebelela dilo ka pono e kaone ya maikwelo. Gape o ile a lemoga kapejana gore ‘matšatši a kgale a mabotse’ a be a se botse go phala a mangwe ka moka. (Mmoledi 7:10) Ge e le gabotse, “bagwera” bao a bego a ba hlologetše kudu ga se ba ba le tutuetšo e botse go yena.

Go feta moo, Paul o ile a hlokomelwa ke Jehofa e le motho ka noši. O ile a bona go rereša ga mantšu a Jakobo 4:8 e rego: “Batamêlang Modimo, le Yêna a Le batamêlê.” Ye e bile phetogo e kgolo kudu go Paul. O ile a tutueletšega go etiša Jehofa pele ga selo le ge e le sefe bophelong bja gagwe le go neela bophelo bja gagwe go yena.

Boledišana le Modimo!

Diphihlelo tše tša kgonthe di nea kgonthišetšo ya gore thapelo e ka go thuša. Go ba gona, se se bjalo feela ge e ba o ikemišeditše go tseba Modimo le go hlagolela segwera le yena. Ka manyami, bafsa ba bantši ba kgaoditše go dira bjalo. Carissa o godišeditšwe ka legaeng la Bokriste. Eupša o dumela gore: “Ke nagana gore ke feela nywageng e sego kae e fetilego moo ke ilego ka kwešiša ka mo go tletšego bohlokwa bjo bogolo bja tswalano ya rena e sa lekanywego le Jehofa.” Brad yo go boletšwego ka yena mathomong, o ile a godišwa e le Mokriste, eupša o ile a tlogela borapedi bja therešo ka nywaga e mentši. O re: “E bile ka morago ga ge ke lemogile seo se ntahlegetšego moo ke ilego ka retologela go Jehofa. Ga bjale ke tseba kamoo bophelo e ka bago bjo thata le bjo bo se nago mohola ka gona ka ntle le tswalano yeo.”

Lega go le bjalo, o se ke wa letela gore o welwe ke mathata pele o batamela kgaufsi le Modimo. Thoma go boledišana le yena gona bjale—ka mehla! (Luka 11:9-13) ‘Tšhollela pelo ya gago pele ga gagwe.’ (Psalme 62:8) O tla lemoga kapejana gore thapelo ka kgonthe e ka go thuša!

[Mengwalo ya ka tlase]

[Lepokisi/Diswantšho go letlakala 25]

Thapelo e ka go Thuša go

● Dira diphetho tše kaone

● Thekga ditho nakong ya tlalelo

● Hwetša kimologo dipelaelong

● Batamela kgaufsi le Modimo