Kgateletšego ya Khuduego ya Maikwelo e tla Fela!

MOHLOMONGWE o kile wa ba setho sa madira a itlhamilego gomme o tlaišwa ke digateledi le go tlelwa ke megopolo ya ditiragalo tša nakong e fetilego tšeo di dirago gore go bonale eka ntwa e sa dutše e kgatlampana go wena. Mohlomongwe o mohlaselwa wa bošoro bja go hwa pelo bjo bjalo ka go katwa gomme o ikwa gore karolo ya gago e ile ya hwa ka baka la letšhogo la tiragalo. Goba e ka no ba gore yo mongwe yo o mo ratago o hwile kotsing ya tlhago goba kotsing gomme go phela ka ntle le yena go bohloko kudu.

Na o ipotšiša ge e ba maikwelo a bjalo a tla ka a fetoga? Re ka araba ka kgodišego gore: Ee, a ka fetoga! Mo nakong ye, bohle bao ba tlaišwago ke khuduego ya maikwelo ba ka hwetša khomotšo ka Lentšung la Modimo, Beibele.

Go Thušwa go Kgotlelela Khuduego ya Maikwelo

Mo e ka bago nywaga e dikete tše pedi e fetilego, moapostola Paulo o ile a welwa ke ditiragalo tše šoro tšeo di beago bophelo kotsing. Tlhaloso ya gagwe ka tše dingwe tša tše e bolokilwe ka Beibeleng. Paulo o ngwadile gore: “Xa ke rate xe lena Bana bešo Lè ka dula Lè sa tsebe tša dihlokofalô tše di re tletšexo naxeng ya Asia, tša re imêla wa xo re rôba, ra ba ra fêlêlwa ke kholofêlô ya xo re re sa tlo phela. Mo dipelong tša rena xo be xo setše xo tiile la xo re re tlo hwa; ya ba xore re lesê xo ipôta, re bôtê Modimo e a kxônaxo xo tsoša le bahu.”—2 Ba-Korinthe 1:8, 9.

Le ge go sa tsebje gabotse seo se ilego sa direga boemong bjoo, ka ntle le pelaelo e be e le bjo bo huduago maikwelong. (2 Ba-Korinthe 11:23-27) Paulo o ile a kgona bjang go kgotlelela?

 Ge a be a nagana ka diteko tša gagwe kua Asia, o ngwadile gore: “A xo rêtwê Modimo, Yêna Tata xo Mong wa rena Jesu Kriste, Yêna Radikxauxêlô, Modimo wa khomotšô yohle, E a re homotšaxo mahlokong a rena ohle, xore ba ba lexo mahlokong bohle re kxônê xo ba homotša ka yôna khomotšô ye rena re homotšwaxo ka yôna ké Yêna Modimo.” (Mongwalo o sekamego ke wa rena.)—2 Ba-Korinthe 1:3, 4.

Ee, thušo bakeng sa baphologi ba khuduego ya maikwelo e hwetšwa go “Radikxauxêlô, Modimo wa khomotšô yohle.” O ka hwetša bjang khomotšo e bjalo?

Kamoo o ka Hwetšago Thušo ka Gona

Sa pele—kgopela thušo. Ge e ba o ikwa o nyamile maikwelong, gopola gore ba bangwe ba ile ba ikwa ka tsela yeo le bona. Bao ba kilego ba fenya maikwelo a bjalo gantši ba thabela go thuša ba bangwe. Go swana le moapostola Paulo, gantši ba ikwa gore khomotšo yeo ba e hweditše go Modimo nakong ya diteko tša bona e swanetše go abelanwa le ‘bao ba lego tlaišegong ya mohuta le ge e le ofe.’ O se ke wa dika-dika go batamela yo mongwe wa Dihlatse tša Jehofa—yo mongwe le yo mongwe yo o ka ikwago o lokologile go ka boledišana le yena—gomme o kgopele thušo ya go hwetša tlhakodišo go Jehofa, “Modimo wa khomotšô yohle.”

