Diriša Diokobatši tša tša Kalafo ka Bohlale

KA MONGWALEDI WA PHAFOGA! AFRIKA BORWA

GE NGAKA ya gago e go nea diokobatši tša tša kalafo, ka ntle le pelaelo e dira bjalo ka maikemišetšo a mabotse, e theile go nea seokobatši tlhahlobong ya yona, tsebong ya tša kalafo le phihlelong. Lega go le bjalo, molwetši ga se a swanela go lebelela gore ngaka ya gagwe e ikarabele ka mo go feletšego ka go fola ga gagwe. Molwetši o dula e le yo a ikarabelago bakeng sa seo a se tsenyago mmeleng wa gagwe.

Ge o diriša dihlare tšeo o di neilwego, nagana ka dikeletšo tše di latelago tše šomago go tšwa ngakeng ya tša kalafo:

● Diokobatši ka moka di na le ditla-morago. O na le tshwanelo ya go tseba kalafo yeo o e neilwego le kgonagalo ya ditla-morago tša yona. Ge e ba ngaka ya gago e sa nee tsebišo ye, o se ke wa dika-dika go e kgopela. Maemong a mangwe mehola ya seo e tla ba e megolo go feta ditla-morago. Eupša o swanetše go tsebišwa e le gore o dire phetho e bohlale.

● Diokobatši di kgoma batho ka moka ka ditsela tše di sa swanego. Ngaka ya gago e ka se bolelele pele ka go lebanya kamoo seokobatši seo se neilwego se tlago go go kgoma ka gona. Ge e ba o thoma go lemoga ditla-morago tše di sa letelwago, bonana le ngaka ya gago.

● Nyaka go tseba gore o tla diriša kalafo ka nako e telele gakaakang. Gape hwetša ge e ba e tla ba yeo e dirišwago ka mehla.

● Hlokomela go itšeela phetho ya go kgaotša go diriša kalafo ka bowena, mohlomongwe ka baka la ge o ikwa o le kaone. Go kgaotša kalafo kapejana go ka befiša boemo bja gago. Go e-na le moo bonana le ngaka ya gago pele.

● Ka mehla, diriša kalafo yeo o e neilwego ka tlase ga tlhokomelo ya ngaka.