Bana ba Swanetše go Laiwa Bjang?

Kuranta ya Canada ya National Post e re: “Mathata a tšwelela ge bana ba botšwa gore ba dira gabotse go sa šetšwe gore ba dira eng. Batswadi ba bangwe ba dumela gore mokgwa wo wa go dira dilo o aga boitlhompho ka go bana ba bona. Lega go le bjalo, go ya ka setsebi sa tša monagano Roy Baumeister, “go ba le boitlhompho bjo bo tseneletšego ke mo go swanetšego ge e ba go theilwe boitekong bja kgonthe, eupša batswadi ba swanetše go lebiša tlhokomelo go ruteng bana ba bona boitshwaro.”

Motswadi yo a tšhabago go phošolla ngwana wa gagwe ge ngwana a tšea tsela e fošagetšego, ruri o gobatša ngwana yoo. Go ba gona, go phošolla ke mokgwa wa go laya. Ka ge go le bjalo, go ruta ngwana yo a fošitšego go phema go boeletša diphošo. Ee, batswadi ba swanetše go phema go nea phošollo ka tsela e bogale le yeo e sa lekanego le phošo yeo e dirilwego. (Jeremia 46:28) Ba swanetše go kgonthišetša gore phošollo ga se e feteletšego. Beibele e re: “Lena Bô-tata-xo-bana! Le se kê la befediša bana ba lena, xore ba se tširoxê.”—Ba-Kolose 3:21.

Ka Beibeleng, phošollo ka mehla e kgokaganywa le lerato le bonolo, e sego le bogale le bosehlogo. Moeletši yo a nago le bokgoni o swanetše gore ‘a dire bohle ka botho, . . . a kgotlelele bošula, bangangi a ba eletše ka boleta.’ (2 Timotheo 2:24, 25) Ka gona, phošollo ya botswadi ga se ya swanela go fo ba tsela ya go phohliša maikwelo ya motswadi. Beibele le gatee ga e thekge go dirišwa ga mekgwa yeo e ka gobatšago ngwana.

Ba dimilione lefaseng ka bophara ba hotšwe ke kgatišo ya matlakala a 192 ya Sephiri sa Lethabo la Lapa. Gare ga dikgaolo tša yona tše di rutago, go na le tše, “Tlwaetša Ngwana wa Gago go Tloga Boseeng” le “Thuša Ngwana wa Gago yo a Lego Mahlalagading go Atlega.” Gore o hwetše kopi ya gago, hle tlatša setlankana se se lego mo gomme o se romele atereseng yeo e bontšhitšwego setlankaneng goba atereseng e swanetšego yeo e lokeleditšwego go letlakala 5 la makasine wo. O tla hwetša ditšhišinyo tše lebanyago tšeo di ka go thušago go rarolla mathata le go dira gore bophelo bja lapa e be bjo bo thabišago go ya kamoo Mmopi a bego a rerile gore bo be ka gona.

□ Hle ntlišetšeng kopi ya puku ya Sephiri sa Lethabo la Lapa.

Bontšha gore ka leleme lefe.

□ Hle ikopanyeng le nna mabapi le thuto e sa lefelelwego ya legae ya Beibele.