Pono ya Beibele

Modimo ke yo a Kgotlelelago Gakaaka’ng?

“XE MODIMO A RATILE XO BÔNAXATŠA BOXALE BYA XAXWE LE XO TSEBATŠA MATLA A XAXWE, KÉ XORE DIBYA TŠEO TŠA XO BONAXATŠA BOXALE KA TŠÔNA, TŠE DI DIRETŠWEXO XO SENYÊXA, Ó DI NENEKETŠA KA PELO-TELELELE [“KGOTLELELO,” NW].”—BA-ROMA 9:22.

GO THEOŠA le histori, Modimo o ile a kgotlelela bobe bjo bontši le bokgopo bjo bo lego molaleng. Nywageng e fetago 3 000 e fetilego, Jobo o ile a lla ka gore: “Ké ka ’baka la’ng xe ba babe ba phela, ba bá ba tšofala, ba tia matla ka xo huma? Ba bôna bana ba bôná bà tiile bà na nabô’; ba bôna le ditloxolwana. Nywakong ya bôna xo thabilwe, xa xo na se se ba thšošaxo; xa xo kxati ya Modimo ye e ba tlêlaxo.” (Jobo 21:7-9) Barati ba bangwe ba toka ba bjalo ka moporofeta Jeremia, le bona ba ile ba bontšha go tshwenyega ka go bonagala ga Modimo e le yo a kgotlelelago batho ba babe.—Jeremia 12:1, 2.

O nagana’ng? Na o gakantšhwa ke go dumelela ga Modimo bokgopo? Na ka dinako tše dingwe o ikwa eka Modimo o swanetše go akgofa gomme a fediše batho ka moka ba kgopo gatee-tee? Ela hloko seo Beibele e se bolelago ka mellwane ya kgotlelelo ya Modimo le mabaka a yona.

Ke ka Baka La’ng Modimo e le yo a Kgotlelelago?

Sa pele, re swanetše go botšiša: Ke ka baka la’ng Modimo yo a nago le ditekanyetšo tše di phagamego kudu tša toko, a kgotlelela bobe ka mo go feletšego? (Doiteronomio 32:4; Habakuku 1:13) Na se se bolela gore o thekga bokgopo? Le gatee! Nagana ka seswantšho se se latelago: A re re go na le mmui yoo a tshelago melao-motheo ya tša maphelo le yoo a kwešago balwetši ba gagwe bohloko bjo bogolo. Ge nkabe a be a šoma sepetlele, na o be a ka se tlošwe gatee-tee? Eupša go na le maemo a mangwe moo kgotlelelo e sa tlwaelegago e ka nyakegago. Ka mohlala, boemong bja tšhoganetšo kudu, mohlomongwe mogoleng wa ntwa, na e ka se be ga bohlokwa go kgotlelela go šoma ga mmui maemong a thata le a kotsi, mohlomongwe gaešita le go diriša seo ka tlwaelo se ka lebelelwago e le setlabakelo sa tlase le ditlabakelo tša bongaka?

Ka mo go swanago, lehono Modimo o kgotleletše ka go se fele pelo dilo tše dintši tšeo a hwetšago e le tše sa amogelegego ka mo go feletšego. Gaešita le ge a hloile bokgopo, o bo dumeletše gore bo tšwele pele ka lebakanyana. Go na le mabaka a kwagalago a go dira ga gagwe bjalo. Lebaka le lengwe ke gore, se se nea nako bakeng sa gore dikgang tše kgolo tšeo di tsošitšwego ke borabele bja Sathane tšhemong ya Edene di lokišetšwe sa ruri. Tše ke dikgang tšeo di tswalanago kgaufsi le go loka ga tsela ya Modimo ya go buša le go swanelega ga gagwe. Gape, kgotlelelo ya gagwe ya go kgotlelela se se fošagetšego ka go se fele pelo e nea bao ba akaretšwago bobeng nako ya gore ba fetoge.

Modimo wa Kgaugelo, yo a sa Felego Pelo

Batswadi ba rena ba pele e lego Adama le Efa ba ile ba tlatša Sathane borabeleng bja gagwe kgahlanong le Modimo. Ka mo go swanetšego, Modimo o be a ka ba fediša kapejana. Go e-na le moo o ile a ipontšha e le yo a gaugelago le yo a kgotlelelago, gomme ka lerato a ba dumelela go ba le bana. Eupša bana ba gotee le lapa ka moka  la motho leo le tšwilego go bona, ba ile ba belegelwa boemong bja sebe.—Ba-Roma 5:12; 8:20-22.

