Pono ya Beibele

Go Diriša ga Modimo Matla—Na go a Lokafatšwa?

GO DIRIŠWA ga matla ka tsela e bolayago, e bile seka sa ka mehla historing ya batho. Go ya ka tekanyetšo e nngwe, mohlomongwe ke batho ba ka bago 170 000 000 ba bolailwego ke mebušo ya bona ka noši ya dipolitiki lekgolong la bo-20 la nywaga. Go etša ge Beibele e bontšha gabotse, batho ba bušitše batho ba bangwe, ya ba go ba kweša bohloko.—Mmoledi 8:9.

Ka baka la go diriša ga motho matla a šoro gampe, ba bangwe ba ka belaela go diriša ga Modimo matla bakeng sa go fediša manaba a gagwe. Na ba-Juda ga se ba ka ba hlasela le go bolaya badudi ba ba-Kanana ba Nageng ya Kholofetšo ka tlase ga taelo ya Modimo? (Doiteronomio 20:16, 17) Le gona, na Modimo ka noši ga a bolele gore o tla pšhatlaganya le go fediša mebušo ka moka yeo e ganetšanago le yena? (Daniele 2:44) Batho ba bangwe ba botegago ba ile ba ipotšiša ge e ba go diriša ga Modimo matla e le mo go lokafatšwago ka mehla.

Go Diriša Matla Gampe

Go bohlokwa go kwešiša gore bokgoni bja go diriša matla ke seka sa bohlokwa kudu sa pušo. Pušo yeo e palelwago ke go kgonthišetša go latelwa ga melao ya yona, ge e le gabotse, ga e na matla. Ka mohlala, go sa šetšwe dipego tša ditiro tša kgobošo tša maphodisa, ke batho ba bakae bao ba bego ba ka ikemišetša go arogana le tšhireletšo ya maphodisa? Le gona, ke mang yo a phetšego gabotse monaganong yo a ka ganetšanago le taba ya go nyakega ga tshepedišo ya toka yeo e nago le matla a go atlega?

Mohandas Ghandi, yo a bego a tumile ka go hloya ga gagwe bošoro, o kile a re: “A re re monna o tsenwa ke bogafsi gomme o sepela mo gohle a galefile, a swere tšhoša ka seatleng, a bolaya  mang le mang yo a gahlanago le yena gomme ga go motho yo a lekago go mo swara a sa phela. Mang le mang yo a ka bolayago segafsi se, setšhaba se tla mo leboga gomme sa mo lebelela bjalo ka motho yo botho kudu.” Ee, gaešita le Ghandi o bone go nyakega ga go diriša matla ka tlase ga maemo a itšego.

Go molaleng gore bokgoni bja go diriša matla ke seka se se nyakegago lekokong le ge e le lefe leo le tsepamego la batho. Ka kakaretšo, ge batho ba nyatša tirišo ya matla, ge e le gabotse ba nyatša go dirišwa ga matla gampe.—Mmoledi 4:1-3.

“’Tsela Tša’xwe Tšohle di Lokile”

Histori ga e nee bohlatse bja gore Modimo le ka mohla o kile a diriša matla a gagwe gampe. Ga a buše ka matla a feteletšego. O nyaka gore re mo hlankele ka baka la gore re mo rata. (1 Johane 4:18, 19) Ge e le gabotse, Modimo ga a diriše matla ge e ba go e-na le tsela e lokilego e ka dirišwago ya go efoga seo. (Jeremia 18:7, 8; 26:3, 13; Hesekiele 18:32; 33:11) Le gona, ge a kgetha go diriša matla, ka mehla o nea ditemošo tše dintši gore mang le mang yo a ratago go dira bjalo, a gate megato ya go lokiša ditsela tša gagwe. (Amosi 3:7; Mateo 24:14) Na tše ke ditiro tša Modimo yo a dirišago matla ka mo go feteletšego le yo sehlogo?