Phegelela thapelong. Ge e ba go rapela go le thata ka baka la go ikwa o galefile, kgopela yo mongwe yo a swanelegago moyeng gore a rapele le wena. (Jakobo 5:14-16) Ge o boledišana le Jehofa Modimo, gopola go ‘lahlela dipelaelo tša gago ka moka godimo ga gagwe, gobane ke yena a go belaelelago.’ (1 Petro 5:7) Mangwalo a gatelela leboelela tlhokomelo ya motho ka noši yeo Modimo a nago le yona bakeng sa yo mongwe le yo mongwe wa bahlanka ba gagwe.

Mongwadi wa Psalme 94 a ka ba a ile a ba le phihlelo ya se sengwe seo se bego se hudua maikwelong kudu, ka gobane o ile a ngwala gore: “Xe nkabe ke se thušwe ke Morêna, môya wa-ka o kabe o šetše ò ituletše khomolelong. Mohla kè šetše kè re ke a thêkêsêla, ka thêkxwa ke botho bya xaxo, Morêna. Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo.”—Psalme 94:17-19.

Ba bangwe bao ba tlaišwago ke khuduego ya maikwelo ba tshwenywa kudu-kudu ke “dikgopolo tše di ferekanyago” tšeo ka dinako tše dingwe e ka bago lefula leo le fetšago matla la letšhogo le kgalefo. Lega go le bjalo, thapelo e tšwago pelong e ka thuša go go “matlafatša” go fihlela ge maikwelo ao a feta. Lebelela Jehofa a le bjalo ka motswadi yo lerato gomme wena o itebelele bjalo ka ngwana yo monyenyane yo ka lerato a mo šireletšago. Gopola kholofetšo ya Beibele ya gore “khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”—Ba-Filipi 4:7.

Go fodišwa—go sa šetšwe gore ke mmeleng, monaganong goba moyeng—ke mosepelo wo o nanyago. Ka gona e tla ba mo go se nago tlhaologanyo go letela gore thapelo e tla nea khutšo ya  kapejana go bao ba gobaditšwego kudu ke phihlelo ya go huduega maikwelong. Lega go le bjalo thapelo ya go phegelela e bohlokwa. E tla thuša go thibela motlaišegi go gateletšegeng le go gogelwa manyaming ga ka morago ga go huduega maikwelong.

Bala le go naganišiša ka Lentšu la Modimo. Ge e ba go tsepamiša kgopolo go le thata, kgopela yo mongwe go bala dipego tše homotšago tša ka Beibeleng le wena. O ka kgetha ditemana tšeo di utollago go tsenelela ga tlhokomelo e borutho ya Jehofa bakeng sa batho ba gagwe ba ba botegago go sa šetšwe gore ba gateletšegile goba ba ikwa ba itlhobogile gakaakang.

Jane yo go boletšwego ka yena dihlogong tše di fetilego, o ile a hwetša khomotšo go tšwa ditemaneng tše dintši tša Beibele go Dipsalme. Di akaretša Psalme 3:1-8; 6:6-8; 9:9, 10; 11:1-7; 18:5, 6; 23:1-6; 27:7-9; 30:11, 12; 31:12, 19-22; 32:7, 8; 34:18, 19; 36:7-10; 55:5-9, 22; 56:8-11; 63:6-8; 84:8-10; 130:1-6. O se ke wa leka go bala ditemana tše dintši tša Beibele ka nako e tee. Go e na le moo, tšea nako o naganišiša ka tšona le go rapela.

Matshwenyego a Moswana-noši Gona Bjale

Ka manyami, ga se gwa swanela go ba mo go makatšago gore go kata, dipolao, dintwa le bošoro bjo bo sa nyakegego di atile kudu lehono. Ka baka la’ng? Ka gobane Jesu Kriste o ile a hlaola mehla ya rena e le yeo go yona go bego go tla ba le “go ata ga go hloka molao.” O okeditše ka gore: “Lerato la ba bantši le tla fola.”—Mateo 24:7, 12, NW.