Modimo o ile a rera go hlakodiša motho boemong bja gagwe bja bomadimabe. (Genesi 3:15) Lega go le bjalo, ka nako e swanago, ka baka la ge a kwešiša kamoo go se phethagale mo go abetšwego go Adama go re kgomago ka gona, o bontšha go se fele pelo mo go golo le kgaugelo. (Psalme 51:5; 103:13) Ke “wa lešôkô le wa kxauxelô” gomme o ikemišeditše e bile o rata go re bontšha “tebalèlô e nntši.”—Psalme 86:5, 15; Jesaya 55:6, 7.

Mellwane ya Kgotlelelo ya Modimo

Lega go le bjalo, e tla ba go hloka lerato le go se leka-lekane gore Modimo a dumelele bokgopo bo tšwela pele ka mo go sa felego. Ga go na tate yo lerato yo a ka kgotlelelago bobe ka mo go sa felego go yo mongwe wa bana ba gagwe yo a tšwelago pele a tliša bohloko bjo bošoro go ditho tše dingwe tša lapa ka boomo. Ka gona, kgotlelelo ya Modimo ya go kgotlelela sebe, ka mehla e tla leka-lekanywa ka dika tše dingwe tše bjalo ka lerato, bohlale le toka. (Ekisodo 34:6, 7) Gatee-tee ge morero wa go se fele pelo ga gagwe o phethilwe, kgotlelelo ya gagwe ya go kgotlelela bokgopo e tla fela.—Ba-Roma 9:22.

Moapostola Paulo o ile a bontšha se ka mo go kwagalago. Lebakeng le lengwe o ile a bolela gore: “Ké Yêna [Modimo], e sa le mola kxalê, a lesitšexo dithšaba ka moka di sepelê ka ditsela tša tšôna.” (Ditiro 14:16) Lebakeng le lengwe gape Paulo o ile a bolela mabapi le kamoo ‘Modimo a hlokomologilego mabaka a go se tsebe’ ka lehlakoreng la batho bao ba ilego ba tshela melao le melao ya motheo ya gagwe. Paulo o tšwetše pele ka gore: “Xomme mehleng yeno [Modimo] ó laêla batho bohle thokô tšohle, ó re ba boê.” Ka baka la’ng? “Ka xobane ó beile ’tšatši a tl’o xo ahlola lefase ka lôna ka tokô.”—Ditiro 17:30, 31.

Holwa ke Kgotlelelo ya Modimo Gona Bjale

Ka gona, go molaleng gore ga go le o tee yo a swanetšego go nagana gore a ka fo hlokomologa melao ya Modimo gomme a kgopela Modimo tebalelo ka sewelo ge a nyaka go phonyokga mafelelo a ditiro tša gagwe. (Jošua 24:19) Ba bantši Isiraeleng ya bogologolo ba ile ba nagana gore ba ka dira seo. Ba be ba ka se fetoge. Ba ile ba lahlegelwa ke morero wa kgotlelelo le go se fele pelo ga Modimo. Modimo ga se a ka a kgotlelela bobe bja bona ka mo go sa felego.—Jesaya 1:16-20.

Beibele e bontšha gore bakeng sa gore a pheme kahlolo ya Modimo ya mafelelo, motho o swanetše go ‘itshola’—se se bolela gore ka go nyama o dumela go se phethagale ga gagwe e lego boemo bja sebe pele ga Modimo gomme ka morago o furalela bobe. (Ditiro 3:19-21) Ke moka, motheong wa sehlabelo sa Kriste sa topollo, Jehofa Modimo o tla nea tebalelo. (Ditiro 2:38; Ba-Efeso 1:6, 7) Ka nako ya gagwe e swanetšego, Modimo o tla dirolla mafelelo ka moka a nyamišago a sebe sa Adama. Go tla ba le “lexodimo le lefsa, le lefase le lefsa” moo a ka se sa hlwago a kgotlelela “dilo tša bjale . . . tšeo di hlabago mokgoši wa gore di fedišwe.” (Kutollo 21:1-5; Ba-Roma 9:22, Phillips) A mafelelo a kgahlišago gakaakang a kgotlelelo ya Modimo e kgolo, eupša e le yeo e nago le mellwane!

[Seswantšho go letlakala 29]

Modimo o ile a dumelela Adama le Efa gore ba be le bana