Go diriša ga Modimo matla go fapane kudu le go dirišwa ga matla gampe ke batho ka tsela yeo e sa lokafatšwego. Moše o re ka Jehofa: “’Tsela tša’xwe tšohle di lokile, Yêna Modimo wa therešô, Mo-ila-bokxôpô.” (Doiteronomio 32:4) Go fapana le mebušo ya batho ba bagateledi, mmušo wa Modimo ga se wa ithekga ka taba ya gore ke mang yo a nago le matla a magolo a taolo. Maemong ka moka, o dirišitše matla ka go dumelelana le lerato la gagwe le le phethagetšego, bohlale le toka.—Psalme 111:2, 3, 7; Mateo 23:37.

Ka mohlala, ge Modimo a be a fediša batho ba babe ka Meetse-fula, e bile ka morago ga nywaga e mentši ya temošo. Motho le ge e le ofe a ka be a ile a ikhola ka tokišetšo ya areka gomme a phologa. Ke ba seswai feela bao ba dirilego bjalo. (1 Petro 3:19, 20; 2 Petro 2:5) Mehleng ya Jošua, Isiraele e ile ya phetha kahlolo ya Modimo go ba-Kanana ba gobogilego, e lego kahlolo yeo e bego e tsebaditšwe nywaga e 400 pele ga moo! (Genesi 15:13-21) Nakong yeo ka moka, go be go ka se direge gore ba-Kanana ba se tsebe ka bohlatse bjo matla bja gore ba-Isiraele ke setšhaba se kgethilwego ke Modimo. (Jošua 2:9-21; 9:24-27) Lega go le bjalo, ga go na setšhaba se sengwe sa ba-Kanana ka ntle le sa ba-Gibeoni seo se ilego sa tsoma kgaugelo goba sa diriša ka mo go holago sebaka sa go lopa khutšo. Go e na le moo, ba-Kanana ba ile ba kgetha go thatafatša dipelo tša bona malebana le Modimo.—Jošua 11:19, 20.

Modimo o na le Matla a Taolo

Ge re leka go kwešiša tsela yeo Modimo a dirišago matla ka yona, re swanetše go thoma ka therešo ya motheo mabapi le boemo bja rena pele ga Modimo. Moporofeta Jesaya o ile a dumela ka boikokobetšo gore: “O Mmopi wa rena, ’me rena re letsopa.” (Jesaya 64:8) Go molaleng gore bjalo ka Mmopi wa legohle, Modimo a ka diriša matla a gagwe ka tsela le ge e le efe yeo a e ratago. Ka go lemoga matla a Modimo a taolo, re ka bolela go etša Salomo ra re: “Lentšu la kxoši ké le matla, ké mang a kaxo re: O dira’ng?”—Mmoledi 8:4; Ba-Roma 9:20, 21.

Ka baka la boemo bja Modimo bja go ba Mmopi yo matla-ohle, o kgona go nea bophelo bja mo lefaseng le go bo fediša. Ka kgonthe, batho ga ba na temogo ya go belaela matla a Modimo ka tshwanelo le ka go ba le tsebo. Motho o swanetše go ithuta go dumelelanya kgopolo ya gagwe le ya Modimo. Jehofa o ile a botšiša gore: “A xa ke re tše di sa lokaxo ké tša lena ditsela”?—Hesekiele 18:29; Jesaya 45:9.

Ke go lemoga ga Jehofa go nyakega ga toka le go ba ga gagwe le lerato bakeng sa batho tšeo di tlago go mo tutueletša go fediša lefaseng batho bao ba dirišago matla gampe le bao ba gatakelago o šoro ditshwanelo tša ba bangwe. Kgato ye ya matla e tla hloma maemo a mabotse kudu mo lefaseng bakeng sa batho ka moka ba ba ratago khutšo bao ba nyakago seo. (Psalme 37:10, 11; Nahume 1:9) Ka gona, mmušo wa Modimo o tla lokafatšwa le go lwelwa ka mo go sa felego.—Kutollo 22:12-15.