Nywageng ya morago bjale, kgateletšego ya khuduego ya maikwelo ke e tlwaelegilego kudu—gantši e le ka baka la ditiragalo tšona tšeo Jesu a boletšego ka tšona e sa le pele. Go etša ge go  begilwe ka Beibeleng go Mateo kgaolo 24, Mareka kgaolo 13 le Luka kgaolo 21, Jesu o boletše gore mehleng ye ya bofelo ya lefase, go tla ba le dintwa ditšhabeng, dikotsi tša tlhago, go ata ga go hloka molao le go fola ga lerato. Lega go le bjalo, bjalo ka ge Jesu a ile a bolela, tlhakodišo ga e kgole.

Ka morago ga go hlalosa leuba la khuduego ya maikwelo lefaseng ka bophara le mathomo a ‘masetla-pelo a magolo’ ao a bego a tla latela, ela hloko seo Jesu a boletšego gore batho ba swanetše go se dira: “Le inamoloxê, Le tsošê dihlôxô tša lena, ka xobane xo tlo ba xò batamêla topollô ya lena.” (Mateo 24:21-31; Luka 21:28) Ee, ge maemo a lefase a dutše a mpefala, re ka kgonthišega gore masetla-pelo a magolo ao a tlelago tshepedišo ye ya dilo e bakago kgateletšego a tla feleletša ka go fela ga bokgopo ka moka le go šuthelela tshepedišo e mpsha ya go loka.—1 Johane 2:17; Kutollo 21:3, 4.

Ga se ra swanela go makatšwa ke gore topollo ya rena e tla tla feela ka morago ga ge bokgopo le bošoro di fihlile tlhoreng ya tšona. Dikahlolo tša Modimo tša nakong e fetilego malebana le lefase la mehleng ya Noage le badudi ba gobogilego ba Sodoma le Gomora, di ile tša latela mokgwa o swanago. Go phethagatšwa moo ga nakong e fetilego ga kahlolo ya Modimo go bontšha seo se tlago go direga nakong e tlago.—2 Petro 2:5, 6.

Go Fela ga Kgateletšego ya Khuduego ya Maikwelo

Ge e ba o tlaišwa ke kgateletšego ya ka morago ga khuduego ya maikwelo (PTSD), o ka ba o ipotšiša ge e ba dikgopolo tša gago tše bohloko di tla ka tša fela. Lega go le bjalo, karabo ya kgonthe ke: Ee, di tla fela! Go Jesaya 65:17, Jehofa Modimo o bolela gore: “Ke tlo hlôla maxodimo a mafsa le lefase le lefsa, tša kxalê di ka se hlwê di tsebywa, le mo pelong ya motho di ka se hlwê di rotoxa.” (Mongwalo o sekamego ke wa rena.) Gaešita le ge mabadi a monagano a khuduego ya maikwelo a ka bonagala e le a sa ruri, lengwalo le le re kgonthišetša gore ka letšatši le lengwe matla a wona a šitišago a tla ba a ile le muši wa dikwekwele.

Lehono, mo e ka bago ka godimo ga ngwaga ka morago ga maitekelo a go katwa, Jane o hlankela e le modiredi wa mmulamadibogo (moebangedi wa nako e tletšego) wa Dihlatse tša Jehofa. O sa tšwa go bolela gore: “E bile feela ka morago ga ge tsheko e fedile gomme mohlasedi wa-ka a bonwe molato—dikgwedi tše fetago tše seswai ka morago ga tlhaselo—moo ke ilego ka ikwa ke boetše boemong bja-ka. Ngwagola ka nako ye, ke be ke sa nagane ka khutšo le lethabo tšeo gona bjale ke di thabelago. Ke leboga Jehofa bakeng sa kholofetšo e botse ya bophelo bjo bo sa felego le sebaka sa go abelana kholofelo yeo le ba bangwe.”—Psalme 27:14.

Ge e ba o katana le manyami le go retela maikwelong mo go boifišago ga PTSD, kholofelo yeo e ka thuša bakeng sa go go thekga ka mo go swanago.

[Seswantšho go letlakala 24]

Go ba gona dibokeng tša Bokriste go ka go thuša go lebeletšana le boemo ka katlego

[Diswantšho go letlakala 24, 25]

Go bala Lentšu la Modimo le go rapela go ka thuša go go matlafatša

[Seswantšho go letlakala 26]

Kgaufsinyane, khuduego ka moka ya maikwelo e tla be e le selo sa nakong e fetilego